Ravi Teja | ఇద్ద‌రు హీరోయిన్ల‌తో ర‌వితేజ రొమాన్స్ – క్రైమ్ కామెడీగా ‘తులాభారం’

Ravi Teja |  ఇరుముడితో కెరీర్‌లోనే బిగ్గెస్ట్ బ్లాక్‌బ‌స్ట‌ర్‌ను త‌న ఖాతాలో వేసుకున్నారు మాస్ మాహారాజా ర‌వితేజ‌. శివ‌నిర్వాణ ద‌ర్శ‌క‌త్వంలో రూపొందిన ఈ మూవీ థియేట‌ర్ల‌లో మూడు వంద‌ల కోట్ల‌కుపైగా వ‌సూళ్ల‌ను ద‌క్కించుకుంది. ఇరుముడి త‌ర్వాత ర‌వితేజ త‌దుప‌రి సినిమా ఆదివారం అఫీషియ‌ల్‌గా లాంఛ్ అయ్యింది. క్రైమ్ కామెడీగా తెర‌కెక్కుతోన్న ఈ మూవీకి తులాభారం అనే టైటిల్‌ను ఖ‌రారు చేశారు. వివేక్ ఆత్రేయ ద‌ర్శ‌క‌త్వం వ‌హిస్తున్న ఈ సినిమాలో ర‌వితేజ‌కు జోడీగా ఇద్ద‌రు హీరోయిన్లు క‌నిపించ‌బోతున్నారు. ప్రియాంక మోహ‌న్‌, అన‌స్వ‌ర రాజ‌న్ క‌థానాయిక‌లుగా న‌టిస్తున్నారు. త‌రుణ్ భాస్క‌ర్ , జేడీ చ‌క్ర‌వ‌ర్తి కీల‌క పాత్ర‌లు పోషించ‌నున్నారు.

శ్రీవిష్ణు క్లాప్‌...

తులాభారం ప్రారంభోత్స‌వ వేడుక హైద‌రాబాద్‌లో జ‌రిగింది. ఈ లాంఛింగ్ ఈవెంట్‌లో ర‌వితేజ‌, అన‌స్వ‌ర రాజ‌న్‌ల‌పై చిత్రీక‌రించిన ముహూర్త‌పు స‌న్నివేశానికి హీరో శ్రీవిష్ణు క్లాప్ కొట్టారు. డైరెక్ట‌ర్లు వినాయ‌క్‌, బాబీ, శివ‌నిర్వాణ ఈ ఓపెనింగ్ వేడుక‌లో పాల్గొన్నారు.

క్రైమ్ మ‌హారాజాగా...

ఈ సినిమా టైటిల్‌ను రివీల్ చేస్తూ మేక‌ర్స్ ఓ స్పెష‌ల్ వీడియోను రిలీజ్ చేశారు. ఇందులో క్రైమ్ మ‌హారాజాగా ర‌వితేజ క‌నిపించ‌బోతున్న‌ట్లు వెల్ల‌డించారు. కృష్ణ‌వేణి అనే పాత్ర‌లో ప్రియాంక మోహ‌న్‌, దేవ‌రాజ్‌గా త‌రుణ్ భాస్క‌ర్‌, శివాజీరావుగా జేడీ చ‌క్ర‌వ‌ర్తి న‌టించ‌నున్న‌ట్లు పేర్కొన్నారు. క్రైమ్ కామెడీగా రూపొందుతోన్న ఈ సినిమాలో ర‌వితేజ పాత్ర చిత్ర‌ణ గ‌త సినిమాల‌కు భిన్నంగా చాలా డిఫ‌రెంట్‌గా ఉండ‌నుంద‌ని చెప్పారు.

78వ మూవీ...

తులాభారం సినిమాకు వివేక్ సాగ‌ర్ సంగీతం అందిస్తోండ‌గా...తేజి ఈశ్వ‌ర్ సినిమాటోగ్రాఫ‌ర్‌గా వ్య‌వ‌హ‌రిస్తున్నారు. త్వ‌ర‌లో తులాభారం రెగ్యుల‌ర్ షూటింగ్ ప్రారంభం కాబోతుంది. ర‌వితేజ హీరోగా న‌టిస్తోన్న 78వ మూవీ ఇది. ఈ సినిమాను ల‌క్ష్మ‌ణ్‌, శ్రీనిరావు నిర్మిస్తున్నారు.