Nara Rohith | నారా రోహిత్ ట్రిపుల్ ట్రీట్ – హీరోగా… విలన్‌గా… స‌ర్‌ప్రైజ్‌

Nara Rohith |  బ‌ర్త్‌డే సంద‌ర్భంగా నారా రోహిత్ అభిమానుల‌కు ట్రిపుల్ ట్రీట్ ఇచ్చాడు. హీరోగా న‌టిస్తున్న సినిమాలతో పాటు విల‌న్‌గా చేస్తోన్న సినిమాకు సంబంధించిన లుక్‌ను రిలీజ్ చేశాడు. 2018లో వ‌చ్చిన వీర‌భోగ‌వసంత‌రాయ‌లు త‌ర్వాత సినిమాల‌కు ఆరేళ్లు గ్యాప్ తీసుకున్న నారా రోహిత్ ప్ర‌తినిధి 2తో రీఎంట్రీ ఇచ్చాడు. ఆ త‌ర్వాత భైర‌వం, సుంద‌ర‌కాండ సినిమాలు చేశాడు. హీరోగా సినిమాలు చేస్తూనే మ‌రోవైపు విల‌న్ పాత్ర‌కు కూడా ఓకే చెప్పాడు.

హార‌ర్ మూవీ...

బ‌ర్త్‌డే సంద‌ర్భంగా త‌న కొత్త సినిమాల తాలూకు అప్‌డేట్స్‌ను శ‌నివారం సోష‌ల్ మీడియా ద్వారా అభిమానుల‌తో పంచుకున్నాడు నారా రోహిత్  . ప్ర‌స్తుతం హీరోగా క‌పాలితో పాటు సౌండ్ ఇంజినీర్ అనే సినిమాలు చేస్తున్నాడు. ఈ రెండు సినిమాల ఫ‌స్ట్ లుక్‌ల‌ను మేక‌ర్స్ రిలీజ్ చేశారు. కాపాలి మూవీ హార‌ర్ క‌థాంశంతో రూపొందుతోంది. రామ్ గ‌న్నీ ఈ సినిమాకు ద‌ర్శ‌క‌త్వం వ‌హిస్తున్నారు. హార‌ర్ క‌థ‌తో నారా రోహిత్ చేస్తోన్న ఫ‌స్ట్ మూవీ ఇది.

సౌండ్ ఇంజినీర్‌...

నారా రోహిత్‌, న‌య‌న్ సారిక జంట‌గా న‌టిస్తున్న ఓ రొమాంటిక్ ఎంట‌ర్‌టైన‌ర్ మూవీ ఇటీవ‌ల లాంఛ్ అయ్యింది. ఈ సినిమాకు సౌండ్ ఇంజినీర్ అనే టైటిల్‌ను ఖ‌రారు చేశారు. మ‌ణికుమార్ ద‌ర్శ‌క‌త్వం వ‌హిస్తున్న ఈ సినిమాలో న‌రేష్, రోహిణి కీల‌క పాత్ర‌ల్లో న‌టిస్తున్నారు. ఈ సినిమాలో నారా రోహిత్ చెవిటిత‌నంతో బాధ‌ప‌డే యువ‌కుడిగా క‌నిపించ‌బోతున్న‌ట్లు ప్ర‌చారం జ‌రుగుతోంది.

వెంక‌టేష్ సినిమాలో విల‌న్‌గా...

వెంక‌టేష్ హీరోగా త్రివిక్ర‌మ్ ద‌ర్శ‌క‌త్వంలో రూపొందుతోన్న ఆద‌ర్శ‌కుటుంబం సినిమాలో నారా రోహిత్ ఓ కీల‌క పాత్ర‌లో న‌టిస్తున్నాడు. నారా రోహిత్ బ‌ర్త్‌డే సంద‌ర్భంగా అత‌డి ఫ‌స్ట్ లుక్‌ను రిలీజ్ చేశారు. ఈ పోస్ట‌ర్‌లో పోలీస్ ఆఫీస‌ర్‌గా ఇంటెన్స్ లుక్‌లో నారా రోహిత్ క‌నిపిస్తోన్నాడు. ఆద‌ర్శ‌కుటుంబంలో నారా రోహిత్ పాత్ర నెగెటివ్ షేడ్స్‌లో సాగ‌నున్న‌ట్లు స‌మాచారం. శ్రీనిధి శెట్టి హీరోయిన్‌గా న‌టిస్తున్న ఈ సినిమాలో నివేదా పేతురాజ్ ఓ స్పెష‌ల్ సాంగ్ చేస్తోంది. ద‌స‌రాకు ఈ సినిమా ప్రేక్ష‌కుల ముందుకు రాబోతుంది.