PAN Card | ఇక దాదాపు ప్ర‌తి ఆర్థిక లావాదేవీకీ పాన్ కార్డు.. ఈ ఏడాది నుంచి అమ‌లవుతున్న కొత్త రూల్స్ ఇవే..

PAN Card | దేశంలో ఆర్థిక లావాదేవీలపై మరింత పారదర్శకత తీసుకురావాలనే లక్ష్యంతో కేంద్ర ప్రభుత్వం 2026 కొత్త ఆదాయపు పన్ను నిబంధనలను అమల్లోకి తీసుకొచ్చింది. ఈ కొత్త నిబంధనల ప్రకారం పాన్ (PAN) కార్డ్‌కు సంబంధించిన నియమాల్లో కీలక మార్పులు జరిగాయి. కొన్ని లావాదేవీలలో పాన్ అవసరాన్ని తగ్గించినప్పటికీ, అధిక విలువ కలిగిన అనేక ఆర్థిక కార్యకలాపాలకు పాన్‌ను తప్పనిసరి చేసింది. గతంలో పాన్ లేని వారు ఫామ్ 60ని ఉపయోగించే అవకాశం ఉండేది. ఇప్పుడు దాని స్థానంలో కొత్త ఫామ్ 97ను ప్రవేశపెట్టారు. అయితే ఫామ్ 97 అన్ని సందర్భాల్లో చెల్లుబాటు కాకపోవడంతో ప్రజలు కొత్త నిబంధనలను తప్పనిసరిగా తెలుసుకోవాల్సిన అవసరం ఉంది. ఇప్పటివరకు పాన్ వివరాలు ఇవ్వాల్సిన కొన్ని సాధారణ లావాదేవీలకు ప్రభుత్వం ఉపశమనం కల్పించింది. విదేశీ కరెన్సీ కొనుగోలు, నగదు రూపంలో బ్యాంక్ డ్రాఫ్ట్‌లు లేదా పే ఆర్డర్లు కొనుగోలు చేయడం, కొన్ని ప్రీపెయిడ్ పేమెంట్ ఇన్‌స్ట్రుమెంట్లకు సంబంధించిన లావాదేవీలలో నియంత్రణలు సడలించబడ్డాయి. దీంతో సాధారణ ప్రజలకు రోజువారీ ఆర్థిక కార్యకలాపాలు మరింత సులభం కానున్నాయి.

విలాస‌వంత‌మైన వ‌స్తువుల‌ను కొంటే..

తక్కువ ప్రమాదం ఉన్న లావాదేవీలకు అధిక డాక్యుమెంటేషన్ అవసరం లేదని ప్రభుత్వం భావిస్తోంది. దీనివల్ల బ్యాంకింగ్ ప్రక్రియలు కూడా వేగవంతం అయ్యే అవకాశం ఉంది. కొత్త నిబంధనల ప్రకారం రూ.2 లక్షలకు మించిన వస్తువులు లేదా సేవల కొనుగోలుకు పాన్ నంబర్ ఇవ్వడం తప్పనిసరి అయింది. పెద్ద మొత్తంలో ఖర్చులను పర్యవేక్షించడం ద్వారా పన్ను ఎగవేతను అరికట్టాలని ప్రభుత్వం లక్ష్యంగా నిర్దేశించుకుంది. ఖరీదైన వస్తువులు కొనుగోలు చేసే వ్యక్తుల వివరాలు నేరుగా ఆదాయపు పన్ను శాఖకు అందుబాటులోకి వచ్చే అవకాశం ఉంటుంది. ముఖ్యంగా బంగారు ఆభరణాలు, విలాసవంతమైన వస్తువులు, పెద్ద మొత్తంలో నగదు లావాదేవీలపై ఈ నిబంధన ప్రభావం ఎక్కువగా ఉంటుంది. దీంతో ఆర్థిక లావాదేవీలలో పారదర్శకత పెరగడంతోపాటు అక్రమ ధన ప్రవాహాన్ని నియంత్రించవచ్చని ప్రభుత్వం చెబుతోంది. బంగారు ఆభరణాల కొనుగోలుకు సంబంధించి కూడా నిబంధనలు మరింత కఠినతరం అయ్యాయి. రూ.2 లక్షలకు మించిన విలువ క‌లిగిన బంగారం కొనుగోలు చేస్తే పాన్ సమర్పించడం తప్పనిసరి. ఈ సందర్భంలో ఫామ్ 97ను ఉపయోగించే అవకాశం ఉండదు.

అధిక విలువ క‌లిగిన బంగారం కొనుగోళ్ల‌లో..

అధిక విలువ క‌లిగిన బంగారం కొనుగోళ్లలో నల్లధనం వినియోగం జరిగే అవకాశాలు ఎక్కువగా ఉంటాయని ప్రభుత్వం భావిస్తోంది. అందువల్ల జువెలర్లకు కూడా వినియోగదారుల వివరాలను రికార్డుల రూపంలో నిర్వహించే బాధ్యత ఉంటుంది. ఖరీదైన బంగారు ఆభరణాలు కొనుగోలు చేయాలనుకునేవారు ముందుగానే తమ పాన్ కార్డ్ సిద్ధంగా ఉంచుకోవాల్సి ఉంటుంది. పెట్టుబడులకు సంబంధించిన అనేక అంశాల్లో కూడా పాన్ ఇప్పుడు అత్యంత కీలకంగా మారింది. డీమ్యాట్ ఖాతా ప్రారంభించడం, క్రెడిట్ కార్డ్ కోసం దరఖాస్తు చేయడం, రూ.50వేల‌కు మించిన మ్యూచువల్ ఫండ్లు లేదా బాండ్లలో పెట్టుబడులు పెట్టడం వంటి సందర్భాల్లో పాన్ తప్పనిసరి. ప్రధాన పెట్టుబడి లావాదేవీలన్నింటినీ పాన్‌తో అనుసంధానం చేయడం ద్వారా పెట్టుబడిదారుల గుర్తింపును క‌చ్చితంగా నిర్ధారించాలని ప్రభుత్వం భావిస్తోంది. దీంతో పన్ను సంబంధిత అక్రమాలు తగ్గే అవకాశం ఉంటుంది. పాన్ లేకుండా ఇటువంటి పెట్టుబడులు చేయడం కష్టతరం అవుతాయి. అందుకే పెట్టుబడిదారులు తమ పాన్, ఆధార్ వివరాలను తాజాగా ఉంచుకోవాలి.

రూ.10 ల‌క్ష‌ల‌కు మించి న‌గ‌దుకు..

బ్యాంకింగ్ లావాదేవీల విషయంలో కూడా పాన్ ప్రాముఖ్యత మరింత పెరిగింది. బ్యాంక్ ఖాతాల‌లో రూ.10 లక్షలకు మించిన నగదు జమ లేదా నగదు ఉపసంహరణ చేస్తే పాన్ వివరాలు ఇవ్వడం తప్పనిసరి. అలాగే రూ.1 లక్షకు మించిన సెక్యూరిటీస్ లావాదేవీలు, అన్‌లిస్టెడ్ షేర్ల కొనుగోలు లేదా విక్రయాలకు కూడా పాన్ అవసరం ఉంటుంది. పెద్ద మొత్తంలో జరిగే ధన లావాదేవీలను పర్యవేక్షించడం ప్రభుత్వ ప్రధాన ఉద్దేశం. అనుమానాస్పద లావాదేవీలను గుర్తించడం, పన్ను ఎగవేతను అరికట్టడం మరింత సులభం అవుతుంది. బ్యాంకులు, ఆర్థిక సంస్థలు కూడా ఇటువంటి లావాదేవీలను సంబంధిత అధికారులకు నివేదించాల్సి ఉంటుంది. పాత ఫామ్ 60 స్థానంలో కొత్త ఫామ్ 97ను ప్రవేశపెట్టారు. ఈ ఫామ్‌ను మరింత డిజిటల్, సులభమైన విధానంలో రూపొందించినట్లు ప్రభుత్వం తెలిపింది. అనేక వివరాల‌ను ముందుగానే ఆటోమేటిక్‌గా నింపే అవకాశం ఉండటంతో పొరపాట్లు తగ్గుతాయి. అయితే అధిక విలువ క‌లిగిన‌ లావాదేవీలకు ఫామ్ 97 సరిపోదని, అక్కడ తప్పనిసరిగా పాన్ అవసరమని ప్రభుత్వం స్పష్టం చేసింది. అంటే ఫామ్ 97 వినియోగం పరిమిత సందర్భాలకు మాత్రమే వర్తించనుంది.

ప్ర‌తి ఆర్థిక లావాదేవీతో లింకు..

కొత్త పాన్ నిబంధనలు సాధారణ పౌరులు, పెట్టుబడిదారులు, వ్యాపారులపై నేరుగా ప్రభావం చూపనున్నాయి. భవిష్యత్తులో పెద్ద మొత్తాల ఆర్థిక లావాదేవీల‌ను పాన్ లేకుండా నిర్వహించడం మరింత కష్టమవుతుంది. ఇంకా పాన్ కార్డ్ పొందని వారు త్వరగా దరఖాస్తు చేసుకోవడం మంచిది. అలాగే పాన్-ఆధార్ లింకింగ్ వంటి ప్రక్రియలను కూడా సమయానికి పూర్తి చేయాలి. రానున్న కాలంలో దాదాపు ప్రతి ప్రధాన ఆర్థిక లావాదేవీని పాన్‌తో అనుసంధానం చేసే దిశగా ప్రభుత్వం మరిన్ని చర్యలు తీసుకునే అవకాశం కూడా ఉంది.