Ratha Saptami | తిరుమ‌ల‌లో అంగ‌రంగ వైభ‌వంగా ర‌థ‌స‌ప్త‌మి వేడుక‌లు..

త్రినేత్ర‌.న్యూస్‌: సూర్య జయంతి సందర్భంగా తిరుమలలో (Tirumala) రథసప్తమి (Ratha Saptami) వేడుక‌లు అంగ‌రంగ వైభ‌వంగా జ‌రుగుతున్నాయి. సూర్యోదయం నుంచి చంద్రోదయం వరకు శ్రీమలయప్ప స్వామివారు ఏడు విభిన్న వాహనాలపై తిరుమాడ వీధుల్లో విహరిస్తూ భక్తకోటిని అనుగ్రహించనున్నారు. ఇందులో భాగంగా ఆదివారం తెల్ల‌వారుజామున సూర్య‌ప్ర‌భ వాహ‌నంపై కొలువుదీరిన మ‌ల‌య‌ప్ప స్వామి భ‌క్తుల‌కు అభ‌య‌ప్ర‌దానం చేశారు. వేడుక‌ల‌ను క‌నులారా వీక్షించి త‌రించేందుకు పెద్ద సంఖ్య‌లో భ‌క్తులు త‌ర‌లివ‌చ్చారు.

ఈ వేడుకల‌ నేపథ్యంలో ఆలయ మహద్వారం నుంచి స్వామివారి సన్నిధి వరకు వివిధ ర‌కాల‌ పువ్వులు, విద్యుత్‌ దీపాలతో అలంకరించారు. ఉద‌యం సూర్యప్రభ వాహనం, చిన్నశేష వాహనం, గరుడవాహన సేవ, మధ్యాహ్నం హనుమంత వాహనం, చక్రస్నానం, సాయంత్రం కల్పవృక్ష వాహనం, సర్వభూపాల వాహనం రాత్రి శ్రీవారికి చంద్రవాహన సేవతో వేడుక‌లు ముగియ‌నున్నారు. సూర్యకిరణాలు తాకిన వెంటనే పూర్తిస్థాయిలో వాహనసేవలు ప్రారంభ‌మ‌వుతాయి. ర‌థ‌స‌ప్త‌మి వేడుక‌ల నేప‌థ్యంలో తిరుమ‌ల ఆల‌యంలో పలు సేవలు, ప్రివిలేజ్‌ దర్శనాలు, స్లాటెడ్‌ సర్వదర్శనం, వీఐపీ బ్రేక్‌ దర్శనాల‌ను టీటీడీ రద్దు చేసింది.

అర‌స‌వెళ్లిలో ఘ‌నంగా..

సూర్య భ‌గ‌వానుడు కొలువై ఉన్న‌ అరసవల్లిలో రథసప్తమి వేడుకలు ఘ‌నంగా ప్రారంభమయ్యాయి. ఆలయ పరిసరాలు ఆధ్యాత్మిక శోభతో కళకళలాడుతున్నాయి. ఓ వైపు సూర్యజయంతి.. మరోవైపు ఆదివారం కావ‌డంతో ఆదినారాయణుడి నిజరూపాన్ని చూసేందుకు భక్తులు పోటెత్తారు. శనివారం రాత్రి 9 గంటల నుంచే భ‌క్తులు పెద్ద సంఖ్య‌లో క్యూలైన్లలో నిరీక్షించారు. అర్ధరాత్రి 12.30 గంటలకు దేవస్థానంలో ఆరంభమైన మహాక్షీరాభిషేక సేవ క‌న్నుల‌పండువ‌గాగా సాగింది.