Tripti Dimri | బోల్డ్ బ‌యోపిక్‌లో త్రిప్తి డిమ్రి

Tripti Dimri |  విద్యాబాల‌న్ హీరోయిన్‌గా న‌టించిన బాలీవుడ్ మూవీ డ‌ర్టీ పిక్చ‌ర్‌కు దాదాపు ప‌దిహేనేళ్ల త‌ర్వాత సీక్వెల్ రాబోతుంది. డర్టీ పిక్చర్ 2 పేరుతో ఈ సీక్వెల్‌ను రూపొందిస్తోన్న‌ట్లు నిర్మాత ఏక్తాక‌పూర్ ప్ర‌క‌టించింది. అనౌన్స్‌మెంట్‌తోనే ఈ మూవీ బాలీవుడ్ వ‌ర్గాల్లో చ‌ర్చ‌నీయాంశంగా మారింది. డ‌ర్టీ పిక్చ‌ర్ త‌ర‌హాలోనే ఓ ద‌క్షిణాది న‌టి జీవితంలోని విషాద కోణాల‌ను బోల్డ్ యాంగిల్‌లో ఆవిష్క‌రిస్తూ సెకండ్ పార్ట్‌ రూపొందుతోన్న‌ట్లు స‌మాచారం. త‌మిళ హీరోయిన్ నిషా నూర్ క‌థ‌తో డ‌ర్టీ పిక్చ‌ర్ 2 తెర‌కెక్కుతోన్న‌ట్లు వార్త‌లు వినిపిస్తున్నాయి.

బోల్డ్ ఇమేజ్‌...

ఈ బ‌యోపిక్‌లో హీరోయిన్‌గా త్రిప్తి డిమ్రీ ఖ‌రారైన‌ట్లు బాలీవుడ్ వ‌ర్గాల్లో ప్ర‌చారం జ‌రుగుతోంది. హిందీతో పాటు ద‌క్షిణాదిలో త్రిప్తి డిమ్రికి ఉన్న బోల్డ్ ఇమేజ్‌ను దృష్టిలో పెట్టుకొని మేక‌ర్స్ ఆమెను సంప్ర‌దించిన‌ట్లు తెలిసింది. ఏక్తాక‌పూర్‌తో ఉన్న అనుబంధం కార‌ణంగా ఈ సీక్వెల్‌లో న‌టించ‌డానికి ఈ బాలీవుడ్ బ్యూటీ అంగీక‌రించిన‌ట్లు స‌మాచారం.

లైలా మ‌జ్ను...

ఏక్తా క‌పూర్ బ్యాన‌ర్‌లో వ‌చ్చిన లైలా మ‌జ్ను సినిమాతోనే త్రిప్తి డిమ్రి న‌ట ప్ర‌యాణం ప్రారంభ‌మైంది. ఆడిష‌న్స్‌లో డైరెక్ట‌ర్ ఇంతియాజ్ అలీ ఆమెను రిజెక్ట్ చేశారు. కానీ ఏక్తా క‌పూర్ ప‌ట్టుప‌ట్టి త్రిప్తికి ఛాన్స్ ఇప్పించింది. అప్ప‌టి నుంచి ఇద్ద‌రి మ‌ధ్య మంచి స్నేహం కొన‌సాగుతోంది. ఈ బాలీవుడ్ ప్రొడ్యూస‌ర్ కుటుంబంలో జ‌రిగిన‌ వేడుక‌లు, పార్టీల్లో త్రిప్తి డిమ్రి చాలా సార్లు క‌నిపించింది. ఏక్తా క‌పూర్‌తో ఉన్న స్నేహం కోస‌మే డ‌ర్టీ పిక్చ‌ర్ 2లో న‌టించ‌డానికి త్రిప్తి ఒకే చెప్పింద‌ని అంటున్నారు.

ఫ‌స్ట్ బ‌యోపిక్‌...

కెరీర్‌లో త్రిప్తి డిమ్రి అంగీక‌రించిన ఫ‌స్ట్ బ‌యోపిక్ మూవీ ఇదే కావ‌డం గ‌మ‌నార్హం. డ‌ర్టీ పిక్చ‌ర్ 2లో త్రిప్తి డిమ్రితో పాటు ప‌లువురు ద‌క్షిణాది, బాలీవుడ్ యాక్ట‌ర్లు కీల‌క పాత్ర‌ల్లో క‌నిపించ‌బోతున్న‌ట్లు స‌మాచారం. ప్ర‌స్తుతం త్రిప్తి డిమ్రి ప్ర‌భాస్‌తో స్పిరిట్ సినిమా చేస్తోంది. ఈ యాక్ష‌న్ మూవీతోనే టాలీవుడ్‌లోకి ఎంట్రీ ఇస్తోంది. స్పిరిట్ సినిమాకు సందీప్ వంగా ద‌ర్శ‌క‌త్వం వ‌హిస్తున్నారు.