Ram Charan | రామ్‌చ‌ర‌ణ్ హెల్త్‌ అప్‌డేట్ – స‌ర్జ‌రీ కోసం అమెరికా నుంచి స్పెష‌ల్ డాక్ట‌ర్‌

Ram Charan |  పెద్ది షూటింగ్‌లో గాయ‌ప‌డ్డ రామ్‌చ‌ర‌ణ్‌కు సోమ‌వారం స‌ర్జ‌రీ జ‌రిగింది. కోయంబ‌త్తూరులోని గంగా హాస్పిట‌ల్‌లో ఈ స‌ర్జ‌రీ స‌క్సెస్‌ఫుల్‌గా నిర్వ‌హించారు. పెద్ది మూవీలో రెజ్లింగ్ సీన్లు చిత్రీక‌రిస్తోండ‌గా రామ్‌చ‌ర‌ణ్ కుడి చేతి మ‌ణిక‌ట్టుకు గాయ‌మైంది. ఈ గాయంతోనే పెద్ది ప్ర‌మోష‌న్స్‌లో చ‌ర‌ణ్ పాల్గొన్నాడు.

గంగా హాస్పిట‌ల్‌...

ప్ర‌ముఖ‌ ఆర్థోపెడిక్ సర్జన్ డాక్టర్ ఎస్. రాజశేఖరన్ ఆధ్వ‌ర్యంలో రామ్ చ‌ర‌ణ్ మ‌ణిక‌ట్టు గాయానికి సోమ‌వారం కోయంబ‌త్తూరులోని గంగా హాస్పిట‌ల్‌లో స‌ర్జ‌రీ జ‌రిగింది. స‌ర్జ‌న్‌గా రాజ‌శేఖ‌ర‌న్‌కు ఎన్నో దశాబ్దాల అనుభవం ఉంది. జాతీయ, అంతర్జాతీయ స్థాయిలో అనేక పురస్కారాలు అందుకున్నారు. డాక్టర్ రాజశేఖరన్ గతంలో చిరంజీవికి వెన్నెముక స‌ర్జ‌రీ చేశారు.

అమెరికా నుంచి...

రామ్‌చ‌ర‌ణ్ మ‌ణిక‌ట్టు స‌ర్జ‌రీ కోస‌మే అమెరికా నుంచి ఓ స్పెష‌ల్ డాక్ట‌ర్‌ను కోయంబ‌త్తూరుకు ర‌ప్పించారు. మియామి చెందిన హ్యాండ్ అండ్ రిస్ట్ స‌ర్జ‌న్ అటెహండ్రో బాడియా ఈ స‌ర్జ‌రీలో పాల్గొన్నారు ఎంతో మంది ప్ర‌ముఖ క్రీడాకారుల‌కు ఆయ‌న ట్రీట్‌మెంట్ ఇచ్చారు. రాజశేఖరన్, అలెహాండ్రో బాడియా, ప్రవీణ్ భరద్వాజ తో పాటు మ‌రికొంద‌రు వైద్యుల బృందం క‌లిసి రామ్‌చ‌ర‌ణ్ స‌ర్జ‌రీని స‌క్సెస్‌ఫుల్‌గా పూర్తిచేశారు. నాలుగు రోజుల విశ్రాంతి అనంతరం హైదరాబాద్‌కు రామ్‌చ‌ర‌ణ్ తిరిగి వచ్చే అవకాశం ఉందని సమాచారం. ఆరు నుంచి ఎనిమిది వారాల పాటు పూర్తిగా విశ్రాంతి తీసుకోవాల‌ని డాక్ట‌ర్లు వెల్ల‌డించిన‌ట్లు తెలిసింది.

సుకుమార్‌తో...

రామ్‌చ‌ర‌ణ్‌తో పాటు చిరంజీవి, సురేఖ, ఉపాసన కోయంబత్తూరుకు వెళ్లారు. చరణ్‌కు తోడుగా ఉన్నారు. పెద్ది త‌ర్వాత డైరెక్ట‌ర్ సుకుమార్‌తో రామ్‌చ‌ర‌ణ్ సినిమా చేయ‌బోతున్నాడు. స్టైలిష్ యాక్ష‌న్ ఎంట‌ర్‌టైన‌ర్‌గా తెర‌కెక్కుతోన్న ఈ మూవీ న‌వంబ‌ర్ నుంచి సెట్స్‌పైకి రాబోతుంది.