Telugu OTT | ఓటీటీలోకి వ‌చ్చిన తెలుగు రొమాంటిక్ కామెడీ మూవీ – ఆటోడ్రైవ‌ర్‌తో ఇంజినీరింగ్ టాప‌ర్ ప్రేమ‌లో ప‌డితే

Telugu OTT | సుమంత్ ప్ర‌భాస్‌, నిధి ప్ర‌దీప్ హీరోహీరోయిన్లుగా న‌టించిన రొమాంటిక్ కామెడీ మూవీ గోదారి గ‌ట్టుపైనా డీసెంట్ హిట్‌గా నిలిచింది. చిన్న సినిమాగా మోస్తారు అంచ‌నాల‌తో ప్రేక్ష‌కుల ముందుకొచ్చిన ఈ సినిమా నిర్మాత‌ల‌కు లాభాల‌ను తెచ్చిపెట్టింది. సుభాష్ చంద్ర ద‌ర్శ‌క‌త్వం వ‌హించ‌గా... సీనియ‌ర్ నాయ‌కానాయిక‌లు జ‌గ‌ప‌తిబాబు, లైలా కీల‌క పాత్ర‌ల్లో న‌టించారు.

అమెజాన్ ప్రైమ్‌లో...

థియేట‌ర్ల‌లో రిలీజైన ఇర‌వై రోజుల్లోనే గోదారి గ‌ట్టుపైనా మూవీ ఓటీటీలోకి వ‌చ్చేసింది. శుక్ర‌వారం సైలెంట్‌గా అమెజాన్ ప్రైమ్ వీడియోలో రిలీజైంది.
మేము ఫేమ‌స్ త‌ర్వాత మూడేళ్ల గ్యాప్ అనంత‌రం సుమంత్ ప్ర‌భాస్ హీరోగా న‌టించిన మూవీ ఇది. తొలి సినిమాను తెలంగాణ బ్యాక్‌డ్రాప్‌లో చేయ‌గా...గోదారి గ‌ట్టుపైన మూవీని ఆంధ్రా నేటివిటీతో రూపొందింది. తండ్రీకూతుళ్ల బంధానికి ప్రేమ‌క‌థ‌ను జోడించి ద‌ర్శ‌కుడు సుభాష్ చంద్ర ఈ సినిమాను రూపొందించారు. సుమంత్ ప్ర‌భాస్, జ‌గ‌ప‌తిబాబు యాక్టింగ్‌, సుద‌ర్శ‌న్ కామెడీ ఆడియెన్స్‌ను మెప్పించాయి. ఐదు కోట్ల ప్రీ రిలీజ్ బిజినెస్‌తో రిలీజైన గోదారి గ‌ట్టుపైన‌ ఎనిమిది కోట్ల‌కుపైగా వ‌సూళ్ల‌ను ద‌క్కించుకుంది. పెద్ద సినిమాలేవి పోటీగా లేక‌పోవ‌డం, పాజిటివ్ టాక్ రావ‌డం ఈ చిన్న సినిమాకు క‌లిసి వ‌చ్చింది.  ఈ సినిమాకు నాగ‌వంశీ కృష్ణ మ్యూజిక్ అందించారు.

ఇంజినీరింగ్ టాప‌ర్‌...

మాయ ఇంజినీరింగ్ స్టూడెంట్‌. చ‌దువులో టాప‌ర్‌. తండ్రి శ్యాంబాబు మాట జ‌వ‌దాట‌దు. కుటుంబం, చ‌దువు లోకంగా బ‌తుకుతుంది. రాజు ఓ ఆటోడ్రైవ‌ర్‌. కుటుంబ బాధ్య‌త‌ల కార‌ణంగా ప‌దో త‌ర‌గ‌తిలోనే చ‌దువు ఆపేస్తాడు. ఓ గొడ‌వ‌లో రాజుతో మాయ‌కు ఏర్ప‌డిన ప‌రిచ‌యం ప్రేమ‌గా మారుతుంది. కూతురి ప్రేమ వ్య‌వ‌హారం తెలిసి శ్యాంబాబు ఏం చేశాడు? మాయ‌కు రాజును ఎలా దూరం చేశాడు? రాజు మంచిత‌నం అత‌డి ప్రేమ‌ను ఎలా గెలిపించింది అన్న‌దే ఈ మూవీ క‌థ‌.