Guduru Laxmi Narasimha Reddy | పట్టభద్రుల గొంతుకగా అసెంబ్లీలో పోరాడే అవకాశం ఇవ్వండి

• కేటీఆర్‌ను కోరిన గూడూరు లక్ష్మీ నర్సింహ రెడ్డి

Guduru Laxmi Narasimha Reddy | త్రినేత్ర న్యూస్ : మహబూబ్‌నగర్–రంగారెడ్డి–హైదరాబాద్ పట్టభద్రుల ఎమ్మెల్సీ నియోజకవర్గ బీఆర్ఎస్ పార్టీ అభ్యర్థిత్వంపై రాజకీయ వర్గాల్లో చర్చ జోరుగా సాగుతోంది. ఇందులో భాగంగా తెలంగాణ భవన్‌లో బీఆర్ఎస్ వర్కింగ్ ప్రెసిడెంట్ కేటీఆర్‌ను ఆ పార్టీ రాష్ట్ర మీడియా ప్యానలిస్టు గూడూరు లక్ష్మీ నర్సింహ రెడ్డి మంగళవారం మర్యాదపూర్వకంగా కలిశారు. ఈ సందర్భంగా పట్టభద్రుల ఎమ్మెల్సీ స్థానానికి సంబంధించి పార్టీ తరఫున తనకు అవకాశం కల్పించాలని ఆయన విజ్ఞప్తి చేశారు.

ఉద్యమ అనుభవం, సేవా దృక్పథం గుర్తింపు కోసం విజ్ఞప్తి

తెలంగాణ ఉద్యమ కాలం నుంచి తాను పార్టీలో క్రియాశీలకంగా పనిచేస్తున్నానని లక్ష్మీ నర్సింహ రెడ్డి ఈ సందర్భంగా కేటీఆర్‌కు వివరించారు. ఉమ్మడి రాష్ట్రంతో పాటు ప్రత్యేక తెలంగాణ ఉద్యమంలో తన వంతు పాత్ర పోషించానని, సర్పంచిగా, సర్పంచుల సంఘం రాష్ట్ర మాజీ అధ్యక్షుడిగా గ్రామీణ స్థాయి నుంచి ప్రజలతో మమేకమైన అనుభవం తనకు ఉందని తెలిపారు. ప్రస్తుతం బీఆర్ఎస్ రాష్ట్ర మీడియా ప్యానలిస్టుగా పార్టీ వాణిని, ప్రభుత్వ వైఫల్యాలను ప్రజల్లోకి బలంగా తీసుకువెళ్తున్నానని గుర్తుచేశారు.

నిరుద్యోగులు, పట్టభద్రుల సమస్యలపై గళం విప్పుతా

ప్రస్తుతం పట్టభద్రులు, నిరుద్యోగ యువత అనేక ఇబ్బందులను ఎదుర్కొంటున్నారని, ప్రభుత్వ ఉద్యోగాల భర్తీలో ఉన్న లోపాలు, విద్యావంతుల హక్కుల పరిరక్షణే ధ్యేయంగా మండలిలో పోరాడతానని లక్ష్మీ నర్సింహ రెడ్డి స్పష్టం చేశారు. పార్టీ నాయకత్వం తన సుదీర్ఘ రాజకీయ, సామాజిక ప్రయాణాన్ని గుర్తించి ఎమ్మెల్సీ బరిలో నిలిచే అవకాశం ఇస్తే.. పట్టభద్రుల సమస్యలపై నిత్యం గళం వినిపిస్తానని, పార్టీ బలోపేతానికి శాయశక్తుల కృషి చేస్తానని ఆయన ఆశాభావం వ్యక్తం చేశారు.