Jani Master | జానీ మాస్ట‌ర్‌కు మ‌రో షాక్ – స‌డెన్‌గా ఆగిపోయిన కామెడీ షో

Jani Master |  డ్యాన్స‌ర్ అసోసియేష‌న్‌లో జ‌రుగుతోన్న గొడ‌వ‌ల కార‌ణంగా గ‌త కొద్ది రోజులుగా జానీ మాస్ట‌ర్ పేరు వార్త‌ల్లో నిలుస్తోంది. ఈ వివాదం కార‌ణంగా జానీ మాస్ట‌ర్‌పై తెలుగు ఫిలిం ఫెడ‌రేష‌న్ బ్యాన్ విధించింది. అత‌డు ప‌నిచేస్తోన్న సినిమాల‌కు మిగిలిన ఇర‌వై మూడు క్రాఫ్ట్‌లు ఎవ‌రూ స‌హ‌క‌రించ‌వ‌ద్ద‌ని పిలుపునిచ్చింది. చివ‌ర‌కు చిరంజీవి, బాల‌కృష్ణ జోక్యంతో ఈ వివాదం స‌ద్దుమ‌ణిగింది. జానీ మాస్ట‌ర్‌పై విధించిన నిషేధాన్ని ఎత్తివేసింది.

మ‌రో షాక్‌....

డ్యాన్స‌ర్స్ అసోసియేష‌న్ గొడ‌వ‌లు స‌ద్దుమ‌ణ‌గ‌క‌ముందే జానీ మాస్ట‌ర్‌కు మ‌రో షాక్ త‌గిలింది. అత‌డు జ‌డ్జ్‌గా వ్య‌వ‌హ‌రిస్తోన్న ఓ టీవీ షోను అర్ధాంత‌రంగా ఆపేసిన‌ట్లు స‌మాచారం. జానీ మాస్ట‌ర్‌, న‌వ‌దీప్, బిందుమాధవి జ‌డ్జ్‌లుగా జెమిని టీవీలో మాస్ జాత‌ర పేరుతో ఓ కామెడీ షో ఇటీవ‌ల మొద‌లైంది. జ‌బ‌ర్ధ‌స్థ్‌కు పోటీగా ప్రారంభ‌మైన‌ ఈ షోకు అమ‌ర్ దీప్ చౌద‌రి, దీపికా పిల్లి హోస్ట్‌లుగా వ్య‌వ‌హ‌రించారు.

నాలుగు నెల‌ల్లోనే....

మాస్ జాత‌ర మొద‌లై నాలుగు నెల‌లు కూడా కాక‌ముందే ఈ కామెడీ షో ఆగిపోయిన‌ట్లు ప్ర‌చారం జ‌రుగుతోంది. ప్ర‌తి శ‌నివారం, ఆదివారం రెండు రోజులు రాత్రి తొమ్మిది గంట‌ల‌కు జెమిని టీవీలో మాస్ జాత‌ర టెలికాస్ట్ అవుతుంది. ఈ వారం మాస్ జాత‌ర ప్ర‌సారం కాద‌ని జెమిని టీవీ ప్ర‌క‌టించింది. మాస్ జాత‌ర ప్లేస్‌లో అల్లు అర్జున్ రేసుగుర్రం సినిమా టెలికాస్ట్ కానున్న‌ట్లు వెల్ల‌డించ‌డం ఆస‌క్తిక‌రంగా మారింది.

ఫ్యాన్స్ కామెంట్లు...

మాస్ జాత‌ర‌ను ఈ ఒక్క‌వార‌మే ఆపేశారా? లేదంటే ప‌ర్మినెంట్‌గా ఆపేశారా అన్న‌ది బుల్లితెర ఫ్యాన్స్‌లో ఆస‌క్తిక‌రంగా మారింది. డ్యాన్స‌ర్ అసోసియేష‌న్ గొడ‌వ‌ల కార‌ణంగా జానీ మాస్ట‌ర్ షూటింగ్‌లో పాల్గొన‌లేద‌ని, అందుకే ఈ వారం ఎపిసోడ్‌కు సంబంధించిన షూటింగ్ డిలే అయ్యింద‌ని ప్ర‌చారం జ‌రుగుతోంది. నెటిజ‌న్లు మాత్రం ఈ షోను ప‌ర్మినెంట్‌గా ఆపేస్తే బెట‌ర్ అంటూ కామెంట్లు పెడుతున్నారు. మాస్ జాత‌ర ఆగిపోయినా న‌ష్ట‌మేమీ లేదంటూ పోస్ట్‌లు పెడుతున్నారు. ఈ వివాదాలు, గొడ‌వ‌ల‌తో సంబంధం లేకుండా కొరియోగ్రాఫ‌ర్‌గా జానీ మాస్ట‌ర్ ఫుల్ బిజీగా ఉన్నాడు. రామ్‌చ‌ర‌ణ్ పెద్ది సినిమాకు జానీ మాస్ట‌ర్ కంపోజ్ చేసిన డ్యాన్సుల‌కు మంచి పేరొచ్చింది.