T20 World Cup 2026 | టీ20 ప్ర‌పంచ‌క‌ప్ 2026 ముగింపు వేడుక‌లు.. సింగ‌ర్ రికీ మార్టిన్‌తో ప్రోగ్రామ్‌..

T20 World Cup 2026 | దాదాపు నెల రోజుల‌పాటు ఉత్కంఠభరితంగా సాగిన క్రికెట్ పోరాటాల అనంతరం టీ20 ప్రపంచకప్ 2026 తుది దశకు చేరుకుంది. ఆదివారం అహ్మదాబాద్‌లో జరిగే ఫైనల్‌లో భారత్, న్యూజిలాండ్ జట్లు తలపడనున్నాయి. ముంబైలో జరిగిన సెమీఫైనల్‌లో సూర్యకుమార్ యాదవ్ నేతృత్వంలోని భారత జట్టు ఉత్కంఠభరిత పోరులో ఇంగ్లండ్‌ను 7 పరుగుల తేడాతో ఓడించి ఫైనల్‌కు చేరుకుంది. మరోవైపు అంత‌కు ముందు కోల్‌కతాలో జరిగిన మరో సెమీఫైనల్‌లో న్యూజిలాండ్ జట్టు దక్షిణాఫ్రికాపై 9 వికెట్ల తేడాతో ఘన విజయం సాధించింది. టీ20 ప్రపంచకప్ చరిత్రలో భారత్‌కు ఇది నాలుగో ఫైనల్ కాగా, రికార్డు స్థాయిలో మూడో టైటిల్ సాధించాలని లక్ష్యంగా పెట్టుకుంది. మరోవైపు న్యూజిలాండ్ జట్టు రెండోసారి ఫైనల్ ఆడుతుండగా, తమ తొలి ట్రోఫీని సాధించాలనే లక్ష్యంతో బరిలోకి దిగుతోంది.

భార‌త్‌కు అనేక అనుకూల అంశాలు ఉన్నా..

తమ సొంత గడ్డపై ఆడటం, డిఫెండింగ్ ఛాంపియన్ హోదా కలిగి ఉండటం, అలాగే ఇటీవల ద్వైపాక్షిక సిరీస్‌ల్లో కివీస్‌పై విజయాలు సాధించడం వంటి అంశాలు భారత జట్టుకు అనుకూలంగా కనిపిస్తున్నాయి. అయితే చరిత్ర మరో కోణాన్ని చూపిస్తోంది. అంతర్జాతీయ టోర్నమెంట్ మ్యాచ్‌లలో న్యూజిలాండ్ ఇప్పటివరకు భారత్ చేతిలో ఓటమి చవిచూడలేదు. ఈ టోర్నమెంట్‌లో కూడా రెండు జట్లు కొంతకాలం ఒడిదుడుకులను ఎదుర్కొన్నాయి. ప్రారంభ దశల్లోనే నిష్క్రమించే పరిస్థితి ఏర్పడినప్పటికీ, ఆ తర్వాత బలమైన ప్రదర్శనతో తిరిగి పోరాడి ఫైనల్‌కు చేరుకున్నాయి.

ముగింపు వేడుక‌ల్లో గాయ‌కులు..

ఇక ఫైనల్ మ్యాచ్‌కు ముందు టీ20 ప్రపంచకప్ 2026 ముగింపు సందర్భంగా ప్రత్యేక వేడుకల‌ను నిర్వహించనున్నారు. అహ్మ‌దాబాద్‌లోని న‌రేంద్ర మోదీ స్టేడియంలో ఫైన‌ల్ మ్యాచ్ ప్రారంభానికి ముందు మైదానంలో ఈ వేడుక‌లు జ‌ర‌గ‌నున్నాయి. ఈ వేడుకల‌లో ప్రముఖ ప్యూర్టోరికన్ గాయకుడు రికీ మార్టిన్, బాలీవుడ్, పంజాబీ గాయకుడు సుఖ్బీర్, అలాగే ప్రసిద్ధ గుజరాతీ జానపద గాయని ఫాల్గుని పాఠక్ ప్రదర్శనలు ఇవ్వనున్నారు. ఇక టీ20 ప్రపంచకప్ 2026 ముగింపు వేడుకలు సాయంత్రం 5:30 గంటలకు ప్రారంభం కానున్నాయి. మ్యాచ్ రాత్రి 7 గంట‌ల‌కు ప్రారంభం అవుతుంది.