PNG Connection | పీఎన్‌జీ క‌నెక్ష‌న్ అంటే ఏమిటి..? ఇది ఎలా ప‌నిచేస్తుంది..? దీన్ని ఎలా పొందాలి..?

PNG Connection | పశ్చిమ ఆసియాలో కొనసాగుతున్న యుద్ధం ప్రపంచ ఇంధన సరఫరా చెయిన్‌ను తీవ్రంగా ప్రభావితం చేస్తోంది. దీనివల్ల భారతదేశంలో ఎల్‌పీజీ (లిక్విఫైడ్ పెట్రోలియం గ్యాస్) స‌ర‌ఫ‌రాకు తీవ్ర అంత‌రాయం ఏర్ప‌డుతోంది. సరఫరా, బుకింగ్ సమస్యల కారణంగా అనేక నగరాల్లో గ్యాస్ ఏజెన్సీల ఎదుట‌ పొడవైన క్యూలు కనిపిస్తున్నాయి. భార‌త్‌ తన ఎల్‌పీజీ అవసరాల్లో 60 శాతం కంటే ఎక్కువ మొత్తాన్ని దిగుమతి చేసుకుంటుండ‌గా ఇందులో సుమారు 85-90 శాతం హోర్ముజ్ జలసంధి ద్వారానే స‌ర‌ఫ‌రా అవుతుంది. అందువల్ల గల్ఫ్ ప్రాంతంలో కొన‌సాగుతున్న భౌగోళిక ఉద్రిక్తతలు భారత్ పై ప్ర‌భావాన్ని చూపిస్తున్నాయి. ఈ పరిస్థితిని ఎదుర్కోవడానికి ప్రభుత్వం రిఫైనరీలకు దేశీయ ఎల్‌పీజీ ఉత్పత్తిని పెంచాలని, గృహ వంటగ్యాస్ సరఫరాకు ప్రాధాన్యత ఇవ్వాలని ఆదేశించింది. పానిక్ బుకింగ్‌ను తగ్గించేందుకు ఎల్‌పీజీ బుకింగ్‌ల మధ్య కనీసం 25 రోజుల వ్యవధిని అమలు చేసింది. కాగా పీఎన్‌జీ (పైప్డ్ నేచురల్ గ్యాస్) వినియోగాన్ని కేంద్రం ప్ర‌స్తుతం ప్రోత్సహిస్తోంది. ఎల్‌పీజీ ఉన్న‌వారు త‌మ‌కు అందుబాటులో పీఎన్‌జీ స‌ప్లై ఉంటే ఎల్‌పీజీ క‌నెక్ష‌న్‌ను స‌రెండ‌ర్ చేసి పీఎన్‌జీ క‌నెక్ష‌న్‌ను తీసుకోవాల‌ని సూచిస్తోంది.

పీఎన్‌జీ కనెక్షన్ అంటే ఏమిటి?

పీఎన్‌జీ కనెక్షన్ ద్వారా గృహాలకు భూగర్భ పైపుల ద్వారా నిరంతరంగా కొలిచే విధంగా సహజ వాయువు సరఫరా అందుతుంది. దీంతో ఎల్‌పీజీ సిలిండర్ల అవసరం పూర్తిగా తొలగిపోతుంది. ఎల్‌పీజీ మాదిరిగా సిలిండర్లలో నిల్వ చేయకుండా, పీఎన్‌జీ నేరుగా ఇంటికి చేరుతుంది. ఇది మరింత సౌకర్యవంతమైన, విశ్వసనీయమైన పరిష్కారంగా ఉంటుంది. ముఖ్యంగా ఎత్తైన అపార్ట్‌మెంట్ సముదాయాల్లో ఇది సాధారణంగా ఉపయోగంలో ఉంది.

పీఎన్‌జీ ఉన్నవారు ఎల్‌పీజీ సిలిండర్లు వాడ‌కూడ‌దు..

పీఎన్‌జీ సదుపాయం ఉన్న ప్రాంతాల్లో గృహాలు ఆ స‌దుపాయం వైపు మారాలని ప్రభుత్వం ప్రోత్సహిస్తోంది. తాజాగా పెట్రోలియం, సహజ వాయువు మంత్రిత్వ శాఖ ఈ విష‌యంపై ఆదేశాల‌ను జారీ చేసింది. దీని ప్రకారం పీఎన్‌జీ కనెక్షన్ ఉన్న వినియోగదారులు గృహ ఎల్‌పీజీ సిలిండర్లను ఉంచడం, కొత్తగా పొందడం లేదా రీఫిల్ చేయించ‌డాన్ని నిషేధించారు. అలాగే ఆయిల్ కంపెనీలకు కూడా పీఎన్‌జీ ఉన్న వినియోగదారులకు ఎల్‌పీజీ కనెక్షన్లు లేదా రీఫిల్స్‌ ఇవ్వవద్దని ఆదేశాలు జారీ చేశారు. ప్రొపేన్, బ్యూటేన్, ప్రొపిలీన్, బ్యూటీన్స్ వంటి వనరులను ఎల్‌పీజీ పూల్‌కు మళ్లించి, రిఫైనరీలు, పెట్రోకెమికల్ యూనిట్లు ఎల్‌పీజీ ఉత్పత్తిని గరిష్ట స్థాయికి పెంచాలని సూచించింది. ఈ చర్యల ఫలితంగా దేశీయ ఎల్‌పీజీ ఉత్పత్తి సుమారు 25 శాతం పెరిగింది. మొత్తం దేశీయ ఎల్‌పీజీ ఉత్పత్తిని గృహ వినియోగదారులకు మళ్లించారు. ప్రభుత్వం ప్రపంచ పరిస్థితిని నిరంతరం పర్యవేక్షిస్తూ నిరంతర ఇంధన సరఫరా, గృహాల రక్షణ కోసం చర్యలు తీసుకుంటుంద‌ని పేర్కొంది.

ఎల్‌పీజీ, పీఎన్‌జీ మధ్య తేడాలు..

కూర్పు పరంగా పీఎన్‌జీ ప్రధానంగా మీథేన్ వాయువుతో ఉంటుంది. ఎల్‌పీజీ మాత్రం ప్రొపేన్, బ్యూటేన్ మిశ్రమంగా ఉంటుంది. పీఎన్‌జీ పైపుల ద్వారా సరఫరా అవుతుంది. ఎల్‌పీజీని సిలిండర్లలో నిల్వ చేసి పంపిణీ చేస్తారు. పీఎన్‌జీ సాధారణంగా మరింత భద్రతతో, సౌకర్యంతో ఉంటుంది. ఎల్‌పీజీ మాత్రం తరలించడానికి సులభమ‌వుతుంది. ప్రభుత్వం పీఎన్‌జీ వినియోగాన్ని ప్రోత్సహిస్తున్నప్పటికీ ఇది పూర్తిగా మౌలిక వసతులపై ఆధారపడి ఉంటుంది. పైపుల నెట్‌వర్క్ అవసరం ఉన్నందున అన్ని ప్రాంతాల్లో అందుబాటులో ఉండదు. అయినప్పటికీ ప్రభుత్వం గృహాలకు పీఎన్‌జీ సరఫరాకు ప్రాధాన్యత ఇస్తూ మౌలిక వసతులను విస్తరించడానికి చర్యలు తీసుకుంటోంది.

పీఎన్‌జీ కనెక్షన్ ఎలా పొందాలి..?

మొదటగా వినియోగ‌దారులు తాము నివ‌సించే ప్రాంతంలో పీఎన్‌జీ సేవలు అందుబాటులో ఉన్నాయా లేదో ప‌రిశీలించాలి. అందుబాటులో ఉంటే స్థానిక సిటీ గ్యాస్ డిస్ట్రిబ్యూషన్ (సీజీడీ) కంపెనీ వెబ్‌సైట్ లేదా కస్టమర్ పోర్టల్ ద్వారా ఆన్‌లైన్‌లో దరఖాస్తు చేయాలి. అనంతరం అవసరమైన కేవైసీ ధ్రువీకరణ ప్రక్రియను పూర్తి చేయాలి. దరఖాస్తు ఆమోదం పొందిన తర్వాత వినియోగదారుకు బిజినెస్ పార్ట్నర్ (బీపీ) నంబర్ ఇవ్వబడుతుంది. ఇది ప్రత్యేక గుర్తింపు సంఖ్యగా పని చేస్తుంది. ఖాతాను ట్రాక్ చేయడంలో సహాయపడుతుంది. తర్వాత సేవా సంస్థ పైపులు, మీటర్లు వంటి మౌలిక వసతులను ఇన్‌స్టాల్ చేస్తుంది. ఈ ప్రక్రియ పూర్తైన తర్వాత వినియోగ‌దారుల ఇళ్ల‌కు నిరంతర గ్యాస్ సరఫరా ప్రారంభమవుతుంది.