Thalapathy Vijay | నా విడాకుల‌ గురించి కాదు…రాష్ట్ర సంక్షేమం గురించి ఆలోచిద్దాం – ద‌ళ‌ప‌తి విజ‌య్ పిలుపు

Thalapathy Vijay |  ద‌ళ‌ప‌తి విజ‌య్ విడాకుల వ్య‌వ‌హారం కోలీవుడ్ నాట సంచ‌ల‌నంగా మారింది. ఓ హీరోయిన్‌తో విజ‌య్‌కి వివాహేత‌ర సంబంధం ఉందంటూ ఆరోపిస్తూ విజ‌య్ భార్య సంగీత ఇటీవ‌ల కోర్టును ఆశ్ర‌యించింది. భ‌ర్త నుంచి విడాకులు కావాలంటూ కోర్టులో పిటిష‌న్ వేసింది. ఈ విడాకుల వార్త‌ల న‌డుమ విజ‌య్‌, త్రిష క‌లిసి ఓ పెళ్లి వేడుక‌కు హాజ‌రుకావ‌డం త‌మిళ సినీ వ‌ర్గాల దృష్టిని ఆక‌ర్షించింది. విజ‌య్‌, త్రిష ప్రేమ‌లో ఉన్న‌ది నిజ‌మేన‌ని, భార్య సంగీత‌కు విడాకులు ఇచ్చి త్రిష‌ను విజ‌య్ పెళ్లిచేసుకోబోతున్న‌ట్లు త‌మిళ ఇండ‌స్ట్రీలో జోరుగా ప్ర‌చారం జ‌రుగుతోంది. విజ‌య్ టీవీకే పార్టీ నుంచి త్రిష కూడా పోటీ చేయ‌బోతున్న‌ట్లు వార్త‌లు వినిపిస్తున్నాయి.

నేను ప‌రిష్క‌రించుకుంటా...

తాజాగా విడాకుల‌తో పాటు వ్య‌క్తిగ‌త జీవితంలోని స‌మ‌స్య‌ల‌పై విజ‌య్ రియాక్ట్ అయ్యారు. సోమ‌వారం చెన్నైలో టీవీకే పార్టీ మేనిఫెస్టోను విజ‌య్ విడుద‌ల చేశారు. ఈ స‌భ‌లో త‌న స‌మ‌స్య‌ల‌ను తాను ప‌రిష్క‌రించుకుంటాన‌ని, వాటి గురించి ఎవ‌రూ కంగారు ప‌డొద్ద‌ని విజ‌య్ అన్నారు. "గ‌త కొద్ది రోజులుగా నా చుట్టూ చాలా జ‌రుగుతున్నాయి. కొన్ని స‌మ‌స్య‌లు ఎదుర‌య్యాయి. వాటివ‌ల్ల న‌న్ను అభిమానించే వారు బాధ‌ప‌డ‌టం నాకు ఇష్టం లేదు. మీరు ఆందోళ‌న ప‌డ‌టం చూస్తుంటే నా మ‌న‌సు బ‌రువెక్కుతోంది. నా స‌మ‌స్య‌ల‌ను నేను ప‌రిష్క‌రించుకోగ‌ల‌ను. అవ‌న్నీ మీ స‌మ‌యాన్ని కేటాయించేంత విలువైన‌వి, ముఖ్య‌మైన‌వి కావ‌ని అనుకుంటున్నా. చాలా చిన్న‌వి. వాటికి బ‌దులుగా రాష్ట్ర సంక్షేమంపై దృష్టిపెడ‌దాం" అంటూ విజ‌య్ ఈ స‌భ‌లో పేర్కొన్నారు. విడాకుల‌ను ఉద్దేశించే విజ‌య్ ఈ స్టేట్‌మెంట్ ఇచ్చిన‌ట్లు ప్ర‌చారం జ‌రుగుతోంది. ఆయ‌న కామెంట్లు సోష‌ల్ మీడియాలో వైర‌ల్ అవుతోన్నాయి.

మ‌రో పిటిష‌న్‌...

ఇటీవ‌లే విడాకుల కోసం కోర్టు మెట్టు ఎక్కిన సంగీత తాజాగా మ‌రో పిటిష‌న్ దాఖ‌లు చేసింది. విడాకులు మంజూరు అయ్యే వ‌ర‌కు విజ‌య్ ఇంట్లోనే తాను ఉంటాన‌ని, అందుకు అనుమ‌తులు ఇవ్వాల‌ని కోరింది. గ‌త ఇర‌వై ఆరేళ్లుగా విజ‌య్‌తో క‌లిసి ఉన్న ఇంట్లోకి త‌న‌ను అనుమ‌తించ‌డం లేద‌ని, ఆ ఇంటిలో త‌న‌కు స‌గం వాటా ఉంద‌ని సంగీత పేర్కొన్న‌ది. సంగీత పిటిష‌న్ కోలీవుడ్‌లో ఆస‌క్తిక‌రంగా మారింది. విజ‌య్‌, సంగీత విడాకుల పిటిష‌న్‌పై ఏప్రిల్ 20న విచార‌ణ జ‌రుగ‌నున్న‌ట్లు స‌మాచారం.