Chiranjeevi | 48 ఏళ్ల క్రితం ఇదే రోజు చిరంజీవిగా పేరు మార్చుకున్నా – మెగాస్టార్ ఎమోష‌న‌ల్ పోస్ట్‌

Chiranjeevi | టాలీవుడ్ అగ్ర హీరో మెగాస్టార్ చిరంజీవి ఇండ‌స్ట్రీలోకి అడుగుపెట్టి నేటితో 48 ఏళ్లు పూర్త‌య్యాయి. 1978లో రిలీజైన ప్రాణం ఖ‌రీదు సినిమాతో న‌టుడిగా తొలిసారి కెమెరా ముందుకొచ్చారు. చెన్నై ఫిల్మ్ ఇనిస్టిట్యూట్‌లో న‌ట‌న‌లో శిక్ష‌ణ పూర్తిచేసుకొని అవ‌కాశాల కోసం ఎదురుచూస్తున్న శివ‌శంక‌ర వ‌ర‌ప్ర‌సాద్‌...ఈ సినిమాతోనే చిరంజీవిగా మారారు. కే వాసు ద‌ర్శ‌క‌త్వంలో రూపొందిన ఈసినిమాలో న‌ర్స‌య్య‌ అనే ఆవేశ‌ప‌రుడైన యువ‌కుడి పాత్ర‌లో చిరంజీవి అస‌మాన న‌ట‌న‌తో తెలుగు ప్రేక్ష‌కుల‌ను మెప్పించాడు. ప్రాణం ఖ‌రీదు విడుద‌లై న‌ల‌భై ఎనిమిదేళ్లు పూర్త‌యిన సంద‌ర్భంగా త‌న సినీ ప్ర‌యాణాన్ని గుర్తుచేసుకుంటూ చిరంజీవి ఎమోష‌న‌ల్ పోస్ట్ పెట్టారు.

48 వసంతాలు...

"22 సెప్టెంబర్ 1978 ...ఆరోజు మొదలైన నా సినీ ప్రయాణం నేటితో 48 వసంతాలు పూర్తి చేసుకుంది. ఈ 48 ఏళ్లలో ఎన్నో పాత్రలు పోషించాను. ఎన్నో విజయాలను చూశాను. ఎన్నో అవార్డులు, గౌరవాలు అందుకున్నాను. ఈ సుదీర్ఘ ప్రయాణంలో నన్ను నమ్మి అవకాశాలు ఇచ్చిన ప్రతి నిర్మాతకు, నాలోని నటుడిని కొత్త కొత్త కోణాల్లో ఆవిష్కరించిన ప్రతి దర్శకుడికి, నా ప్రతి సినిమా వెనుక అహర్నిశలు శ్రమించిన నటీనటులకు, సాంకేతిక నిపుణులకు, ప్రతి ఒక్కరికీ నా హృదయపూర్వక కృతజ్ఞతలు. మీ అందరి సహకారమే నన్ను ఈరోజు ఈ స్థాయిలో నిలబెట్టింది అయితే ఆ విజయాలన్నింటికంటే గొప్పది… మీరు నాపై చూపించిన ప్రేమ. ఆ గౌరవాలన్నింటికంటే విలువైనది… మీ హృదయాల్లో నాకు ఇచ్చిన స్థానం. నన్ను మీ కుటుంబ సభ్యుడిగా భావించి, ఇంతటి అపూర్వమైన ప్రేమాభిమానాలను అందించిన ప్రతి ఒక్క అభిమానికి నా హృదయపూర్వక ధన్యవాదాలు. ఆరోజు “చిరంజీవి” అనేది నేను పెట్టుకున్న పేరు. నేడు మీ ప్రేమతో అది నాకు దక్కిన శాశ్వతమైన గుర్తింపు "అని ఈ పోస్ట్‌లో చిరంజీవి పేర్కొన్నారు.

రెమ్యూన‌రేష‌న్

ప్రాణం ఖ‌రీదు సినిమాకు గాను చిరంజీవి 1116 రెమ్యూన‌రేష‌న్ అందుకున్నారు. ఆయ‌న‌ అంగీక‌రించిన మొద‌టి మూవీ పునాదిరాళ్లు అయినా తొలుత థియేట‌ర్ల‌లో ప్రాణం ఖ‌రీదు రిలీజైంది. ఈ సినిమాలో ఒరియా న‌టి రేష్మీరాయ్ హీరోయిన్‌గా న‌టించింది.