Mumbai Local Train Incident | ‘బ్యాడ్ టచ్’ను ఎదిరించినందుకు రైలు నుంచి యువతిని తోసేశాడు

Mumbai Local Train Incident | త్రినేత్ర న్యూస్ : దేశ ఆర్థిక రాజధాని ముంబైలో మహిళల భద్రతను ప్రశ్నార్థకం చేసే అత్యంత దారుణమైన ఘటన వెలుగుచూసింది. లోకల్ ట్రైన్‌లో తనను అసభ్యంగా తాకుతున్న (Bad Touch) ఓ వ్యక్తిని ఎదిరించినందుకు.. ఆ కీచకుడు యువతిని కదులుతున్న రైలు నుంచి కిందకు తోసేశాడు. నైగావ్ (Naigaon) రైల్వే స్టేషన్ వద్ద జరిగిన ఈ ప్రమాదంలో బాధితురాలు తన ఎడమ చేయిని కోల్పోవడమే కాకుండా, తలకు 16 కుట్లు పడేంత తీవ్రంగా గాయపడింది.

అసలేం జరిగింది?

బాధితురాలు బోరివలి (Borivali) నుంచి విరార్ (Virar) వెళ్తున్న లోకల్ ట్రైన్ ఎక్కింది. రైలు నైగావ్ స్టేషన్‌కు సమీపిస్తుండగా.. నైగావ్ ఈస్ట్‌కు చెందిన 53 ఏళ్ల జితేంద్ర హిర్ముఖే అనే ప్రయాణికుడు ఆమెను పదేపదే అసభ్యంగా తాకడం మొదలుపెట్టాడు.

దీంతో ఆగ్రహించిన యువతి అతడిని నిలదీసింది. "నీకు ఇంట్లో తల్లి, చెల్లి లేరా?" అని ప్రశ్నిస్తూ, అతడిని దూరంగా తరిమేందుకు తన చెప్పుతో కొట్టింది. దీంతో ఇద్దరి మధ్య తీవ్ర వాగ్వాదం జరిగింది. తోటి ప్రయాణికులు సర్దిచెప్పే ప్రయత్నం చేసినా వినని నిందితుడు, బూతులు తిడుతూ తన చెప్పుతో యువతిపై దాడి చేశాడు.

రైలు చక్రాల కింద పడి తెగిన చెయ్యి..

రైలు నైగావ్ స్టేషన్‌కు చేరుకున్న తర్వాత కూడా నిందితుడి వేధింపులు ఆగలేదు. కోపంతో ఊగిపోయిన జితేంద్ర.. యువతిని బలంగా రైలు నుంచి బయటకు తోసేశాడు. దీంతో ఆమె ప్లాట్‌ఫామ్, రెండు కోచ్‌ల మధ్య ఉన్న ఖాళీ స్థలంలో (Gap) పడిపోయింది.

ఆమె తిరిగి ప్లాట్‌ఫామ్ పైకి ఎక్కేందుకు ప్రయత్నిస్తుండగానే రైలు కదలడంతో, ఆమె ఎడమ చెయ్యి చక్రాల కింద పడిపోయింది. ఈ ఘోర ప్రమాదంలో మోచేతి వరకు ఆమె చెయ్యి నుజ్జునుజ్జయి తెగిపోయింది. అక్కడే ఉన్న ఒక పోలీసు అధికారి, తోటి ప్రయాణికులు వెంటనే స్పందించి ఆమెను పైకి లాగి ఆసుపత్రికి తరలించారు.

నా జీవితమే నాశనమైంది: బాధితురాలి ఆవేదన

ఆసుపత్రి బెడ్ పైనుంచి బాధితురాలు తన గోడు వెళ్లబోసుకుంటూ కన్నీరుమున్నీరైంది. "నాకు న్యాయం కావాలి. ఆ ఒక్క ఘటనతో నా జీవితమే నాశనమైపోయింది. మా ఇంటి బాధ్యతలన్నీ నేనే చూసుకునేదాన్ని. ఇప్పుడు ఒంటి చేత్తో నేనేం చేయగలను? నా తలకు 16 కుట్లు పడ్డాయి. నా ఆరోగ్యం కుదుటపడాలని అందరూ ప్రార్థించండి. ఆ దుర్మార్గుడికి కఠిన శిక్ష పడాలి" అని ఆమె ఆవేదన వ్యక్తం చేసింది.

పోలీసుల తీరుపై కుటుంబ సభ్యుల అనుమానం

ప్రమాదం జరిగిన వెంటనే అక్కడి గందరగోళాన్ని ఆసరాగా చేసుకుని నిందితుడు జితేంద్ర పరారయ్యాడు. అయితే, రంగంలోకి దిగిన రైల్వే పోలీసులు (GRP) కొన్ని గంటల్లోనే అతడిని అదుపులోకి తీసుకున్నారు.

మరోవైపు, నిందితుడిపై హత్యాయత్నం (సెక్షన్ 109) కింద కేసు నమోదు చేయకపోవడంపై బాధితురాలి కుటుంబ సభ్యులు అనుమానం వ్యక్తం చేస్తున్నారు. వారు మహారాష్ట్ర నవనిర్మాణ సేన (MNS) నేతల సహాయంతో జీఆర్పీ (GRP) సీనియర్ పోలీస్ ఇన్‌స్పెక్టర్‌ను కలిసి వినతిపత్రం అందించారు. త్వరలోనే నిందితుడిపై మరిన్ని కఠిన సెక్షన్లు జోడిస్తామని పోలీసులు హామీ ఇచ్చినట్లు తెలుస్తోంది.