Kerala Story 2 | కేర‌ళ స్టోరీ 2 రిలీజ్‌కు లైన్ క్లియ‌ర్ – స్టే ఎత్తేసిన కోర్టు

Kerala Story 2 |  కేర‌ళ స్టోరీ 2 రిలీజ్ వివాదం సినిమాకు మించిన ట్విస్ట్‌ల‌తో సాగుతుంది. కేరళ స్టోరీ 2ను రిలీజ్ చేయ‌డానికి వీలులేదంటూ కేర‌ళ హైకోర్టులోని సింగిల్ బెంచ్ గురువారం స్టే విధించింది. తాజాగా శుక్ర‌వారం సింగిల్ బెంచ్ ఇచ్చిన తీర్పును డివిజ‌న్ బెంచ్ కొట్టివేసింది. ఈ సినిమాపై ఉన్న స్టేను ఎత్తివేసింది. డివిజ‌న్ బెంచ్ తీర్పుతో కేర‌ళ స్టోరీ 2 రిలీజ్‌కు సంబంధించిన అడ్డంకులు తొల‌గిపోయాయి.

సెన్సార్ స‌ర్టిఫికేట్‌...

కేర‌ళ స్టోరీ 2 సినిమాలో కేర‌ళ రాష్ట్రాన్ని త‌ప్పుగా చిత్రీక‌రిస్తున్నారంటూ, ఈ సినిమాను విడుద‌ల చేయ‌డానికి వీలులేదంటూ పిటిష‌న్ దాఖ‌లైంది. ఈ పిటిష‌న్‌ను విచారించిన హైకోర్టు సింగిల్ బెంచ్‌ సినిమాకు సెన్సార్ స‌ర్టిఫికేట్ జారీ చేయ‌డంలో సీబీఎఫ్‌సీ నియ‌మ‌నిబంధ‌న‌లు స‌రిగా పాటించ‌లేదంటూ ఫైర్ అయ్యింది. కేర‌ళ స్టోరీకి సంబంధించి వ‌స్తోన్న అభియోగాల‌ను దృష్టిలో పెట్టుకొని సెన్సార్ విష‌యంలో పునఃప‌రిశీలించాల‌ని సింగిల్ బెంచ్ ఆదేశించింది. సీబీఎఫ్‌సీతో పాటు నిర్మాత‌ల‌కు నోటీసులు జారీ చేసింది. సినిమా రిలీజ్‌పై సింగిల్ బెంచ్‌ స్టేను విధించ‌డంతో ఫిబ్ర‌వ‌రి 27న రిలీజ్ కావాల్సిన ఈ మూవీ వాయిదాప‌డింది.

లైన్ క్లియ‌ర్‌...

సింగిల్ బెంచ్ తీర్పుపై నిర్మాత‌లు డివిజ‌న్ బెంచ్‌ను ఆశ్ర‌యించారు. సింగిల్ బెంచ్ ఇచ్చిన స్టేను డివిజ‌న్ బెంచ్ ఎత్తివేసింది. నిర్మాత‌ల పిటిష‌న్‌పై విచారించిన డివిజ‌న్ బెంచ్ ప్ర‌జ‌ల్లో ఉన్న అంచ‌నాలు, అపోహ‌ల‌ ఆధారంగా సినిమా రిలీజ్‌ను అడ్డుకోవ‌డం క‌రెక్ట్ కాద‌ని అన్న‌ది. సీబీఎఫ్‌సీ ఇప్ప‌టికే కేర‌ళ స్టోరీ 2ను చూసి ఎలాంటి అభ్యంత‌రాలు లేవ‌ని చెబుతూ స‌ర్టిఫికేట్ జారీ చేసింద‌ని డివిజ‌న్ బెంచ్ గుర్తుచేసింది. వివాదాస్ప‌ద అంశాల‌తో కూడిన ఈ సినిమాను రిలీజ్ చేస్తే గొడ‌వ‌లు జ‌రిగే అవ‌కాశం ఉందంటూ పిటిష‌న్ వాద‌న‌తో డివిజ‌న్ బెంచ్ ఏకీభ‌వించ‌లేదు. శాంతి భ‌ద్ర‌త‌ల బాధ్య‌త ప్ర‌భుత్వానికి సంబంధించినద‌ని, వాటికి సినిమా రిలీజ్‌ను ముడిపెట్ట‌వ‌ద్ద‌ని డివిజ‌న్ బెంచ్ అన్న‌ది. కోర్టు తీర్పుపై ద‌ర్శ‌క‌నిర్మాత‌లు ఆనందం వ్య‌క్తం చేశారు. నిజాలను నిర్భ‌యంగా చెప్పాల‌నే ప్ర‌య‌త్నంతోనే తాము చేసిన సినిమా ఇద‌ని పేర్కొన్నారు.

ముగ్గురు హీరోయిన్లు...

ది కేర‌ళ స్టోరీ 2 మూవీకి కామాఖ్య నారాయ‌ణ్ సింగ్ ద‌ర్శ‌క‌త్వం వ‌హించాడు. విపుల్ అమృత్‌లాల్ షా నిర్మించాడు. ఉల్కా గుప్తా, అదితి భాటియా, ఐశ్వ‌ర్య ఓజా ప్ర‌ధాన పాత్ర‌ల్లో న‌టించారు. ఫిబ్ర‌వ‌రి 27న ఈ సినిమా రిలీజ్ కావాల్సింది. కోర్టు స్టే కార‌ణంగా వాయిదాప‌డింది. 2023లో వ‌చ్చిన కేర‌ళ స్టోరీ మూవీకి సీక్వెల్‌గా ఈ సినిమా తెర‌కెక్కింది.