Jayam Ravi | తెలుగు సినిమాలో జ‌యం ర‌వి – వెంక‌టేశ్వ‌ర స్వామిగా కోలీవుడ్ హీరో

Jayam Ravi | విడాకుల, వ్య‌క్తిగ‌త జీవితంలోని వివాదాల‌తో గ‌త కొద్ది రోజులుగా ఎక్కువ‌గా వార్త‌ల్లో నిలుస్తున్నారు జ‌యం ర‌వి. విడాకులు ప్ర‌క్రియ పూర్త‌య్యే వ‌ర‌కు తాను సినిమాల‌కు దూరంగా ఉండ‌బోతున్న‌ట్లు ఇటీవ‌ల ప్ర‌క‌టించాడు. ఎమోష‌న‌ల్‌గా తీసుకున్న నిర్ణ‌య‌మంటూ బ్రేక్‌పై కొద్ది రోజుల్లోనే యూట‌ర్న్ తీసుకున్నాడు. ప్ర‌స్తుతం త‌మిళంలో హీరోగా ఓ మూడు సినిమాలు చేస్తోన్న జ‌యం ర‌వి ఓ స్ట్రెయిట్ తెలుగు మూవీకి గ్రీన్‌సిగ్న‌ల్ ఇచ్చిన‌ట్లు ప్ర‌చారం జ‌రుగుతోంది.

వ‌డ్డీ కాసుల‌వాడ‌...

మంచు మ‌నోజ్ హీరోగా వ‌డ్డీకాసుల‌వాడ పేరుతో ఫ‌న్ ఫ్యామిలీ ఎంట‌ర్‌టైన‌ర్ మూవీ రాబోతుంది. మంచు మ‌నోజ్ బ‌ర్త్‌డే సంద‌ర్భంగా ఇటీవ‌ల ఈ మూవీని అఫీషియ‌ల్‌గా అనౌన్స్‌చేశారు. తేజ్ ఉప్ప‌ల‌పాటి ద‌ర్శ‌క‌త్వం వ‌హిస్తున్న ఈ సినిమాకు అనిల్ సుంకర ప్రొడ్యూస్ చేస్తున్నారు. త్వ‌ర‌లో ఈ సినిమా రెగ్యుల‌ర్ షూటింగ్ మొద‌లుకానున్న‌ట్లు స‌మాచారం.

వెంక‌టేశ్వ‌ర స్వామి...

వ‌డ్డీ కాసుల‌వాడ సినిమాలో వెంక‌టేశ్వ‌ర స్వామి పాత్ర కీల‌కంగా ఉండ‌బోతున్న‌ట్లు తెలిసింది ఈ పాత్ర కోసం ప‌లువురు స్టార్ హీరోల పేర్ల‌ను ప‌రిశీలించిన మేక‌ర్స్ చివ‌ర‌కు జ‌యం ర‌విని ఫైన‌ల్ చేసిన‌ట్లు స‌మాచారం. త్వ‌ర‌లోనే జ‌యం ర‌వి లుక్‌ను రిలీజ్ చేసేందుకు స‌న్నాహాలు చేస్తున్న‌ట్లు చెబుతున్నారు. మంచు మ‌నోజ్‌, జ‌యం ర‌వి కాంబినేష‌న్‌లో వ‌చ్చే సీన్లు అదిరిపోతాయ‌ని టాక్ వినిపిస్తోంది. ఈ ఏడాది చివ‌ర‌లో వ‌డ్డీ కాసుల‌వాడ రిలీజ్ కానున్న‌ట్లు స‌మాచారం.

చైల్డ్ యాక్ట‌ర్‌...

సుమ‌న్, కృష్ణంరాజు హీరోలుగా న‌టించిన బావ‌బావ‌మ‌రిది సినిమాతో చైల్డ్ యాక్ట‌ర్‌గా జ‌యం ర‌వి కెరీర్ మొద‌లైంది. ఈ సినిమాను జ‌యం ర‌వి తండ్రి ఎడిట‌ర్ మోహ‌న్ నిర్మించారు. ఇందులో చిన్న‌నాటి సుమ‌న్ పాత్ర‌లో జ‌యం ర‌వి క‌నిపించాడు. లాంగ్ గ్యాప్ త‌ర్వాత మ‌ళ్లీ వ‌డ్డీ కాసుల‌వాడ‌తో టాలీవుడ్‌లోకి రీఎంట్రీ ఇవ్వ‌బోతున్నాడు.

ఫ‌స్ట్ టైమ్ మెగా ఫోన్

ప్ర‌స్తుతం జీనీ, క‌రాటే బాబు సినిమాల్లో హీరోగా న‌టిస్తున్నాడు జ‌యం ర‌వి. ఆర్డిన‌రీ మ్యాన్ సినిమాతో ఫ‌స్ట్ టైమ్ మెగా ఫోన్ ప‌ట్ట‌బోతున్నాడు. ఈ సినిమాలో యోగిబాబు కీల‌క పాత్ర‌లో క‌నిపించ‌బోతున్నాడు.