Aamir Khan | టీమిండియా క్రికెట‌ర్ బ‌యోపిక్‌లో ఆమిర్‌ఖాన్ … ఇండియా – పాకిస్థాన్ టెస్ట్ సిరీస్ బ్యాక్‌డ్రాప్‌లో

Aamir Khan |  ల‌గాన్ త‌ర్వాత బాలీవుడ్ మిస్ట‌ర్ ప‌ర్‌ఫెక్ష‌నిస్ట్ ఆమిర్‌ఖాన్ క్రికెట్ బ్యాక్‌డ్రాప్‌లో మ‌రో సినిమా చేయ‌బోతున్నాడు. టీమిండియా లెజెండ‌రీ క్రికెట‌ర్ పాత్ర‌లో క‌నిపించ‌బోతున్నాడు. ఇండియ‌న్ క్రికెట్ టీమ్‌కు తొలి కెప్టెన్‌గా వ్య‌వ‌హ‌రించిన లాలా అమ‌ర్‌నాథ్ జీవితం ఆధారంగా ఓ స్పోర్ట్స్ థ్రిల్ల‌ర్ మూవీ రాబోతుంది. ఈ సినిమాకు బాలీవుడ్ సీనియ‌ర్ డైరెక్ట‌ర్ అషుతోష్ గోవారిక‌ర్ ద‌ర్శ‌క‌త్వం వ‌హించ‌బోతున్నాడ‌ట‌. అమిర్‌ ఖాన్ టైటిల్ రోల్‌లో న‌టిస్తోన్న ఈ సినిమాలో మ‌రో కీల‌క పాత్ర‌లో బాలీవుడ్ హీరో ఫ‌ర్హాన్ అక్త‌ర్ క‌నిపించ‌బోతున్న‌ట్లు స‌మాచారం.

తొలి సిరీస్‌...

భార‌త క్రికెట్‌కు పితామ‌హుడిగా లాలా అమ‌ర్‌నాథ్‌ను అభివ‌ర్ణిస్తుంటారు. 1933లో ఇంగ్లాండ్‌తో జ‌రిగిన టెస్ట్ మ్యాచ్‌లో ఇంట‌ర్నేష‌న‌ల్ క్రికెట్‌లోకి అడుగుపెట్టిన అమ‌ర్‌నాథ్ తొలి మ్యాచ్‌లోనే సెంచ‌రీ సాధించాడు. స్వాతంత్య్రానంత‌రం ఇండియ‌న్ క్రికెట్ టీమ్‌కు ఫ‌స్ట్ కెప్టెన్‌గా అమ‌ర్‌నాథ్ వ్య‌వ‌హ‌రించారు. 1952లో లాలా అమ‌ర్‌నాథ్ సార‌థ్యంలోనే పాకిస్థాన్‌పై ఇండియా త‌న తొలి టెస్ట్ సిరీస్‌ను గెలిచింది. ఈ ఇండియా పాకిస్థాన్ టెస్ట్ సిరీస్ బ్యాక్‌డ్రాప్‌లోనే ఆమిర్‌ఖాన్ మూవీ తెర‌కెక్క‌నుంద‌ట‌. పాకిస్థాన్‌పై టెస్ట్ సిరీస్ విజ‌యంలో లాలా అమ‌ర్‌నాథ్ పాత్ర ఏమిటి? క‌ష్టాల్లో ఉన్న టీమిండియాలో అత‌డు ఎలా స్ఫూర్తిని నింపాడు? ఓట‌మి ద‌శ‌లో ఉన్న భార‌త జ‌ట్టును త‌న అస‌మాన ఆట‌తీరుతో ఎలా విజ‌య‌తీరాల‌కు చేర్చాడ‌నే అంశాల‌తో ఈ మూవీ తెర‌కెక్క‌నుంద‌ట‌. ఈ బ‌యోపిక్‌లో లాలా అమ‌ర్‌నాథ్ పాత్ర‌లో ఆమిర్‌ఖాన్ క‌నిపించ‌బోతుండ‌గా...పాకిస్థాన్ జ‌ట్టు కెప్టెన్‌గా ఫ‌ర్హాన్ అక్త‌ర్ న‌టించ‌నున్న‌ట్లు స‌మాచారం.

అక్టోబ‌ర్‌లో సెట్స్‌పైకి...

ల‌గాన్ త‌ర్వాత దాదాపు ఇరవై ఐదేళ్ల విరామం అనంతరం  ఆమిర్‌ఖాన్‌, అషుతోష్ గోవారిక‌ర్ కాంబినేష‌న్‌లో తెర‌కెక్కుతోన్న ఈ మూవీ ఈ ఏడాది అక్టోబ‌ర్‌లో సెట్స్‌పైకి రానుంద‌ట‌. ఫ‌ర్హాన్ అక్త‌ర్‌తో క‌లిసి ఆమిర్‌ఖాన్‌, రాజ్‌కుమార్ హిరానీ ఈ బ‌యోపిక్‌ను నిర్మించ‌బోతున్న‌ట్లు వార్త‌లు వినిపిస్తున్నాయి. లాలా అమ‌ర్‌నాథ్ బ‌యోపిక్‌తో పాటు త్రీ ఇడియ‌ట్స్ సీక్వెల్‌లో ఆమిర్ ఖాన్ న‌టించ‌నున్న‌ట్లు ప్ర‌చారం జ‌రుగుతోంది.