Nitesh Tiwari Ramayana | రావణుడి సింహాసనానికి రూ.కోటి.. శూర్పణఖ రథానికి రూ.1.5 కోట్లు: కళ్లు చెదిరేలా ‘రామాయణ’ సెట్స్ విశేషాలు

Nitesh Tiwari Ramayana | త్రినేత్ర న్యూస్ : బాలీవుడ్ దర్శకుడు నితీష్ తివారీ అత్యంత ప్రతిష్టాత్మకంగా తెరకెక్కించిన మైథలాజికల్ మూవీ 'రామాయణ: రైజ్ ఆఫ్ ఏ లెజెండ్' (Ramayana: Rise of a Legend). ఈ భారీ ప్రాజెక్ట్ కోసం కేవలం గ్రీన్ స్క్రీన్, గ్రాఫిక్స్‌పైనే ఆధారపడకుండా కళ్ల ముందే నిజమైన రామాయణ ప్రపంచాన్ని సృష్టించారు. ముంబై ఫిల్మ్ సిటీలోని ప్రైమ్ ఫోకస్ స్టూడియోస్‌లో 2024 ఏప్రిల్ నుంచి నెలల తరబడి శ్రమించి ఏకంగా 150కి పైగా భారీ సెట్స్ నిర్మించినట్లు చిత్ర ఆర్ట్ డైరెక్టర్ రమేష్ తాజాగా వెల్లడించారు.

24 క్యారెట్ల బంగారు పూతతో రూ.కోటి విలువైన రావణుడి సింహాసనం

ఈ సినిమా కోసం తయారు చేసిన అత్యంత ఖరీదైన ఆకర్షణల్లో లంకాధిపతి రావణుడి సింహాసనం ప్రధానమైనది. దీనిని నిర్మించేందుకు ఆర్ట్ డిపార్ట్‌మెంట్‌కు దాదాపు 4 నెలల సమయం పట్టింది. సుమారు రూ. 1 కోటి వ్యయంతో రూపొందించిన ఈ సింహాసనానికి ముందుగా బంకమట్టితో బేస్ తయారు చేసి, ఆ తర్వాత ఫైబర్‌తో మౌల్డింగ్ చేశారు. తెరపై రాజసం ఉట్టిపడేలా దీనిపై 24 క్యారెట్ల గోల్డ్ లీఫింగ్ (బంగారు పూత) వేయడం విశేషం. నటీనటులు డిజిటల్ బ్యాక్‌గ్రౌండ్‌లో కాకుండా సహజమైన వాతావరణంలో లీనమై నటించేలా ప్రతి సెట్‌ను 10 నుంచి 15 సార్లు డిజైన్ మార్పులు చేసిన తర్వాతే ఫైనల్ చేశారు.

శూర్పణఖ రథానికి రూ. 1.5 కోట్లు.. 24 అడుగుల జటాయువు

రావణుడి సింహాసనం కంటే శూర్పణఖ రథం కోసం మేకర్స్ ఇంకా ఎక్కువ ఖర్చు చేశారు. కేవలం బ్యాక్‌గ్రౌండ్‌లో నిలబెట్టే డెకరేటివ్ ప్రాపర్టీలా కాకుండా, షూటింగ్ సమయంలో నిజంగానే నడిచేలా (Functional) ఈ రథాన్ని డిజైన్ చేశారు. 3 నెలల పాటు శ్రమించి నిర్మించిన ఈ రథం ఖర్చు అక్షరాలా రూ. 1.5 కోట్లు. ఇక విజువల్ ఎఫెక్ట్స్ (VFX) సీన్లలో నటీనటులు డైలాగులు చెప్పేటప్పుడు వారి కంటి చూపు (Eye-line) కచ్చితంగా ఉండేందుకు 24 అడుగుల ఎత్తైన జటాయువు అస్థిపంజరం నమూనాను కూడా సెట్‌లో నిర్మించారు. దీనివల్ల ఖాళీ ప్రదేశంలో కాకుండా నేరుగా జటాయువును చూస్తున్నట్లే నటించడం ఆర్టిస్టులకు సులభమైంది.

స్టూడియోలో పట్టని 50 అడుగుల పుష్పక విమానం

పుష్పక విమానం సెట్ వేయడం చిత్ర యూనిట్‌కు మరో పెద్ద సవాలుగా మారింది. దాదాపు 50 అడుగుల వెడల్పు ఉండే ఈ భారీ విమానాన్ని స్టూడియో లోపల ఒకే భాగంగా నిర్మించడం సాధ్యం కాలేదు. దీంతో దీనిని నాలుగు వేర్వేరు మాడ్యూల్స్‌గా విభజించి 40 నుంచి 50 రోజుల్లో పూర్తి చేశారు. ఈ పుష్పక విమానం కాన్సెప్ట్ కోసం దర్శకుడు నితీష్ తివారీ ఏకంగా ఆరేళ్ల పాటు కసరత్తు చేయడం గమనార్హం.

లంక నిర్మాణంలో 600 మంది కార్మికులు

రావణుడి లంక సెట్ నిర్మాణం కోసం ఏకకాలంలో 500 నుంచి 600 మంది కార్మికులు పనిచేశారు. కొన్ని భారీ క్రౌడ్ సీన్లలో 1,000 మంది డ్యాన్సర్లు, జూనియర్ ఆర్టిస్టులు పాల్గొనేలా, కెమెరా పరికరాలు సులువుగా కదిలేలా విశాలమైన సెట్స్ వేశారు.

ప్రతి సెట్‌ను స్వయంగా తనిఖీ చేసిన నితీష్ తివారీ

ప్రొడక్షన్ డిజైనింగ్‌లో దర్శకుడు నితీష్ తివారీ స్వయంగా పాలుపంచుకున్నారు. షూటింగ్‌కు నాలుగు రోజుల ముందే స్టోరీబోర్డ్, కాన్సెప్ట్ ఆర్ట్‌ను సమీక్షించే ఆయన.. షూటింగ్ ప్రారంభానికి ఒక రోజు ముందు స్వయంగా ప్రతి సెట్‌ను తనిఖీ చేసేవారని, మొత్తం 150కి పైగా సెట్స్ విషయంలోనూ ఇదే నిబద్ధత పాటించారని ఆర్ట్ డైరెక్టర్ రమేష్ తెలిపారు.