Telugu OTT | డైరెక్ట్‌గా ఓటీటీలోకి తెలుగు మిస్ట‌రీ థ్రిల్ల‌ర్ మూవీ – రెమ్యూన‌రేష‌న్ లేకుండా సినిమా చేసిన హీరో

Telugu OTT |  టాలీవుడ్ సీనియ‌ర్ యాక్ట‌ర్ బ్ర‌హ్మాజీ కెరీర్ హీరోగానే మొద‌లైంది. కృష్ణ‌వంశీ ద‌ర్శ‌క‌త్వం వ‌హించిన సింధూరంలో మెయిర్ హీరోగా న‌టించాడు. ఆ త‌ర్వాత గ‌ణా, చిరంజీవులుతో పాటు మ‌రికొన్ని సినిమాల్లో క‌థానాయ‌కుడిగా క‌నిపించాడు. హీరోగా స‌క్సెస్ కాలేక‌పోయిన బ్ర‌హ్మాజీ క‌మెడియ‌న్‌గా, క్యారెక్ట‌ర్ ఆర్టిస్ట్‌గా ప్రేక్ష‌కుల‌ను మెప్పిస్తోన్నారు. లాంగ్ గ్యాప్ త‌ర్వాత మ‌ళ్లీ బ్ర‌హ్మాజీ మ‌ళ్లీ హీరోగా ఓ సినిమా చేశాడు. మిస్ట‌రీ థ్రిల్ల‌ర్‌గా రూపొందిన ఈ మూవీ థియేట‌ర్ల‌ను స్కిప్ చేస్తూ నేరుగా ఓటీటీలోకి రాబోతుంది.

స‌న్ నెక్స్ట్‌లో...

బ్ర‌హ్మాజీ హీరోగా న‌టించిన హ్యాంగ్‌మ్యాన్ మూవీ జూలై 3న స‌న్ నెక్స్ట్ ఓటీటీలో రిలీజ్ కాబోతుంది. తెలుగుతో పాటు త‌మిళంలోనూ విడుద‌ల అవుతోంది. హ్యాంగ్‌మ్యాన్ మూవీకి విహాన్ ద‌ర్శ‌క‌త్వం వ‌హించాడు. ఈ తెలుగు మూవీలో బ్ర‌హ్మాజీతో పాటు విన‌య్‌, ప‌ల్లె స‌న్నీ, బ‌న్నీ అభిరామ్ కీల‌క పాత్ర‌ల్లో క‌నిపించ‌బోతున్నారు.

త‌లారిగా...

హ్యాంగ్‌మ్యాన్ మూవీలో బ్ర‌హ్మాజీ.... త‌లారి శివ‌య్య అనే పాత్ర‌లో క‌నిపించ‌బోతున్నారు. ఖైదీల‌ను ఉరి తీసేట‌ప్పుడు త‌లారిలు ఎలాంటి సంఘ‌ర్ష‌ణ‌కు లోన‌వుతారు? ఈ వృత్తి కార‌ణంగా స‌మాజంలో వారికి ఎదుర‌య్యే అవ‌హేళ‌న‌లు, అవ‌మానాల చుట్టూ ఈ థ్రిల్ల‌ర్ మూవీ సాగ‌నున్న‌ట్లు స‌మాచారం. హ్యాంగ్‌మ్యాన్ ర‌న్‌టైమ్ కూడా త‌క్కువేన‌ట‌. కేవ‌లం గంట ఇర‌వై నిమిషాల నిడివితో ఈ సినిమా రిలీజ్ కానున్న‌ట్లు స‌మాచారం.

రెమ్యూన‌రేష‌న్ లేకుండా...

హ్యాంగ్‌మ్యాన్ క‌థ న‌చ్చి ఒక్క రూపాయి కూడా రెమ్యూన‌రేష‌న్ తీసుకోకుండా బ్ర‌హ్మాజీ ఈ సినిమాలో ఉచితంగా న‌టించార‌ట‌. ఆయ‌న న‌ట‌న ఈ సినిమాకు హైలైట్‌గా ఉండ‌బోతున్న‌ట్లు స‌మాచారం. వాస్త‌వ ఘ‌ట‌న‌ల స్ఫూర్తితో ఈ సినిమా తెర‌కెక్కుతోన్న‌ట్లు స‌మాచారం. 2020లోనే ఈ సినిమా షూటింగ్ పూర్త‌య్యింది. దాదాపు ఆరేళ్ల త‌ర్వాత హ్యాంగ్‌మ్యాన్ ప్రేక్ష‌కుల ముందుకు రాబోతుంది. ద‌ర్శ‌కుడిగా విహాన్‌కు ఇదే డెబ్యూ మూవీ.