TTD | ఈ నెల 18 నుంచి శ్రీ‌వారి ఆర్జిత సేవ టికెట్ల కోసం రిజిస్ట్రేష‌న్‌.. 24న ప్ర‌త్యేక ద‌ర్శ‌నం టికెట్లు విడుద‌ల‌

TTD | భ‌క్తుల‌కు తిరుమ‌ల తిరుప‌తి దేవ‌స్థానం శుభ‌వార్త చెప్పింది. జూలై మాసానికి సంబంధించి టికెట్ల కోటాకు సంబంధించిన షెడ్యూల్‌ని ప్ర‌క‌టించింది. శ్రీ‌వారి ఆర్జిత సేవా టికెట్ల‌యిన సుప్రభాతం, తోమాల, అర్చన, అష్టదళ పాదపద్మారాధన సేవల‌కు సంబంధించిన కోటాను ఈ నెల 18న ఉదయం 10 గంట‌ల‌కు టీటీడీ ఆన్‌లైన్‌లో విడుదల చేయ‌నుంది. ఈ సేవా టికెట్లు ఎలక్ట్రానిక్ డిప్ కోసం 20న ఉదయం 10 గంటల వరకు ఆన్‌లైన్‌లో నమోదు చేసుకోవ‌చ్చ‌ని చెప్పింది. ఈ టికెట్లు పొందిన భ‌క్తులు 20 నుంచి 22 తేదీ మధ్యాహ్నం 12 గంటల లోపు డ‌బ్బులు చెల్లించిన వారికి మాత్ర‌మే టికెట్లు మంజూర‌వుతాయ‌ని పేర్కొంది.

21న ఆర్జిత సేవా టికెట్ల విడుదల

కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకార సేవ టికెట్లను 21న ఉదయం 10 గంటలకు ఆన్‌లైన్‌లో అందుబాటులో ఉంచ‌నుంది. వర్చువల్ సేవలు, వాటి దర్శన స్లాట్లకు సంబంధించిన కోటాను 21న మధ్యాహ్నం 3 గంటలకు విడుద‌ల చేయ‌నున్న‌ట్లు టీటీడీ తెలిపింది. అంగ ప్రదక్షిణ టోకెన్ల కోటాను 23న ఉదయం 10 గంటలకు, శ్రీవాణి ట్రస్టు దర్శన టికెట్ల కోటాను 23న ఉదయం 11 గంటలకు విడుదల చేస్తామ‌ని పేర్కొంది. వ‌యోవృద్ధులు, దివ్యాంగులు, దీర్ఘ‌కాలిక వ్యాధులున్న‌వారు తిరుమల శ్రీ‌వారిని ద‌ర్శించుకునేందుకు వీలుగా ఉచిత‌ ప్ర‌త్యేక ద‌ర్శ‌నం టోకెన్ల కోటాను 23న మధ్యాహ్నం 3 గంట‌ల‌కు టీటీడీ ఆన్‌లైన్‌లో విడుద‌ల చేయ‌నున్న‌ట్లు వివ‌రించింది.

24న ప్రత్యేక ప్రవేశ దర్శన టికెట్ల కోటా విడుదల

ప్రత్యేక ప్రవేశ దర్శన టికెట్ల కోటాను 24న ఉదయం 10 గంటలకు టీటీడీ ఆన్‌లైన్‌లో అందుబాటులో ఉంచ‌నున్న‌ట్లు తిరుమ‌ల తిరుప‌తి దేవ‌స్థానం బోర్డు తెలిపింది. అలాగే, తిరుమల, తిరుపతిల‌లో గదుల కోటాను 24న మధ్యాహ్నం 3 గంటలకు ఆన్‌లైన్‌లో విడుదల చేయ‌నుంది. ttdevasthanams.ap.gov.in వెబ్‌సైట్ ద్వారా శ్రీ‌వారి ఆర్జిత‌సేవ‌లు, ద‌ర్శ‌న టికెట్లు బుక్ చేసుకొని స‌హ‌క‌రించాల‌ని తిరుమ‌ల దేవ‌స్థానం బోర్డు భ‌క్తుల‌కు విజ్ఞ‌ప్తి చేసింది.