Kriti Sanon | నేను నెపోటిజం బాధితురాలినే – బాలీవుడ్‌లో హీరోయిన్ల‌పై వివ‌క్ష ఎక్కువే – కృతి స‌న‌న్ కామెంట్స్‌

Kriti Sanon | స్టార్ కిడ్స్ వ‌ల్ల బాలీవుడ్‌లో తాను చాలా అవ‌కాశాలు కోల్పోయాన‌ని హీరోయిన్ కృతి స‌న‌న్ అన్న‌ది. రెమ్యూన‌రేష‌న్లు, గౌర‌వ మ‌ర్యాద‌లు...ఇలా ప్ర‌తి విష‌యంలో హీరోయిన్ల‌పై వివ‌క్ష క‌నిపిస్తూనే ఉంటుంద‌ని చెప్పింది. కృతి స‌న‌న్ హీరోయిన్‌గా న‌టించిన కాక్ టెయిల్ 2 మూవీ జూన్ 19న థియేట‌ర్ల‌లోకి రాబోతుంది. రొమాంటిక్ డ్రామాగా తెర‌కెక్కిన ఈ సినిమాలో ర‌ష్మిక మంద‌న్న మ‌రో హీరోయిన్‌గా న‌టిస్తోంది. షాహిద్ క‌పూర్ క‌థానాయ‌కుడిగా క‌నిపించ‌బోతున్నాడు. ఈ సినిమాలో కృతి స‌న‌న్‌, ర‌ష్మిక మంద‌న్న లెస్బియ‌న్లుగా న‌టించ‌నున్న‌ట్లు ప్ర‌చారం జ‌రుగుతోంది.

నెపోటిజం...

కాక్ టెయిల్ 2 ప్ర‌మోష‌న్స్‌లో బిజీగా ఉన్న కృతి స‌న‌న్ బాలీవుడ్ ఇండ‌స్ట్రీపై సంచ‌ల‌న వ్యాఖ్య‌లు చేసింది. తాను నెపోటిజం బాధితురాలినేన‌ని చెప్పింది. మిమి సినిమాకు ముందు ఐదేళ్లు త‌న కెరీర్ ఎంతో క‌ష్టంగా సాగింద‌ని అన్న‌ది. "టాలెంట్‌, ఏదో చేయ‌గ‌ల‌న‌నే త‌ప‌న‌ ఉండి కూడా అవ‌కాశాలు కోసం రోజులు, నెల‌ల త‌ర‌బ‌డి ఎదురుచూశా. కొన్ని మంచి సినిమాల్లో అవ‌కాశాలు వ‌చ్చాయి. కానీ స్టార్స్ కిడ్స్ కార‌ణంగా చివ‌రి నిమిషంలో న‌న్ను ప‌క్క‌న‌పెట్టారు. నెపోటిజం వ‌ల్ల నాకు చాలానే అన్యాయం జ‌రిగింది. వార‌సుల‌తో పోటీప‌డి ఒక్కో అవ‌కాశాన్ని సంపాదించుకోవ‌డానికి ఎంతో క‌ష్ట‌ప‌డాల్సివ‌చ్చేది. వాటికి తోడు కెరీర్ ఆరంభంలో నేను తీసుకున్న కొన్ని తప్పుడు నిర్ణయాల వ‌ల్ల ప‌రాజ‌యాలు ఎదుర‌య్యాయి. దాంతో చాలా ఒత్తిడికి లోన‌య్యా. ఈ క‌ష్టాలు, ప‌రాజ‌యాలే నాకు అనుభ‌వ పాఠాలుగా ఉప‌యోగ‌ప‌డ్డాయి. కెరీర్‌లో ధైర్యంగా ఎలా ముందుకు సాగాలో నేర్పించాయి" అని తెలిపింది.

వివ‌క్ష ఎక్కువే...

బాలీవుడ్‌లో హీరోయిన్ల‌పై వివ‌క్ష చాలా ఉంటుంద‌ని అన్న‌ది. సినిమా బ‌డ్జెట్ త‌గ్గించాల‌ని నిర్మాత‌లు అనుకుంటే మొద‌ట హీరోయిన్ల రెమ్యూన‌రేష‌న్ల‌నే త‌గ్గిస్తుంటార‌ని అన్న‌ది. హీరోల రెమ్యూన‌రేష‌న్ల‌లో మాత్రం ఎలాంటి మార్పులు ఉండ‌వ‌ని అన్న‌ది. సెట్స్‌లో షూటింగ్ టైమ్‌లో హీరోల కంటే ముందే హీరోయిన్లు మేక‌ప్‌లు వేసుకొని రెడీగా ఉండాల‌ని చెబుతుంటార‌ని, కానీ హీరోలు మాత్రం హీరోయిన్ల కోసం ఎదురుచూడ‌టం త‌క్కువేన‌ని అన్న‌ది. సెట్స్‌లో హీరోహీరోయిన్లను గౌర‌వించే తీరు, క‌ల్పించే వ‌స‌తుల విష‌యంలో చాలానే తేడాలు ఉంటాయ‌ని అన్న‌ది. హీరోలు ఎది అడిగినా స‌మ‌కూర్చుతుంటార‌ని, అదే హీరోయిన్ల‌కు వ‌చ్చే స‌రికి కండీష‌న్లు పెడుతుంటార‌ని కృతి స‌న‌న్ అన్న‌ది. కృతి స‌న‌న్ కామెంట్స్ వైర‌ల్ అవుతోన్నాయి.