Prakash Raj | ధురంధ‌ర్ 2పై ప్ర‌శంస‌లు – టాలీవుడ్ హీరోల‌ను ఏకిప‌డేసిన ప్ర‌కాష్ రాజ్

Prakash Raj |  ర‌ణ‌వీర్‌సింగ్ హీరోగా న‌టించిన బాలీవుడ్ మూవీ ధురంధ‌ర్ 2 బాక్సాఫీస్‌ను షేక్ చేస్తోంది. హిందీ ఇండ‌స్ట్రీ గ‌త రికార్డుల‌న్నింటిని ఈ సినిమా తుడిచిపెట్టేసింది. ధురంధ‌ర్ 2 మేనియా నార్త్‌నే కాకుండా సౌత్‌ను ఊపేస్తోంది. ద‌క్షిణాది ఆడియెన్స్‌ను సైతం ఈ మూవీ మెప్పిస్తోంది. స‌గ‌టు సినీ అభిమానులే కాకుండా స్టార్ హీరోలు, దిగ్గ‌జ ద‌ర్శ‌కులు సైతం ధురంధ‌ర్ 2 అద్భుత‌మంటూ ప్ర‌శంస‌లు కురిపిస్తోన్నారు. ఈ సినిమాపై అదే స్థాయిలో విమ‌ర్శ‌లు కూడా వ‌స్తోన్నాయి. ఇదొక ప్రొప‌గండా మూవీ అంటూ కొంద‌రు కామెంట్లు పెడుతోన్నారు.

ప్ర‌కాష్ రాజ్ ట్వీట్స్‌...

ధురంధ‌ర్ 2 మూవీపై టాలీవుడ్ విల‌క్ష‌ణ న‌టుడు ప్ర‌కాష్ రాజ్ చేసిన వ‌రుస ట్వీట్స్ చ‌ర్చ‌నీయాంశంగా మారాయి. ఈ బాలీవుడ్ మూవీపైనే కాకుండా ఈ సినిమాను ప్ర‌శంసించిన టాలీవుడ్ హీరోల‌పై ప్ర‌కాష్ రాజ్ విమ‌ర్శ‌లు గుప్పించారు.

ధురంధ‌ర్‌కు దూరం...

ప్రకాష్ రాజ్ తన ట్విట్ట‌ర్‌లో 1961 నాటి క్లాసిక్ సాంగ్ "అభీ నా జావో చోడ్ కర్" వీడియోను షేర్ చేశారు. ఈ వీడియోకు . "నేను ధురంధర్ సినిమాకు దూరంగా ఉన్నాను . మరి మీరు?" అంటూ క్యాప్షన్ ఇచ్చారు. ఈ మూవీ చూడొద్దంటూ ఇన్‌డైరెక్ట్‌గా ప్ర‌కాష్ రాజ్ ఈ ట్వీట్ ద్వారా పేర్కొన్నారు. మ‌రో ట్వీట్‌లో టాలీవుడ్ హీరోల‌ను ఏకిప‌డేశాడు ప్ర‌కాష్ రాజ్‌. ధురంధ‌ర్ 2ను ప్ర‌శంసిస్తూ అల్లు అర్జున్, రామ్ చరణ్, జూనియర్ ఎన్టీఆర్, మహేష్ బాబు, విజయ్ దేవరకొండ సోష‌ల్ మీడియాలో పోస్టులు పెట్టారు.

మొహ‌మాటాలు...

వారి ట్వీట్స్‌పై ప్ర‌కాష్ రాజ్ సెటైరిక‌ల్ రియాక్ట్ అయ్యారు. "కృతజ్ఞత తీర్చుకోవాల్సిన అవ‌స‌రాలు ఇప్పుడు ద‌క్షిణాదికి పాకుతున్నాయి" అంటూ విమ‌ర్శించారు. రాజ‌కీయ ఒత్తిళ్లు, మొహ‌మాటం, ఇత‌ర అవ‌స‌రాలను దృష్టిలో పెట్టుకొని ధురంధ‌ర్ 2ను టాలీవుడ్ హీరోలు పొగ‌డ‌క త‌ప్ప‌డం లేదంటూ ప్ర‌కాష్ రాజ్ ఇన్‌డైరెక్ట్‌గా తెలుగు హీరోల‌పై సెటైర్లు వేశాడ‌ని నెటిజ‌న్లు అంటున్నారు.

బాలీవుడ్ హీరోలు...

ప్ర‌కాష్ రాజ్ మాత్ర‌మే కాకుండా నెటిజ‌న్లు కూడా తెలుగు హీరోల‌ను ట్రోల్ చేస్తున్నారు. స‌ల్మాన్ ఖాన్‌, షారుఖ్‌ఖాన్‌తో పాటు ఇత‌ర బాలీవుడ్ హీరో కూడా ధురంధ‌ర్ 2ను మెచ్చుకుంటూ ట్వీట్స్ వేయ‌లేద‌ని, అలాంట‌ప్పుడు తెలుగు హీరోలు పోటీప‌డి ప్ర‌శంస‌లు కురిపించ‌డం అవ‌స‌ర‌మా అంటూ విమ‌ర్శిస్తున్నారు. యూట్యూబ‌ర్ ధ్రువ్ రాఠీ కూడా ధురంధ‌ర్ 2 ప్రొప‌గండా మూవీ అని కామెంట్లు చేశాడు. ఓ రాజ‌కీయ పార్టీకి అనుకూలంగా ఆదిత్య ధ‌ర్ ఈ సినిమా తీశాడంటూ అత‌డు చేసిన వ్యాఖ్య‌లు వైర‌ల్ అయ్యాయి.