Radhika Apte | మొన్న జాన్వీ క‌పూర్‌… నేడు రాధిక ఆప్టే – టాలీవుడ్‌పై బాలీవుడ్ హీరోయిన్ విమ‌ర్శ‌లు

Radhika Apte | ఇటీవ‌ల కాఫీ విత్ క‌ర‌ణ్ షోలో టాలీవుడ్ ఇండ‌స్ట్రీపై జాన్వీక‌పూర్ చేసిన వ్యాఖ్య‌లు చ‌ర్చ‌నీయాంశ‌మ‌య్యాయి. హీరోయిన్ల‌కు తెలుగు ద‌ర్శ‌కులు పూర్తి క‌థ‌ల‌ను వినిపించ‌ర‌ని, షూటింగ్‌లో కెమెరా యాంగిల్స్ ఎక్క‌డ ఎలా పెడ‌తారో కూడాచెప్ప‌ర‌ని అన్న‌ది. తెలుగు సినిమాల్లో ద‌ర్శ‌కులు చెప్పిన‌ట్లు చేయాల్సిందేనంటూ వ్యాఖ్య‌లు చేసింది. ఆమె కామెంట్ల‌పై పెద్ద దుమార‌మే రేగింది. ఈ వివాదం మ‌రువ‌క ముందే మ‌రో బాలీవుడ్ హీరోయిన్ రాధికా ఆప్టే కూడా టాలీవుడ్‌పై విమ‌ర్శ‌లు గుప్పించింది.

అక్క వెబ్‌సిరీస్‌...

రాధిక ఆప్టే ప్ర‌ధాన పాత్ర‌లో న‌టించిన అక్క వెబ్‌సిరీస్ ఇటీవ‌ల నెట్‌ఫ్లిక్స్‌లో రిలీజైంది. ఈ వెబ్‌సిరీస్‌లో రాధిక ఆప్టేతో పాటు కీర్తి సురేష్ మ‌రో లీడ్ రోల్ చేసింది. ఈ వెబ్‌సిరీస్ ప్ర‌మోష‌న్స్‌లో భాగంగా గ‌తంలో తెలుగు ఇండ‌స్ట్రీలో త‌న‌కు ఎదురైన చేదు అనుభ‌వాల‌పై రాధిక ఆప్టే రియాక్ట్ అయ్యింది. ఓ సినిమాలో త‌న‌కంటే వ‌య‌సులో చాలా పెద్ద‌వాడైన న‌టుడితో రొమాన్స్ చేయాల్సివ‌చ్చింద‌ని , పురుషాధిక్య‌త‌తో కూడిన ఆ మూవీలో చాలా క‌ష్టంగా న‌టించాన‌ని అన్న‌ది.

సొంత మేన‌మామ‌నే...

"ఆ సినిమాలో క‌థానుగుణంగా నేను సొంత మేన‌మామ‌నే పెళ్లిచేసుకోవాల్సివ‌స్తుంది. పైగా హీరో నా కంటే వ‌య‌సులో చాలా పెద్ద‌వాడు. అత‌డితో రొమాంటిక్ సీన్ల‌లో న‌టించ‌డం చాలా క‌ష్ట‌మైంది. పురుషాధిక్య‌త‌ను ప్రోత్స‌హించేలా క‌థ సాగ‌డం, హీరోయిన్ల‌కు ఏ మాత్రం ఇంపార్టెన్స్ లేక‌పోవ‌డంతో చాలా ఇబ్బందులు ప‌డుతూ అయిష్టంగానే సినిమాను పూర్తిచేశా. ఆ సినిమాలో నా పాత్ర‌ను చ‌నిపోయిన‌ట్లు చూపించి మ‌ధ్య‌లోనే ముగించారు. అదే మంచిద‌ని అనుకున్నా. నా కెరీర్‌లో చాలా అస‌హ్యంగా ఫీలైన పాత్ర అంటే అదే" అంటూ సెటైరిక‌ల్‌గా కామెంట్లు చేసింది. ఆ సినిమాతో పాటు హీరో పేరును మాత్రం చెప్ప‌లేదు.

బాలీవుడ్ బ్యూటీపై విమ‌ర్శ‌లు

బాల‌కృష్ణ లెజెండ్ సినిమాను ఉద్దేశించే రాధికా ఆప్టే ఈ కామెంట్లు చేసింద‌ని నెటిజ‌న్లు అంటున్నారు. ఈ బాలీవుడ్ బ్యూటీపై విమ‌ర్శ‌లు గుప్పిస్తున్నారు. పేరు, గుర్తింపు కోసం తెలుగులో సినిమాలు చేయ‌డం, అవ‌స‌రం తీరిన త‌ర్వాత టాలీవుడ్‌ను ట్రోల్ చేయ‌డం ప్యాష‌న్‌గా మారిపోయిందంటూ ట్రోల్ చేస్తున్నారు. . బాలీవుడ్‌లో చేసిన బోల్డ్ పాత్ర‌ల‌తో పోలిస్తే తెలుగు ద‌ర్శ‌కులు రాధిక ఆప్టేను ప‌ద్ద‌తిగా చూపించార‌ని అంటున్నారు. జాన్వీక‌పూర్‌, రాధిక ఆప్టేల‌కు తెలుగు ద‌ర్శ‌కులు అవ‌కాశాలు ఇవ్వొద్ద‌ని కామెంట్లు పెడుతోన్నారు.