Shivaji | శివాజీని మ‌హిళా క‌మిష‌న్ అడిగిన‌ ప్ర‌శ్న‌లివే!

Shivaji | హీరోయిన్ల డ్రెస్‌ల‌పై చేసిన అనుచిత కామెంట్ల‌కు సంబంధించి మ‌హిళా క‌మిష‌న్ విచార‌ణ‌లో శివాజీ మ‌రోసారి క్ష‌మాప‌ణ‌లు చెప్పారు. దండోరా ప్రీ రిలీజ్ ఈవెంట్‌లో హీరోయిన్ల డ్రెస్‌ల గురించి శివాజీ కామెంట్లు చేశారు. కొన్ని అస‌భ్య‌క‌ర మాట‌లు వాడారు. ఈ కామెంట్ల‌పై మ‌హిళా క‌మిష‌న్ అత‌డికి నోటీసులు పంపించింది. ఈ నోటీసుల‌కు సంబంధించి శ‌నివారం ఉద‌యం ప‌ద‌కొండు గంటలకు కమిషన్ ఎదుట శివాజీ విచార‌ణ‌కు హాజరయ్యారు. విచారణలో శివాజీ త‌న వ్యాఖ్యలపై మ‌రోసారి క్షమాపణలు చెప్పారు. తన తప్పును అంగీకరించారు. ఈ విచార‌ణ సందర్భంగా మహిళా కమిషన్ ఛైర్ ప‌ర్సన్ నేరెళ్ళ శారద అడిగిన ప‌లు ప్రశ్నలకు శివాజీ సమాధానం ఇవ్వలేక పోయార‌ట‌. త‌న వ్యాఖ్యలను పూర్తిగా వెనక్కి తీసుకుంటున్నట్లు మ‌హిళా క‌మిష‌న్ స‌భ్యులతో శివాజీ అన్నార‌ట‌. అంతే కాకుండా ఇక‌ మీదట మహిళల గురించి మాట్లాడేటపుడు మర్యాద పూర్వకంగా నడుచుకుంటానని శివాజీ మ‌హిళా క‌మిష‌న్ స‌భ్యుల‌తో చెప్పార‌ట‌.

స‌మాధానాలు చెప్ప‌ని శివాజీ

ఈ విచార‌ణ‌లో శివాజీపై ఛైర్ ప‌ర్స‌న్ నేరేళ్ల శార‌ద ప‌లు ప్ర‌శ్న‌లు సంధించారు. మహిళల దుస్తులే దాడులకు కారణమైతే....చిన్నారులు, వృద్ధ మహిళలపై జరుగుతున్న వేధింపులకు ఏ కారణం చెప్పగలర‌ని శివాజీని ఛైర్ ప‌ర్స‌న్‌ ప్ర‌శ్నించారు. దండోరా ప్రీ రిలీజ్ ఈవెంట్‌లో శివాజీ చేసిన‌ వ్యాఖ్యలను ఖండించినందుకు సినీ పరిశ్రమలోని మహిళలు వేధింపులకు గుర‌వ్వ‌డంపై మ‌హిళా క‌మిష‌న్ ఆగ్ర‌హం వ్య‌క్తం చేసింద‌ట‌. కాస్టింగ్ కౌచ్ గురించి స్పందించవలసిన బాధ్యత మీకు లేదా? అంటూ శివాజీని మ‌హిళా క‌మిష‌న్ ప్ర‌శ్నించారు. ఇతరులను త‌మ అజమాయిషీ లో ఉంచడానికి అనుచిత వ్యాఖ్యలు చెయ్యరాదంటూ శివాజీని మ‌హిళా క‌మిష‌న్ ఛైర్ ప‌ర్స‌న్ మంద‌లించిన‌ట్లు తెలిసింది.

ఆర్గ‌నైజ‌ర్స్‌కు సూచ‌న‌...

మహిళల పట్ల సమాజం పట్ల అంత గౌర‌వం ఉంటే హీరోయిన్ల డ్రెస్‌ల‌ విషయంలో బాధ్యతాయుతంగా వ్యవహరించాలని ద‌ర్శ‌క‌నిర్మాత‌ల‌కు చెబితే బాగుంటుంద‌ని శివాజీకి మ‌హిళా క‌మిష‌న్ స‌భ్యులు సూచించిన‌ట్లు స‌మాచారం. హీరోయిన్ల భద్రతలో ఈవెంట్ ఆర్గ‌నైజ‌ర్స్ త‌గిన చ‌ర్య‌లు తీసుకోవాల‌ని మ‌హిళా క‌మిష‌న్ ఈ విచార‌ణ‌లో సూచ‌న‌లు జారీ చేసిన‌ట్లు తెలిసింది.