Ritika Nayak | షూటింగ్ మొద‌లుకాక‌ముందే నితిన్ సినిమా నుంచి హీరోయిన్ ఔట్ – త‌ప్పుకుందా? త‌ప్పించారా?

Ritika Nayak |  నితిన్ హిట్టు అందుకొని చాలా కాల‌మే అయ్యింది. భీష్మ త‌ర్వాత నితిన్ హీరోగా న‌టించిన తొమ్మిది సినిమాలు డిజాస్ట‌ర్లుగా నిలిచాయి. ఫ్లాపుల్లో ట్రిపుల్ హ్యాట్రిక్ కొట్టాడు. హీరోగా క‌మ్‌బ్యాక్ కోసం ఎదురుచూస్తున్న నితిన్ ఇటీవ‌లే ఓ కొత్త సినిమాకు గ్రీన్‌సిగ్న‌ల్ ఇచ్చాడు. సితార ఎంట‌ర్‌టైన్‌మెంట్స్ ప‌తాకంపై సూర్య దేవ‌ర నాగ‌వంశీ నిర్మిస్తున్నారు. సోము - న‌ర్రి డైరెక్ట‌ర్లుగా ఎంట్రీ ఇస్తున్నారు.మిరాయ్ ఫేమ్ రితికా నాయ‌క్‌ను హీరోయిన్‌గా తీసుకున్నారు. మే నెల‌లో ఈ మూవీ ఓపెనింగ్ ఈవెంట్‌ను గ్రాండ్‌గా నిర్వ‌హించారు. ఈ ప్రారంభోత్స‌వ వేడుక‌లో నితిన్‌తో పాటుగా రితికా నాయ‌క్ కూడా పాల్గొన్న‌ది. షూటింగ్ మొద‌లుకావ‌డ‌మే త‌రువాయి అనుకుంటున్న టైమ్‌లో మేక‌ర్స్‌కు పెద్ద షాక్ త‌గిలింద‌ట‌.

రెమ్యూన‌రేష‌న్ కార‌ణ‌మా?

సెట్స్‌లో అడుగుపెట్ట‌క‌ముందే నితిన్ కొత్త మూవీ నుంచి రితికా నాయ‌క్ త‌ప్పుకుంద‌ట‌. రెమ్యూన‌రేష‌న్ ఇష్యూస్‌తోనే ఆమె ఈ సినిమా నుంచి వైదొలిగిన‌ట్లు వార్త‌లొస్తున్నాయి. అంగీక‌రించిన దానికంటే ఎక్కువ‌గా రెమ్యూన‌రేష‌న్ డిమాండ్ చేయ‌డంతో మేక‌ర్స్ రితికా నాయ‌క్‌ను ప‌క్క‌న‌పెట్టిన‌ట్లు ప్ర‌చారం జ‌రుగుతోంది.

బేబీ ఫేమ్‌...

రితికా నాయ‌క్ స్థానంలో బేబీ ఫేమ్ వైష్ణ‌విచైత‌న్య‌ను హీరోయిన్‌గా సెలెక్ట్ చేసిన‌ట్లు స‌మాచారం. ప్ర‌స్తుతం సితార బ్యాన‌ర్‌లోనే ఎపిక్ మూవీ చేస్తోంది వైష్ణ‌వి చైత‌న్య‌. రొమాంటిక్ మూవీలో వైష్ణ‌వి బోల్డ్ రోల్‌లో క‌నిపించ‌బోతుంది. వైష్ణ‌వి న‌ట‌న‌కు ఇంప్రెస్ అయిన ప్రొడ్యూస‌ర్లు నితిన్ మూవీలోనూ ఈ అచ్చ తెలుగు బ్యూటీకి అవ‌కాశం ఇచ్చిన‌ట్లు వార్త‌లొస్తున్నాయి. హీరోయిన్ ఛేంజ్‌పై అఫీషియ‌ల్ అనౌన్స్‌మెంట్ రానున్న‌ట్లు స‌మాచారం.
రొమాంటిక్ యాక్ష‌న్ ఎంట‌ర్‌టైన‌ర్‌గా తెర‌కెక్కుతోన్న ఈ సినిమా షూటింగ్ జూలై నుంచి మొద‌లుకానుంద‌ని అంటున్నారు. కాగా కొత్త ద‌ర్శ‌కుల‌తో పాటు వీఐ ఆనంద్‌తో సైంటిఫిక్ థ్రిల్ల‌ర్ సినిమా చేస్తోన్నాడు నితిన్‌.