Telugu OTT | గ‌త వారం థియేట‌ర్ల‌లో….ఈ వారం ఓటీటీలో – అవికా గోర్ తెలుగు రొమాంటిక్ మూవీ స్ట్రీమింగ్ డేట్‌, ప్లాట్‌ఫామ్ ఇవే!

Telugu OTT | థియేట‌ర్‌, ఓటీటీ రిలీజ్ మ‌ధ్య గ్యాప్ రాను రాను త‌గ్గుతుండ‌టంపై సినీ వ‌ర్గాలు ఆందోళ‌న వ్య‌క్తం చేస్తోన్నాయి. క‌నీసం నాలుగు నుంచి ఎనిమిది వారాల గ్యాప్ ఉండాల‌ని లేదంటే థియేట‌ర్లు మూత‌ప‌డ‌తాయ‌ని అంటున్నారు. తాజాగా నందు, అవికా గోర్ హీరోహీరోయిన్లుగా న‌టించిన తెలుగు మూవీ అగ్లీ స్టోరీ థియేట‌ర్ల‌లో రిలీజైన ప‌ధ్నాలుగు రోజుల్లోనే ఓటీటీలోకి వ‌చ్చేస్తోంది. శుక్ర‌వారం (జూన్ 5 ) ఆహా ఓటీటీలో ఈ తెలుగు మూవీ రిలీజ్‌ కాబోతుంది. ఈ సినిమా స్ట్రీమింగ్ డేట్‌ను ఆహా అధికారికంగా ప్ర‌క‌టించింది. ఓ పోస్ట‌ర్‌ను రిలీజ్ చేసింది.

వెరైటీ ప్ర‌మోష‌న్స్‌...

రొమాంటిక్ ల‌వ్‌స్టోరీగా తెర‌కెక్కిన ఈ సినిమాకు ప్ర‌ణ‌వ్ స్వ‌రూప్ ద‌ర్శ‌క‌త్వం వ‌హించారు. ర‌వితేజ మ‌హాదాస్యం, శివాజీరాజా కీల‌క పాత్ర‌ల్లో న‌టించారు. ఈ సినిమా కోసం నందు వెరైటీ ప్ర‌మోష‌న్స్ చేశాడు. కానీ అత‌డి క‌ష్టం వృథాగానే మిగిలిపోయింది. క‌మ‌ర్షియ‌ల్‌గా అగ్లీ స్టోరీ స‌రైన విజ‌యాన్ని సాధించ‌లేక‌పోయింది. ఈ సినిమాలో సైకోగా నెగెటివ్ షేడ్స్‌తో కూడిన క్యారెక్ట‌ర్‌లో నందు క‌నిపించాడు.

సైకో భ‌ర్త‌...

ఓ ప్ర‌మాదంలో నేహా (అవికా గోర్‌) త‌ల్లిదండ్రులు చ‌నిపోతారు. మావ‌య్య ఆమెను చేర‌దీస్తాడు. గౌత‌మ్‌ను (ర‌వితేజ మ‌హాదాస్యం) ప్రేమిస్తుంటుంది నేహా. అత‌డిని పెళ్లిచేసుకోవాల‌ని ఆశ‌ప‌డుతుంది. కానీ మ‌ర‌ద‌లిపై పిచ్చి ప్రేమ‌ను పెంచుకుంటాడు మావ‌య్య కొడుకు కార్తీక్ (నందు). ఇష్టం లేక‌పోయినా మావ‌య్య మాట కాద‌న‌లేక కార్తీక్‌ను పెళ్లి చేసుకుంటుంది నేహా. సైకో అయిన కార్తీక్ కార‌ణంగా నేహా ఎలాంటి క‌ష్టాలు ప‌డింది? గౌత‌మ్ మిస్సింగ్‌కు కార‌ణం ఏమిటి? అన్న‌దే ఈ మూవీ క‌థ‌.