Ustaad Bhagat Singh | ఏపీలో ఉస్తాద్ భ‌గ‌త్‌సింగ్ టికెట్ రేట్ల పెంపు – బెనిఫిట్ షోల‌కు గ్రీన్‌సిగ్న‌ల్‌

Ustaad Bhagat Singh | ఏపీలో డిప్యూటీ సీఎం ప‌వ‌న్ క‌ళ్యాణ్ హీరోగా న‌టించిన‌ ఉస్తాద్ భ‌గ‌త్‌సింగ్ మూవీకి టికెట్ ధ‌ర‌ల పెంపుతో పాటు బెనిఫిట్ షోల‌కు అనుమ‌తులు ల‌భించాయి. ఇందుకు సంబంధించిన జీవోను ప్ర‌భుత్వం శుక్ర‌వారం జారీ చేసింది. మార్చి 19న ఉద‌యం నాలుగు గంట‌ల‌కు స్పెష‌ల్ బెనిఫిట్ షోకు ప్ర‌భుత్వం గ్రీన్‌సిగ్న‌ల్ ఇచ్చింది. ఈ బెనిషిట్ షో టికెట్ ధ‌ర‌ను ఐదు వంద‌లుగా నిర్ణ‌యించారు.
మార్చి 19న బెనిఫిట్ షోతో పాటు మ‌రో ఐదు షోల‌ను స్క్రీనింగ్ చేయ‌డానికి ప‌ర్మిష‌న్ ఇచ్చారు.  మొదటి రోజు మొత్తం ఆరు షోల‌ను థియేటర్లలో ప్రదర్శించబోతున్నారు.

సింగిల్ స్క్రీన్స్‌...మ‌ల్టీప్లెక్స్‌...

రిలీజ్ రోజు నుంచి ప‌ది రోజుల పాటు మ‌ల్టీప్లెక్స్‌తో పాటు సింగిల్ స్క్రీన్స్‌లో టికెట్ ధ‌ర‌ల‌ను పెంచుకునే వెసులుబాటు క‌ల్పించారు. మ‌ల్టీప్లెక్స్‌లో 125, సింగిల్ స్క్రీన్స్‌లో 100 పెంచుకునేందుకు అనుమ‌తులు ఇచ్చారు. మార్చి 19 నుంచి 28 వ‌ర‌కు ధ‌ర‌ల పెంపు అమ‌లులో ఉంటుంది.

తెలంగాణ‌లో...

తెలంగాణ‌లో కూడా ఉస్తాద్ భ‌గ‌త్‌సింగ్ టికెట్ రేట్ల పెంపుకు ప‌ర్మిష‌న్లు రానున్న‌ట్లు స‌మాచారం. 90 రోజుల నిబంధ‌న జీవోపై సుప్రీంకోర్టు శుక్రవారం స్టే విధించింది. ఈ నేప‌థ్యంలో మ‌రో రెండు, మూడు రోజుల్లో టికెట్ రేట్ల పెంపు కోసం తెలంగాణ ప్ర‌భుత్వాన్ని ఉస్తాద్ భ‌గ‌త్‌సింగ్ నిర్మాత‌లు క‌ల‌వ‌బోతున్న‌ట్లు స‌మాచారం.
ఉస్తాద్ భ‌గ‌త్‌సింగ్ మూవీకి హ‌రీష్ శంక‌ర్ ద‌ర్శ‌క‌త్వం వ‌హిస్తున్నారు. గ‌బ్బ‌ర్‌సింగ్ త‌ర్వాత ప‌వ‌న్ క‌ళ్యాణ్‌, హ‌రీష్ శంక‌ర్ కాంబినేష‌న్‌లో వ‌స్తోన్న సినిమా ఇది.ఈ సినిమాలో ప‌వ‌న్ క‌ళ్యాణ్‌కు జోడీగా శ్రీలీల, రాశీఖ‌న్నా హీరోయిన్లుగా న‌టిస్తున్నారు. ఈ సినిమాకు దేవిశ్రీప్ర‌సాద్‌, త‌మ‌న్ మ్యూజిక్ అందించారు. మైత్రీ మూవీ మేక‌ర్స్ సంస్థ ఈ సినిమాను నిర్మించింది.

ప్రీ రిలీజ్ ఈవెంట్

దళపతి విజయ్ తేరీ రీమేక్‌గా ఉస్తాద్ భ‌గ‌త్‌సింగ్ తెర‌కెక్కుతోన్న‌ట్లుగా కొన్నాళ్లుగా ప్ర‌చారం జ‌రుగుతోంది. ఈ రూమ‌ర్ల‌ను మేక‌ర్స్ ఖండించారు. కాగా ఉస్తాద్ భ‌గ‌త్‌సింగ్ ప్రీ రిలీజ్ ఈవెంట్ మార్చి 15న హైద‌రాబాద్‌లో జ‌రుగ‌నున్న‌ట్లు స‌మాచారం. ఈ వేడుక‌లో ప‌వ‌న్ క‌ళ్యాణ్ పాల్గొన‌బోతున్నాడు.