Cyber Scam | బాలీవుడ్ న‌టికి షాకిచ్చిన సైబ‌ర్ కేటుగాళ్లు – ఓటీపీ, పిన్ లేకుండా ల‌క్ష‌లు దోచేశారు

Cyber Scam |  బాలీవుడ్ న‌టి కీర్తి కుల్హారికి సైబ‌ర్ స్కామ్ బారిన ప‌డింది. ఎలాంటి ఓటీపీ, పిన్ వివ‌రాలు లేకుండానే సైబ‌ర్ కేటుగాళ్లు ఆమె నుంచి ల‌క్ష‌ల రూపాయ‌లు దోచేశారు. సైతాన్‌, పిక్‌, ఉరి వంటి సినిమాల‌తో బాలీవుడ్ ప్రేక్ష‌కుల‌ను మెప్పించింది. సినిమాల్లోనే కాకుండా ప‌లు వెబ్‌సిరీస్‌ల‌లో న‌టించింది.

క్రెడిట్ కార్డ్ వివ‌రాలు...

ఇటీవ‌ల కీర్తి కుల్హారి క్రెడిట్ కార్డ్ వివ‌రాల‌ను చోరీ చేసిన సైబ‌ర్ నేర‌గాళ్లు 2.43ల‌క్ష‌ల అన‌ధికారిక లావాదేవీలు జ‌రిపారు. ఈ మోసంపై ముంబైలోని ఆంబోలీ పోలీసుల‌కు కంప్లైంట్ ఇచ్చింది. జూలై 24న ముంబైలోని ఓ థియేట‌ర్‌లో సినిమా చూసేందుకు వెళుతుండ‌గా బ్యాంకు నుంచి త‌న‌కు ఓ మెసేజ్ వ‌చ్చింద‌ని, త‌న క్రెడిట్ కార్డ్ ద్వారా ఏరోమెక్సికో ఎయిర్‌లైన్స్ 2525 యూఎస్ డాలర్లు ట్రాన్స్‌ఫర్ అయినట్లు అందులో ఉంద‌ని కీర్తి కంప్లైంట్‌లో పేర్కొన్న‌ది. ఈ మోసంపై వెంట‌నే క‌స్ట‌మేర్ కేర్‌కు కాల్ చేసిన‌ట్లు చెప్పింది. ఆమె క్రెడిట్ కార్డ్ నుంచి నాలుగు విడ‌త‌లుగా 2.43 ల‌క్ష‌లు డ్రా అయిన‌ట్లు బ్యాంకు అధికారులు గుర్తించారు. ఆమె కార్డ్‌ను బ్లాక్ చేశారు.

ఓటీపీ లేకుండా...

క్రెడిట్ కార్డ్ ఓటీపీ, పిన్ లాంటి వివ‌రాల‌ను ఎవ‌రితో పంచుకోలేద‌ని పోలీసుల‌కు కీర్తి తెలిపిన‌ట్లు స‌మాచారం. క్రెడిట్ కార్డ్ లేదంటే ఆమె మొబైల్‌ను హ్యాక్ చేసి డ‌బ్బుల‌ను దోచేసిన‌ట్లు పోలీసుల‌ ప్రాథ‌మిక ద‌ర్యాప్తులో తేలింది. సైబ‌ర్ నిపుణుల సాయంతో ఈ కేసుపై ఇన్వేస్టిగేష‌న్‌ను జ‌రుపుతున్నారు.

ఫోర్ మోర్ షాట్స్‌...
అమెజాన్ ప్రైమ్‌లో రిలీజైన ఫోర్ మోర్ షాట్స్ అనే వెబ్‌సిరీస్‌తోనే యాక్ట‌ర్‌గా ఫేమ‌స్ అయ్యింది కీర్తి కుల్హారి. ఈ సిరీస్‌లో న‌టించిన‌ రాజీవ్ సిద్ధార్థ‌తో చాలా కాలంగా ప్రేమ‌లో ఉంది. త్వ‌ర‌లోనే వీరిద్ద‌రు పెళ్లిచేసుకోబోతున్న‌ట్లు ప్ర‌చారం జ‌రుగుతోంది.