Anushka | వ‌య‌సును ఎందుకు హైలైట్ చేస్తున్నారు – పెళ్లి రూమ‌ర్ల‌పై అనుష్క టీమ్ క్లారిటీ

Anushka |  స్విటీ అనుష్క శెట్టి పెళ్లిపీట‌లు ఎక్క‌బోతున్న‌ట్లు గ‌త కొద్ది రోజులుగా పుకార్లు వినిపిస్తున్నాయి. ఓ బిజినెస్ మెన్‌తో అనుష్క పెళ్లిని కుటుంబ‌స‌భ్యులు ఫిక్స్ చేశార‌ని, ఈ వేస‌విలోనే వివాహం జ‌రుగ‌నున్న‌ట్లు వార్త‌లు వ‌స్తున్నాయి. 44 ఏళ్ల వ‌య‌సులో అనుష్క పెళ్లిపీట‌లు ఎక్క‌బోతున్న‌ట్లు సోష‌ల్ మీడియాలో పుకార్లు హ‌ల్‌చ‌ల్‌ చేస్తున్నాయి. ఈ వెడ్డింగ్ రూమ‌ర్ల‌ను అనుష్క టీమ్ ఖండించింది. వ‌య‌సును హైలైట్ చేస్తూ ఏజ్ షేమింగ్‌కు పాల్ప‌డ‌టం స‌రికాదంటూ ఓ పోస్ట్ పెట్టారు.

ఏజ్ షేమింగ్‌...

ఒకరి వ్యక్తిగత జీవితాన్ని రోజువారీ వార్తలుగా మార్చే ముందు కనీసం అది నిజ‌మా కాదా అన్న‌ది ధృవీక‌రించుకుంటే బాగుంటుంది. నిజానిజాలు తెలియకుండా ఊహాగానాలను, పుకార్లను పదే పదే ప్ర‌చారం చేయ‌డం స‌రికాదు. అది ఎదుటివారి వ్యక్తిగత విషయాల్లో జోక్యం చేసుకోవ‌డ‌మే అవుతుంది.
ప్రతి పోస్ట్‌లో 44 ఏళ్లు అంటూ అనుష్క వ‌య‌సును హైలైట్ చేస్తున్నారు. ఏజ్‌ ఏమైనా వివాదాస్పదమైన విషయమా?. ప్ర‌తిసారి వయస్సు గురించి ప్రస్తావించడం ఒక రకమైన ఏజ్ షేమింగ్ లాగే అనిపిస్తోంది. వయస్సు అంత పెద్ద సమస్య అయితే... ఇదే ఆస‌క్తి హీరోల విషయంలో ఎందుకు చూపించ‌డం లేదు. హీరోయిన్ల‌ విషయంలోనే ఈ వివక్ష ఎందుకు క‌నిపిస్తుంది అని అనుష్క టీమ్ పేర్కొన్నారు.

నిర్ణ‌యాన్ని గౌర‌వించాలి...

​అనుష్క ఎంతో క‌ష్ట‌ప‌డి... ప్రతిభ, గౌర‌వంతో ఈ స్థాయికి చేరుకున్నారు. ఆమె ఎప్పుడూ పబ్లిసిటీ స్టంట్లు లేదా సోషల్ మీడియా పై ఆధార‌ప‌డ‌లేదు. తన వ్యక్తిగత జీవితాన్ని గోప్యంగా ఉంచుకోవాలనుకునే ఆమె వంటి వ్యక్తిని ఇలా టార్గెట్ చేయడం చాలా అన్యాయం. ప్రతి ఒక్కరూ తమ జీవితాన్ని 24 గంటలు ప్రజల ముందు ఉంచాలని అనుకోరు. ఆమె నిర్ణయాన్ని గౌరవించాల్సిన అవసరం ఉంది.

వ్య‌క్తిగ‌త విష‌యం...

పెళ్లి అనేది ఒకరి వ్యక్తిగత విషయం. అది బ్రేకింగ్ న్యూస్ కాదు, ట్రెండ్ అసలే కాదు. కేవలం ఎంగేజ్‌మెంట్ కోసం ఇలాంటి విషయాలను సంచలనం చేయకండి. బాధ్యత లేకుండా పుకార్లను వ్యాప్తి చేయ‌ద్దు. హీరోల‌కు ఇచ్చే అదే గౌరవాన్ని మహిళా నటులకు కూడా ఇవ్వండి అంటూ పేర్కొన్నారు. అనుష్క టీమ్ క్లారిటీతో ఈ పెళ్లి పుకార్ల‌కు పుల్‌స్టాప్ ప‌డింది.