Vishnu Priya | సెన్సార్ చిక్కుల్లో రంభ ఊర్వ‌శి మేన‌క – విష్ణుప్రియ‌, రాశీ సింగ్ పాత్ర‌ల‌పై అభ్యంత‌రాలు

Vishnu Priya  అల్ల‌రి న‌రేష్ రంభ ఊర్వ‌శి మేన‌క మూవీ రిలీజ్‌కు ముందే చిక్కుల్లో ప‌డింది. ఈ సినిమాలో విష్ణుప్రియ‌, రాశీసింగ్‌తో పాటు ప్రిషా సింగ్ పాత్ర‌ల‌ను చూపించిన విధానంపై సెన్సార్ నుంచి అభ్యంత‌రాలు వ్య‌క్త‌మైన‌ట్లు స‌మాచారం. సెన్సార్ అడ్డంకుల కార‌ణంగా ఈ సినిమా రిలీజ్‌పై అనుమానాలు వ్య‌క్త‌మ‌వుతోన్నాయి. సెప్టెంబ‌ర్ 4న విడుద‌ల కావాల్సిన రంభ ఊర్వ‌శి మేన‌క వాయిదాప‌డే అవ‌కాశం ఉంద‌ని అంటున్నారు.

ఇంద్ర‌లోకం...

సోషియో ఫాంట‌సీ ఎంట‌ర్‌టైన‌ర్‌గా తెర‌కెక్కుతోన్న రంభ ఊర్వ‌శి మేన‌క సినిమాకు చంద్ర‌మోహ‌న్ చింతాడ ద‌ర్శ‌క‌త్వం వ‌హించారు. అల్ల‌రి న‌రేష్ హీరోగా న‌టించిన ఈ సినిమాలో సుర‌భి హీరోయిన్‌గా న‌టించింది. ఓ యువ‌కుడి కోసం ఇంద్ర‌లోకం నుంచి భూమిపైకి రంభ ఊర్వ‌శి మేన‌క దిగివ‌స్తారు? ఆ త‌ర్వాత ఎదురైన ప‌రిణామాల‌తో ఫ‌న్ ఎంట‌ర్‌టైన‌ర్‌గా ద‌ర్శ‌కుడు ఈ సినిమాను తెర‌కెక్కించారు.

అప్స‌ర‌స‌లు...

ఈ సినిమాలో రంభ‌గా రాశీసింగ్‌, ఊర్వ‌శిగా విష్ణుప్రియ‌, మేన‌క‌గా ప్రిషా సింగ్ క‌నిపించ‌బోతున్నారు. అప్స‌ర‌స‌లుగా పురాణాలు పేర్కొన్న రంభ ఊర్వ‌శి మేన‌క‌ల‌ను అభ్యంత‌క‌ర‌కరంగా సినిమాలో చూపించారంటూ సెన్సార్ స‌భ్యులు పేర్కొన్న‌ట్లు స‌మాచారం. వారి పాత్ర‌ల‌కు సంబంధించిన డైలాగ్స్ విష‌యంలో చాలానే మార్పులు సూచించిన‌ట్లు చెబుతున్నారు.

లాంగ్ గ్యాప్ త‌ర్వాత‌...

సెన్సార్ అభ్యంత‌రాల‌పై మేక‌ర్స్ రివైజింగ్ క‌మిటీకి వెళ్లిన‌ట్లు చెబుతున్నారు. సోమ‌వారం సెన్సార్ స‌ర్టిఫికెట్‌పై క్లారిటీ రానున్న‌ట్లు తెలిసింది. లాంగ్ గ్యాప్ త‌ర్వాత ఔట్ అండ్ ఔట్ ఎంట‌ర్‌టైన్‌మెంట్ క‌థాంశంతో అల్ల‌రి న‌రేష్ చేసిన సినిమా ఇది. అన్న‌పూర్ణ స్టూడియోస్‌తో క‌లిసి రాజేష్ దండా ఈ సినిమాను నిర్మించారు.