Sai Pallavi | రామాయ‌ణ రిలీజ్ ముంగిట తెలుగు టాక్ షోకు గెస్ట్‌గా సాయిప‌ల్ల‌వి – జయమ్ము నిశ్చయమ్మురా సీజ‌న్ 2 ప్రారంభం

Sai Pallavi |జీ తెలుగు పాపులర్ సెలబ్రిటీ టాక్ షో ‘జయమ్ము నిశ్చయమ్మురా విత్ జగపతి’ సెకండ్‌ సీజన్‌ ప్రారంభం కానుంది. ఈ రెండో సీజ‌న్‌లో ఫ‌స్ట్ ఎపిసోడ్‌కు నాచుర‌ల్ బ్యూటీ సాయి పల్లవి  గెస్ట్ గా హాజ‌రుకానుంది. సహజమైన నటనతో, ప్రత్యేకమైన స్క్రీన్ ప్రెజెన్స్‌తో ద‌క్షిణాదితో పాటు బాలీవుడ్‌ ప్రేక్షకుల అభిమానాన్ని సంపాదించుకున్న సాయి పల్లవి.. ఈ షో గ్రాండ్ లాంఛ్‌ ఎపిసోడ్‌లో సందడి చేయనున్నారు.

అక్కినేని నాగార్జున, శ్రీలీల...

ప్రముఖ నటుడు జగపతిబాబు హోస్ట్‌గా వ్యవహరిస్తున్న ‘జయమ్ము నిశ్చయమ్మురా’ షో తారల వ్యక్తిగత జీవితాల్లోని ఆసక్తికరమైన విషయాలను ప్రేక్షకులకు పరిచయం చేస్తూ తెలుగు ఎంటర్‌టైన్‌మెంట్‌లో తనకంటూ ప్రత్యేక గుర్తింపు తెచ్చుకుంది. తొలి సీజన్‌లో అక్కినేని నాగార్జున, శ్రీలీల వంటి ప్రముఖులు అతిథులుగా ఈ షోలో సంద‌డి చేశారు. హోస్ట్ జగపతిబాబు, సెలబ్రిటీల మధ్య జరిగే సహజమైన సంభాషణలే ఈ షోకు హైలైట్‌గా నిలిచాయి. తమ జీవితాలను మలుపు తిప్పిన అనుభవాలు, ఇప్పటివరకు పెద్దగా బయటకు రాని జ్ఞాపకాలు, తమ ఎదుగుదలలో కీలక పాత్ర పోషించిన వ్యక్తులు, మరచిపోలేని సంఘటనల గురించి సెలబ్రిటీలు మనసు విప్పి మాట్లాడే అవకాశాన్ని ఈ షో కల్పిస్తోంది. అదే పంథాలో సెకండ్ సీజ‌న్ కూడా సాగ‌బోతుంది.

రామాయ‌ణ రిలీజ్ ...

రామాయ‌ణ రిలీజ్‌కు ముందు ‘జయమ్ము నిశ్చయమ్మురా’ షో షోకు సాయిప‌ల్ల‌వి గెస్ట్‌గా హాజ‌రుకానుండ‌టం ఆస‌క్తిక‌రంగా మారింది. ఈ మైథాల‌జీ మూవీలో సీత పాత్ర‌లో క‌నిపించ‌బోతుంది. ఈ షోలో రామాయ‌ణ మూవీ గురించి సాయిప‌ల్ల‌వి ఏం చెబుతుంద‌న్న‌ది అభిమానుల్లో ఉత్కంఠ‌ను రేకెత్తిస్తోంది.తన సినీ ప్రయాణం, త‌న సినీ జీవితం, వ్య‌క్తిగ‌త జీవితం గురించి ఇప్పటివరకు ప్రేక్షకులకు పెద్దగా తెలియని పలు ఆసక్తికరమైన విషయాలను ఈ షోలో వెల్ల‌డించిన‌ట్లు స‌మాచారం.

ప్రోమో ...

ఫ‌స్ట్ ఎపిసోడ్‌కు సంబంధించిన ప్రోమోను రిలీజ్ చేశారు. "మ‌నం ఫ‌స్ట్ టైమ్ క‌లుస్తున్నాం క‌దా"..అని జ‌గ‌ప‌తిబాబు అడ‌గ్గా.."ఇంత‌కుముందు మ‌నం కాల్‌లో మాట్లాడాం "అని సాయిప‌ల్ల‌వి బ‌దులిచ్చింది. అమ్మ న‌మ‌స్కారం ఆ మెమోరీ వ‌ద్దు అని జ‌గ‌ప‌తిబాబు స‌ర‌దాగా చెప్పారు. జ‌గ‌ప‌తిబాబు చూపించిన ఓ ఫొటో చూసి ఓ మై గాడ్ అంటూ సాయిప‌ల్ల‌వి షాక‌య్యింది. అది ఏమిట‌న్న‌ది చూపించ‌లేదు.

‘జయమ్ము నిశ్చయమ్మురా విత్ జగపతి’ రెండో సీజన్ అక్టోబర్ 16 నుంచి జీ5లో స్ట్రీమింగ్ కానుంది. సాయిప‌ల్ల‌వి ఎపిసోడ్ అక్టోబర్ 18న ఆదివారం సాయంత్రం 7:30 గంటలకు జీ తెలుగు టీవీలో ప్రసారం కాబోతుంది.