Meghamsh Srihari | మిస్ట‌రీ డెత్ కేసుతో శ్రీహ‌రి కొడుకు మూవీ – ట్రెండింగ్‌లో ఆస్మాన్ టీజ‌ర్‌

Meghamsh Srihari | దివంగ‌త న‌టుడు శ్రీహ‌రి త‌న‌యుడు మేఘాంశ్ శ్రీహ‌రి మ‌ర్డ‌ర్ మిస్ట‌రీ థ్రిల్ల‌ర్ మూవీతో త్వ‌ర‌లో తెలుగు ప్రేక్ష‌కుల ముందుకు రాబోతున్నాడు. మేఘాంశ్ శ్రీహ‌రి హీరోగా తెలుగులో ఆస్మాన్ పేరుతో ఓ సినిమా రూపొందుతోంది. రామ్ నంద‌న్ ద‌ర్శ‌క‌త్వం వ‌హిస్తున్న ఈ సినిమాలో రాయంచ హీరోయిన్‌గా న‌టిస్తోంది.

ఆస్మాన్ టీజ‌ర్‌...

మేఘాంశ్ పుట్టిన‌రోజు సంద‌ర్భంగా ఆస్మాన్ టీజ‌ర్‌ను రిలీజ్ చేశారు. ఈ టీజ‌ర్‌ ఒక్క రోజులోనే రెండు మిలియ‌న్ల‌కుపైగా వ్యూస్‌ను ద‌క్కించుకుంది. ప్ర‌స్తుతం యూట్యూబ్‌లో ట్రెండింగ్‌లో ఉంది. మ‌ర్డ‌ర్ మిస్ట‌రీ, థ్రిల్ల‌ర్ అంశాల‌తో ఆస్మాన్ టీజ‌ర్ ఆస‌క్తిక‌రంగా సాగింది. "మీరు ఇప్పుడు గొంగలి పురుగు దశలో ఉన్నారు.. అది దాటి సీతాకోక చిలుక దశలోకి మారాలి.. దానికి మార్గం నేనే.. మీరందరూ కూడా కనిపించే చీకట్లో ఉన్నారు.. అదే నిజం’ అంటూ టీజ‌ర్‌లోని డైలాగ్స్ ఉత్కంఠ‌ను రేకెత్తిస్తోన్నాయి. యాక్ష‌న్ స‌న్నివేశాల‌తో మేఘాంశ్ ఆక‌ట్టుకున్నారు.

శివాత్మిక గెస్ట్‌...

ఈ టీజ‌ర్ రిలీజ్ ఈవెంట్‌కు మంచు మ‌నోజ్‌తో పాటు హీరోయిన్ శివాత్మిక గెస్ట్‌లుగా హాజ‌ర‌య్యారు. శ్రీహరి మమ్మల్ని ఎత్తుకుని పెంచారు. నేను మేఘాంశ్‌ని ఎత్తుకున్నాను. సినిమా ఉన్నంత కాలం రియల్ స్టార్ శ్రీహరి ఉంటారు. మేఘాంశ్‌ని నేను ఎలా చూడాలని అనుకున్నానో టీజర్‌లో అలా కనిపించాడు అని మంచు మ‌నోజ్ అన్నారు. . మేఘాంశ్ స్కూల్‌లో నా సీనియ‌ర్ అని, ఈ సినిమాతో అత‌డికి హీరోగా పెద్ద హిట్టు ద‌క్కాల‌ని శివాత్మిక చెప్పింది.

బురారీ మ‌ర్డ‌ర్ కేసు...

టీజ‌ర్‌లోని సీన్స్‌, డైలాగ్స్ చూస్తుంటే దేశ‌వ్యాప్తంగా సంచ‌ల‌నం సృష్టించిన బురారీ మ‌ర్డ‌ర్ కేసు ఆధారంగా ఆస్మాన్ మూవీ రూపొందుతోన్న‌ట్లు క‌నిపిస్తోంది. 2018లో ఢిల్లీలోని బురారీలో ఓ కుటుంబం సామూహిక ఆత్మ‌హ‌త్య‌కు పాల్ప‌డింది. మూఢ‌న‌మ్మ‌కాల‌తోనే వారంతా క‌ళ్ల‌కు గంత‌లు, చేతులు వెన‌క్కి క‌ట్టుకొని చ‌నిపోయారు. ఆ ఘ‌ట‌న‌ను పోలి ఆస్మాన్ టీజ‌ర్‌లో కొన్ని స‌న్నివేశాలు క‌నిపిస్తున్నాయి. మేక‌ర్స్ మాత్రం దీనిపై క్లారిటీ ఇవ్వ‌లేదు.