George Krish | శ‌ర్వానంద్ జార్జ్ క్రిష్ షురూ – ఓపెనింగ్ రోజే రిలీజ్ డేట్ చెప్పేశారుగా!

నారి నారి న‌డుమ మురారి సినిమాతో ఈ ఏడాది సంక్రాంతికి పెద్ద హిట్టును త‌న ఖాతాలో వేసుకున్నాడు యంగ్ హీరో శ‌ర్వానంద్‌. ట్రాయాంగిల్ ల‌వ్‌స్టోరీగా తెర‌కెక్కిన ఈ మూవీ నిర్మాత‌ల‌కు మంచి లాభాల‌ను తెచ్చిపెట్టింది. ఈ సంక్రాంతి సెంటిమెంట్‌ను మ‌రోసారి కంటిన్యూ చేయ‌బోతున్నాడు. జార్జ్ క్రిష్ సినిమాతో వ‌చ్చే ఏడాది పండుగ బ‌రిలో నిల‌వ‌బోతున్నాడు శ‌ర్వానంద్‌.

బీఆర్ఎస్ ఎమ్మెల్యే...

శ‌ర్వానంద్ హీరోగా శ్రీను వైట్ల డైరెక్ష‌న్‌లో రూపొందుతోన్న జార్జ్ క్రిష్‌ మూవీ శుక్ర‌వారం పూజా కార్య‌క్ర‌మాల‌తో గ్రాండ్‌గా లాంఛ్ అయ్యింది. ఓపెనింగ్ ఈవెంట్‌కు మాజీ మంత్రి, బీఆర్ఎస్ ఎమ్మెల్యే త‌ల‌సాని శ్రీనివాస్ యాద‌వ్ ముఖ్య అతిథిగా హాజ‌ర‌య్యారు. హీరో శ‌ర్వానంద్‌ఫై చిత్రీక‌రించిన తొలి స‌న్నివేశానికి క్లాప్ కొట్టారు.

సంక్రాంతికి రిలీజ్‌...

శ్రీనువైట్ల గ‌త సినిమాల త‌ర‌హాలోనే ఔట్ అండ్ ఔట్ ఎంట‌ర్‌టైన‌ర్‌గా ఈ మూవీ తెర‌కెక్క‌బోతున్న‌ట్లు స‌మాచారం. వినోదంతో పాటు అంత‌ర్లీనంగా ల‌వ్‌, ఫ్యామిలీ ఎమోష‌న్స్‌తో ఉంటాయ‌ని మేక‌ర్స్ వెల్ల‌డించారు. కాగా ఓపెనింగ్ రోజే జార్జ్ క్రిష్ మూవీ రిలీజ్ డేట్‌ను కూడా చెప్పేశారు. సంక్రాంతి కానుక‌గా వ‌చ్చే ఏడాది జ‌న‌వ‌రి 14న ఈ సినిమా విడుద‌ల‌కానున్న‌ట్లు వెల్ల‌డించారు. ఈ వీక్ నుంచి ఈ సినిమా రెగ్యుల‌ర్ షూటింగ్ మొద‌లుకానున్న‌ట్లు స‌మాచారం. ఏకే ఎంట‌ర్‌టైన్‌మెంట్స్ బ్యాన‌ర్‌పై అనిల్ సుంకర జార్జ్ క్రిష్ సినిమాను నిర్మిస్తున్నారు. అనూప్ రూబెన్స్ మ్యూజిక్ అందిస్తున్నారు.

ప్రీతి ముకుంద‌న్

జార్జ్ క్రిష్‌లో శ‌ర్వానంద్‌కు జోడీగా ప్రీతి ముకుంద‌న్‌, భాగ్య‌శ్రీ బోర్సేల‌లో ఒక‌రు హీరోయిన్‌గా న‌టించే అవ‌కాశం ఉంద‌ని అంటున్నారు. త్వ‌ర‌లోనే హీరోయిన్‌ను ఫైన‌ల్ చేయ‌బోతున్న‌ట్లు స‌మాచారం. ప్ర‌స్తుతం జార్జ్ క్రిష్‌తో పాటు భోగి సినిమా చేస్తున్నాడు శ‌ర్వానంద్‌. పీరియాడిక‌ల్ యాక్ష‌న్ థ్రిల్ల‌ర్‌గా తెర‌కెక్కుతోన్న ఈ మూవీలో అనుప‌మ ప‌ర‌మేశ్వ‌ర‌న్‌, డింపుల్ హ‌య‌తి హీరోయిన్లుగా న‌టిస్తున్నారు.