Gayatri Bhardwaj | తెలుగు మైథాల‌జీ మూవీలో మిస్ ఇండియా విన్న‌ర్ – సందీప్‌కిష‌న్ క‌రికాల షురూ

Gayatri Bhardwaj | మిస్ ఇండియా విన్న‌ర్ తెలుగులో ఓ సినిమా చేస్తోంది. ఓ సోషియో ఫాంట‌సీ మూవీలో యువ‌రాణిగా క‌నిపించ‌బోతుంది. రిజ‌ల్ట్‌తో సంబంధం లేకుండా హీరోగా వ‌రుస‌గా సినిమాల‌ను ప‌ట్టాలెక్కిస్తున్నారు సందీప్ కిష‌న్‌. ఇటీవ‌లే సిగ్మా మూవీతో ప్రేక్ష‌కుల ముందుకొచ్చాడు. ద‌ళ‌ప‌తి విజ‌య్ త‌న‌యుడు జాస‌న్ సంజ‌య్ ద‌ర్శ‌క‌త్వం వ‌హించిన ఈ మూవీ డిజాస్ట‌ర్‌గా నిలిచింది. తాజాగా సందీప్‌కిష‌న్ కెరీర్‌లో ఫ‌స్ట్ టైమ్ సోషియో ఫాంట‌సీ మూవీ చేయ‌బోతున్నాడు. క‌రికాల పేరుతో రూపొందుతోన్న ఈ మూవీ రెండ్ పార్ట్‌లుగా రిలీజ్ కాబోతుంది. ఈ మైథాల‌జీ మూవీలో సందీప్‌కిష‌న్ స‌ర‌స‌న ముగ్గురు హీరోయిన్లు న‌టించ‌బోతున్నారు.

యోధుడిగా...

క‌రికాల మూవీ పూజా కార్య‌క్ర‌మాల‌ను గురువారం నిర్వ‌హించారు. ఈఓపెనింగ్ వేడుక‌లో నాయ‌కానాయిక‌లు పాల్గొన్నారు. సోషియో ఫాంట‌సీ మూవీలో చారిత్ర‌క యోధుడి పాత్ర‌లో సందీప్‌కిష‌న్ క‌నిపించ‌బోతున్నాడు. క‌రికాల‌లో కేథ‌రిన్‌, సాక్షి మ‌డోల్క‌ర్‌తో పాటు మిస్ ఇండియా గాయ‌త్రి భ‌ర‌ద్వాజ్ క‌థానాయిక‌లుగా క‌నిపించ‌బోతున్నారు.

యువ‌రాణిగా...

క‌రికాల‌లో గాయ‌త్రి భ‌ర‌ద్వాజ్ యువ‌రాణి పాత్ర‌లో న‌టిస్తున్న‌ట్లుగా స‌మాచారం. గ్లామ‌ర్‌తో పాటు యాక్ష‌న్ ప్ర‌ధానంగా ఆమె క్యారెక్ట‌ర్ సాగుతుంద‌ని అంటున్నారు. 2018లో ఫెమినా మిస్ ఇండియా టైటిల్ గెలుచుకుంది గాయ‌త్రి భ‌ర‌ద్వాజ్‌. యూట్యూబ్‌లో రిలీజైన ఢిండోరా వెబ్‌సిరీస్‌తో ఫేమ‌స్ అయిన ఈ బ్యూటీ ర‌వితేజ టైగ‌ర్ నాగేశ్వ‌ర‌రావుతో ఫ‌స్ట్ టైమ్ తెలుగు ప్రేక్ష‌కుల‌ను ప‌ల‌క‌రించింది. ఈ సినిమాలో ర‌వితేజ భార్య‌గా క‌నిపించింది. ఆ త‌ర్వాత అల్లు శిరీష్ బ‌డ్డీలో న‌టించింది. ప్ర‌స్తుతం విశ్వ‌క్‌సేన్ క‌ల్ట్‌లో హీరోయిన్‌గా న‌టిస్తోన్న ఈ మిస్ ఇండియా విన్న‌ర్‌..ఈ సినిమా రిలీజ్ కాక‌ముందే క‌రికాల‌కు గ్రీన్‌సిగ్న‌ల్ ఇచ్చింది.

శంబాల ఫేమ్‌...

రెండు పార్ట్‌లుగా తెర‌కెక్కుతోన్న క‌రికాల‌కు శంబాల ఫేమ్ యుగంధ‌ర్ ముని ద‌ర్శ‌క‌త్వం వ‌హిస్తున్నారు. క‌రికాల పార్ట్ వ‌న్ వ‌చ్చే ఏడాది జూలైలో...పార్ట్ 2 అక్టోబ‌ర్‌లో ప్రేక్ష‌కుల ముందుకు రానున్నాయి.