Mla Raja Singh | అశ్లీల‌త‌, అస‌భ్యత త‌ప్ప క‌థ లేదు – య‌శ్ టాక్సిక్‌పై ఎమ్మెల్యే రాజా సింగ్ కామెంట్స్‌

Mla Raja Singh |   య‌శ్ టాక్సిక్ మూవీపై గోషామ‌హ‌ల్ ఎమ్మెల్యే రాజాసింగ్ ఆస‌క్తిక‌ర కామెంట్లు చేశారు. య‌శ్ హీరోగా గీతూ మోహ‌న్ దాస్ ద‌ర్శ‌క‌త్వంలో రూపొందిన ఈ సినిమా ఇటీవ‌లే థియేట‌ర్ల‌లో రిలీజైంది.ఇందులో హింస‌, ర‌క్త‌పాతం ఎక్కువ‌గా ఉందంటూ విమ‌ర్శ‌లు వ్య‌క్త‌మ‌వుతోన్నాయి. తాజాగా టాక్సిక్‌పై ఎమ్మెల్యే రాజా సింగ్ సంచ‌ల‌న వ్యాఖ్య‌లు చేశారు. సినిమాలో విచ్చ‌ల‌విడిగా డ్ర‌గ్స్ వినియోగం, మితిమీరిన వ‌య‌లెన్స్‌తో పాటు మ‌హిళ‌ల‌ను అస‌భ్యంగా చూపించార‌ని అన్నాడు. "టాక్సిక్ మొత్తం అశ్లీల‌త‌తో నిండిపోయింది. సినిమాలు స‌మాజానికి మంచి మెసేజ్‌ను ఇచ్చేలా ఉండాలి. కానీ టాక్సిక్ చాలా అస‌భ్యంగా ఉంది. మ‌హిళ‌ల వ్య‌క్తిత్వాన్ని కించ‌ప‌రిచేలా క‌థ‌, స‌న్నివేశాలు ఉన్నాయి. కార్య‌క‌ర్త‌లు, స్నేహితుల‌తో క‌లిసి ఈ సినిమా చూడ‌టానికి వెళ్లాను. అందులోని డైలాగ్స్‌, అశ్లీల సీన్స్ చూడ‌లేక సినిమా మొద‌లైన కొద్ది సేప‌టికే థియేట‌ర్ నుంచి బ‌య‌ట‌కు వ‌చ్చాను. టాక్సిక్‌లాంటి సినిమాల వ‌ల్ల హీరో య‌శ్‌కు చెడ్డ పేరు వ‌స్తుంది" అని రాజా సింగ్ అన్నారు.

క‌థే లేదు...

"కేజీఎఫ్ , కేజీఎఫ్ 2 య‌శ్‌కు మంచి పేరుతో పాటు డ‌బ్బులు వ‌చ్చాయి. అదే స్టైల్‌లో టాక్సిక్‌ తీశాడు. అస‌లు ఈ సినిమాలో క‌థే లేదు. ఫ్యామిలీతో సినిమా చూడ‌టానికి ఇబ్బందిగా ఉంది. ఒక‌ప్పుడు కుటుంబ విలువ‌ల‌తో కూడిన మంచి క‌థ‌ల‌తో సినిమాలు వ‌చ్చేవి. విలువ‌ల గురించి చెప్పేవారు. ఇప్పుడు డ‌బ్బులు, డ్ర‌గ్స్‌, చంప‌డం లాంటి వాటినే చూపిస్తున్నారు. ఇలాంటి క‌థ‌ల‌తో సినిమాలు చేసే విష‌యంలో హీరోలు, ద‌ర్శ‌కులు ఆలోచించాలి" అని రాజా సింగ్ అన్నారు.

ఇరుముడిపై ప్ర‌శంస‌లు...

టాక్సిక్‌ను విమ‌ర్శించిన రాజాసింగ్ ర‌వితేజ ఇరుముడిపై ప్ర‌శంస‌లు కురిపించారు. "ర‌వితేజ ఇరుముడిలో మంచి మెసేజ్ ఉంది. దైవిక అంశాల‌తో పాటు ఫ్యామిలీ ఎమోష‌న్స్‌ను అద్భుతంగా చూపించారు. ఛావా లాంటి సినిమాల్లో హిందూ ధ‌ర్మాన్ని ఎలా కాపాడుకోవాలో చూపించారు. స‌మాజానికి ఇలాంటి సినిమాలే కావాల‌ని" అన్నారు టాక్సిక్‌ను ఉద్దేశించి రాజా సింగ్ చేసిన కామెంట్లు వైర‌ల్ అవుతోన్నాయి.

250 కోట్లు...

ఈ విమ‌ర్శ‌లు, నెగెటివ్ కామెంట్ల‌తో సంబంధం లేకుండా టాక్సిక్ బాక్సాఫీస్ వ‌ద్ద భారీగా క‌లెక్ష‌న్స్ రాబ‌డుతోంది. ఐదు రోజుల్లోనే ఈ సినిమాకు 250 కోట్లు వ‌చ్చాయి. టాక్సిక్‌లో న‌య‌న‌తార‌, రుక్మిణి వ‌సంత్‌, కియారా అద్వానీ, తారా సుతారియా, హ్యుమా ఖురేషి హీరోయిన్లుగా న‌టించారు.