Mutual Funds | 3 ఏళ్లుగా ఎస్ఐపీలో న‌ష్టాలు.. కొన‌సాగించాలా, తీసేయాలా..?

Mutual Funds | ఆర్థిక పరిస్థితులు, కంపెనీల ఆదాయాలు, మార్కెట్‌లోని ఇతర అంశాలపై నెలకొనే విస్తృత అనిశ్చితి స్టాక్ మార్కెట్ రాబడులను ప్రభావితం చేస్తుంది. దీంతో మార్కెట్లలో పెట్టుబడులు పెట్టిన వారి పోర్ట్‌ఫోలియో ఆశించిన స్థాయిలో పనితీరు కనబరచదు. అందుకే పెట్టుబడుల రాబడులు వ్య‌క్తిగ‌త‌ అంచనాలకు అనుగుణంగా ఉన్నాయా లేదా తెలుసుకునేందుకు ఎప్పటికప్పుడు పోర్ట్‌ఫోలియోను సమీక్షించడం మంచిది. మ్యూచువల్ ఫండ్లలో పెట్టుబడి పెడుతూ, అవి మూడేళ్లుగా ఆశించిన స్థాయిలో పనితీరు కనబరచకపోతే, ఇకపై వాటిలో కొనసాగాలా అనే సందేహం వ‌స్తుంది. అయితే వెంటనే పెట్టుబడిని నిలిపివేయడం ప్రతిసారి సరైన నిర్ణయం కాదు. నిర్ణయం తీసుకునే ముందు కొన్ని అంశాలను పరిశీలించాలి. ముందుగా ఫండ్ బెంచ్‌మార్క్‌ను చూడాలి. ఫండ్ రాబడిని ఒంటరిగా పరిశీలించకుండా, అదే కాలంలో అది అనుసరించే బెంచ్‌మార్క్‌తో పోల్చి చూడాలి. బెంచ్‌మార్క్ కూడా తక్కువ రాబడిని అందించి ఉంటే, సమస్య మొత్తం మార్కెట్ లేదా ఆ విభాగంలో ఉండే అవకాశం ఉంది. అయితే ఫండ్ వరుసగా బెంచ్‌మార్క్ కంటే వెనుకబడి ఉంటే, దానిని మరింత లోతుగా పరిశీలించాల్సి ఉంటుంది.

కార‌ణాల‌ను ప‌రిశీలించాలి..

ఫండ్ ఎందుకు వెనుకబడిందో కూడా తెలుసుకోవాలి. ఫండ్ తన పెట్టుబడి వ్యూహాన్ని మార్చిందా, ఫండ్ మేనేజర్ మారారా, పోర్ట్‌ఫోలియోలో మార్పులు చేశారా లేదా రిస్క్ స్థాయిలో మార్పు వచ్చిందా అనే అంశాలను పరిశీలించాలి. అలాగే మొదట పెట్టుబడి పెట్టిన లక్ష్యాన్ని మరోసారి సమీక్షించాలి. ప్రస్తుతం ఆ పెట్టుబడి వ్య‌క్తిగ‌త ఆర్థిక లక్ష్యానికి, పెట్టుబడి కాలవ్యవధికి, భరించగలిగే రిస్క్ స్థాయికి సరిపోతుందా లేదా అనేది చూడాలి. మొత్తం పోర్ట్‌ఫోలియోను కూడా పరిశీలించడం అవసరం. ఒక ఫండ్ సరిగా పనిచేయకపోవడం వల్ల మొత్తం పోర్ట్‌ఫోలియోను మార్చాల్సిన అవసరం ఉండదు. ఆ ఫండ్ మొత్తం పెట్టుబడుల రాబడిపై ఎంత ప్రభావం చూపిందో పరిశీలించి, ఆ తర్వాత నిర్ణయం తీసుకోవాలి. ముఖ్యంగా స్వల్పకాలిక భావోద్వేగాల ఆధారంగా నిర్ణయాలు తీసుకోకూడ‌దు. మార్కెట్లు చక్రాల ఆధారంగా కదులుతుంటాయి. అందువల్ల దీర్ఘకాలంలో కూడా కొంతకాలం అనిశ్చిత పరిస్థితులు కొనసాగుతాయి. పెట్టుబడి లక్ష్యం దీర్ఘకాలికమైనదైతే, కొంతకాలం రాబడి తక్కువగా ఉందనే కారణంతో ఎస్‌ఐపీని నిలిపివేయడం కొన్ని సందర్భాల్లో పోర్ట్‌ఫోలియోపై ప్రతికూల ప్రభావం చూపిస్తుంది.

అందువల్ల మ్యూచువల్ ఫండ్ పనితీరు ఎందుకు తగ్గిందనే అసలు కారణాన్ని అర్థం చేసుకున్న తర్వాతే ఎస్‌ఐపీని నిలిపివేయాలా లేదా కొనసాగించాలా అనే నిర్ణయం తీసుకోవాలి. మొత్తం మార్కెట్‌ల‌నే ప్రతికూల పరిస్థితులు ప్రభావితం చేస్తున్నట్లయితే, ఓపికగా ఉండి దీర్ఘకాలిక దృష్టితో పెట్టుబడిని పరిశీలించాల్సి ఉంటుంది. అయితే సమస్య ఫండ్ పనితీరులోనే ఉంటే, దానిని సమీక్షించి, అవసరాన్ని బట్టి ఎస్‌ఐపీలో మార్పులు చేసుకోవచ్చు.