Thalapathy Vijay | సీఎం అవుతాన‌ని రెండేళ్ల ముందే దళపతి విజయ్ హింట్ – వైర‌ల్ అవుతోన్న గోట్ మూవీ కారు నంబ‌ర్ ప్లేట్

Thalapathy Vijay |  త‌మిళ‌నాడు అసెంబ్లీ ఎన్నిక‌ల్లో ద‌ళ‌ప‌తి విజ‌య్ టీవీకే పార్టీ ఘ‌న విజ‌యాన్ని సాధించి కొత్త చ‌రిత్ర‌ను సృష్టించింది. ఎన్నిక‌ల బ‌రిలో నిలిచిన తొలిసారే ఏకంగా 108 స్థానాల్లో జ‌య‌కేత‌నాన్ని ఎగ‌రేసింది. అతి పెద్ద పార్టీగా టీవీకే అవ‌త‌రించింది. అధికార డీఎంకేతో పాటు అన్నాడీఎంకే పార్టీల‌కు షాకిచ్చిన విజ‌య్ పొలిటిక‌ల్ ఎంట్రీలోనే అద‌ర‌గొట్టారు. త‌మిళ‌నాడు కొత్త సీఎంగా త్వ‌ర‌లోనే ప‌ద‌వి బాధ్య‌త‌ల‌ను చేప‌ట్ట‌బోతున్నారు.

రెండేళ్ల ముందే...

2024లో టీవీకే పార్టీని నెల‌కొల్పిన విజ‌య్ రెండేళ్ల త‌ర్వాత తాను సీఎం కాబోతున్న‌ట్లు ముందే హింట్ ఇచ్చారు. అది కూడా ఓ సినిమాతో... విజ‌య్ న‌టించిన‌ ఆ సినిమాలోని సీన్ ఇప్పుడు వైర‌ల్ అవుతోంది. విజ‌య్ హీరోగా న‌టించిన గోట్ ( ది గ్రేటెస్ట్ ఆఫ్ ఆల్ టైమ్ ) మూవీ 2024లో ప్రేక్ష‌కుల ముందుకొచ్చింది. వెంక‌ట్ ప్ర‌భు ద‌ర్శ‌క‌త్వంలో యాక్ష‌న్ థ్రిల్ల‌ర్‌గా రూపొందిన ఈ మూవీలో విజ‌య్ డ్యూయ‌ల్ రోల్‌లో న‌టించాడు. గోట్ మూవీకి బాక్సాఫీస్ వ‌ద్ద మిక్స్‌డ్ టాక్ వ‌చ్చింది. కానీ విజ‌య్ క్రేజ్ కార‌ణంగా క‌లెక్ష‌న్స్ మాత్రం భారీగానే వ‌చ్చాయి.

కారు నంబ‌ర్ ప్లేట్‌...

కాగా ఈ సినిమాలో విజయ్ నడిపే కారు రిజిస్ట్రేషన్ నంబర్ ఇప్పుడు సోష‌ల్ మీడియాలో చ‌క్క‌ర్లు కొడుతోంది. 'TN 07 CM 2026 అనే నంబ‌ర్ ప్లేట్‌తో కూడిన కారును విజ‌య్ ఈ సినిమాలో వాడాడు. తమిళనాడుకు 2026లో తానే ముఖ్యమంత్రిని అవుతానని ఈ నంబ‌ర్ ప్లేట్‌తో రెండేళ్ల ముందే విజ‌య్ చెప్పాడ‌ని ఫ్యాన్స్ కామెంట్స్ చేస్తోన్నారు. ఆ క‌ల‌ను కూడా నిజం చేసుకున్నాడ‌ని అంటున్నారు. విజ‌య్ కారు నంబ‌ర్ ప్లేట్ క‌నిపించే సీన్ల‌ను ఫ్యాన్స్ తెగ షేర్ చేస్తున్నారు.

రెండు స్థానాల్లో...

త‌మిళ‌నాడు అసెంబ్లీ ఎన్నిక‌ల్లో పెరంబూర్‌, తిరుచ్చి ఈస్ట్ స్థానాల్లో పోటీ చేసిన విజ‌య్ రెండు స్థానాల్లో విజ‌యం సాధించారు. కాగా తిరుచ్చి ఈస్ట్ స్థానానికి రాజీనామా చేసి పెరంబూర్ ఎమ్మెల్యేగా కొన‌సాగ‌నున్న‌ట్లు వార్త‌లొస్తున్నాయి.