Hero Arya | త‌మిళ హీరో ఆర్య‌పై హైద‌రాబాద్‌లో చీటింగ్ కేసు

Hero Aarya |  త‌మిళ హీరో ఆర్య చిక్కుల్లో ప‌డ్డాడు. అత‌డిపై సినిమా షూటింగ్‌ల‌కు కెమెరాల‌తో పాటు లైటింగ్ ఎక్విప్‌మెంట్‌ల‌ను అద్దెకు ఇచ్చే హైద‌రాబాద్‌కు చెందిన ఓ సంస్థ చీటింగ్ కేసు పెట్టింది. ఆర్య ప్ర‌ధాన పాత్ర‌లో అనంత‌న్ కాడు పేరుతో ఓ మ‌ల‌యాళ మూవీ రూపొందింది. ఈ సినిమా షూటింగ్ కోసం తాహెర్ స్టూడియో నుంచి మేక‌ర్స్ హై ఎండ్ డిజిట‌ల్ కెమెరాలు, అడ్వాన్స్ లైటింగ్ ఎక్విప్‌మెంట్‌ల‌ను రెంట్‌కు తీసుకున్నారు. అనంత‌న్ కాడు మూవీ జూన్‌లోనే రిలీజైంది. అయినా ఆర్య అండ్ టీమ్ మాత్రం తాహెర్ స్టూడియోకు ఇవ్వాల్సిన కోటి ఎన‌భై ల‌క్ష‌ల రెంట్ డ‌బ్బులు చెల్లించ‌లేద‌ట‌. కెమెరా, లైటింగ్ ఎక్విప్‌మెంట్ రెంట్ డ‌బ్బులు అడిగినందుకు ఆర్య‌తో పాటు చిత్ర‌బృందం త‌మ‌తో దురుసుగా ప్ర‌వ‌ర్తించ‌డ‌మే కాకుండా బెదిరింపుల‌కు పాల్ప‌డిన‌ట్లు తాహెర్ స్టూడియో ప్ర‌తినిధులు జూబ్లీహిల్స్ పోలీస్ స్టేష‌న్‌లో ఫిర్యాదు చేశారు. ఈ కంప్లైంట్‌ను స్వీక‌రించిన పోలీసులు ఆర్య‌తో పాటు అనంత‌న్ కాడు నిర్మాత వినోద్‌, అసిస్టెంట్ కిషోర్‌ల‌పై కేసు న‌మోదు చేసిన‌ట్లు స‌మాచారం.

అల్లు అర్జున్ వ‌రుడులో....

త‌మిళంలో హీరోగా ప‌లు సినిమాలు చేసిన ఆర్య తెలుగు ప్రేక్ష‌కుల‌కు సుప‌రిచితుడే. అత‌డు హీరోగా న‌టించిన ప‌లు త‌మిళ సినిమాలు నేనే అంబానీ, వాడు వీడు, స‌ర్వం లాంటి టైటిల్స్‌తో రిలీజ‌య్యాయి. అల్లు అర్జున్ వ‌రుడు మూవీలో విల‌న్‌గా ఆర్య న‌టించాడు. వెంక‌టేష్ సైంధ‌వ్‌తో పాటు మ‌రికొన్ని తెలుగు స్ట్రెయిట్ సినిమాల్లోనూ న‌టించాడు. 2021లో వ‌చ్చిన స‌ర్ప‌ట్ట ప‌రంబ‌రై త‌ర్వాత హీరోగా ఆర్య‌కు త‌మిళంలో స‌రైన హిట్టు లేదు.