Under 19 World Cup | ఇదేంద‌య్యా ఇది.. ఎప్పుడూ చూడ‌లేదు.. ఇలా కూడా అవుట్ అవుతారా..?

Under 19 World Cup | హరారేలోని తకాశింగా స్పోర్ట్స్ క్లబ్‌లో జరిగిన అండర్-19 ప్రపంచకప్ మ్యాచ్‌లో ఇంగ్లాండ్ జట్టు విజయంతో టోర్నమెంట్‌ను ప్రారంభించింది. పాకిస్థాన్‌పై 37 పరుగుల తేడాతో ఇంగ్లండ్‌ గెలుపొంద‌గా, మ్యాచ్ చివర్లో చోటు చేసుకున్న ఓ విచిత్ర ఘటన అందరి దృష్టిని ఆకర్షించింది. పాకిస్థాన్ బ్యాటర్ అలీ రజా చేసిన నిర్లక్ష్య తప్పిదం హాస్యాస్పద రన్‌అవుట్‌కు కారణమైంది. ఈ సంఘటన 47వ ఓవర్ మూడో బంతికి చోటు చేసుకుంది. మానీ లంస్డెన్ బౌలింగ్‌లో మొమిన్ ఖమర్ సింగిల్‌కు పిలుపునివ్వగా, అలీ రజా స్ట్రైకర్ ఎండ్‌కు చేరుకున్నాడు. అయితే ఫీల్డర్ విసిరిన త్రోను తప్పించుకునే ప్రయత్నంలో క్రీజ్‌ను వదిలి బయటకు అడుగుపెట్టాడు. బంతి నేరుగా వికెట్‌కీపర్ వద్దకు వెళ్లింది. ఈ అవకాశాన్ని ఇంగ్లాండ్ కెప్టెన్ థామస్ ర్యూ వెంటనే గుర్తించాడు. అలీ రజా క్రీజ్‌కు బయట ఉన్నాడని గ్రహించి, క్షణాల్లో బెయిల్స్‌ను పడగొట్టాడు. బ్యాటర్ తిరిగి క్రీజ్‌లోకి చేరేందుకు ప్రయత్నించినా, అప్పటికే వికెట్లు పడిపోయాయి. దీంతో అలీ రజా అవుట్‌గా వెనుదిరగాల్సి వచ్చింది.

కష్టతరమైన హరారే పిచ్‌పై 210 పరుగుల లక్ష్యాన్ని ఇంగ్లాండ్ సమర్థంగా కాపాడుకుంది. బ్యాటర్లకు అనుకూలించని ఈ పిచ్‌పై పాకిస్థాన్ వికెట్లు నిరంతరంగా కోల్పోయింది. పిచ్‌ను లక్ష్యంగా చేసుకుని బంతులు సంధించిన ఇంగ్లాండ్ బౌలర్లు ప్రత్యర్థిని తీవ్ర ఒత్తిడిలోకి నెట్టారు. అలెక్స్ గ్రీన్ అద్భుతంగా బౌలింగ్ చేస్తూ పాకిస్థాన్ ఓపెనర్లను త్వ‌రగా పెవిలియన్‌కు పంపించాడు. మిగతా బౌలర్లు కూడా కట్టుదిట్టంగా బౌలింగ్ చేస్తూ వికెట్ల వేట కొనసాగించారు. 85 పరుగులకే ఆరు వికెట్లు కోల్పోయిన పాకిస్థాన్, అప్పటికే ఓటమి దిశగా పయనించింది. అయితే కెప్టెన్ ఫర్హాన్ యూసఫ్ ఒక్కడే పోరాడుతూ 86 బంతుల్లో 65 పరుగులతో ఇన్నింగ్స్‌ను నిలబెట్టే ప్రయత్నం చేశాడు. అయినా మరో ఎండ్ నుంచి సహకారం లేకపోవడంతో అతడి పోరాటం ఫలించలేదు.

ముందుగా బ్యాటింగ్ చేసిన ఇంగ్లాండ్‌కు బెన్ డాకిన్స్ శుభారంభం అందించాడు. అయితే పాకిస్థాన్ బౌలర్లు మధ్య మధ్యలో వికెట్లు తీస్తూ ఇంగ్లాండ్‌ను కట్టడి చేశారు. ఈ సమయంలో కాలెబ్ ఫాల్కనర్ నిలకడగా ఆడుతూ 66 పరుగులతో ఇన్నింగ్స్‌కు బలం చేకూర్చాడు. లెగ్ స్పిన్నర్ అహ్మద్ హుస్సేన్ 3 వికెట్లు తీసి ఇంగ్లాండ్ మళ్లీ గాడి తప్పేలా చేశాడు. అయినప్పటికీ, ఇంగ్లాండ్ నిర్ణీత ఓవర్లలో 210 పరుగులు చేయగలిగింది. గ్రూప్-బిలో ఉన్న పాకిస్థాన్ జట్టు జనవరి 19న ఇదే వేదికలో స్కాట్లాండ్‌తో తలపడనుంది. అయితే అలీ రజా ర‌న‌వుట్ వీడియో మాత్రం సామాజిక మాధ్య‌మాల్లో వైర‌ల్‌గా మారింది.

Quality run out to end the game between England and Pakistan in the U19 World Cup. Number 11 decides to get out the way of the throw coming in by just standing out of his crease… 🤦‍♂️ pic.twitter.com/81CA9tCS8E

— TheCricketMen (@thecricketmen) January 16, 2026