UPI Tap and Pay | ఇంటర్నెట్ లేకున్నా యూపీఐ చెల్లింపులు.. ఆర్‌బీఐ కొత్త ఫీచర్‌ ఇదే..

UPI Tap and Pay | ఇకపై ఫోన్‌లో యాక్టివ్‌ ఇంటర్నెట్‌ కనెక్షన్‌ లేకపోయినా యూపీఐ ద్వారా చెల్లింపులు చేయడం మరింత సులభం కానుంది. రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) యూపీఐ ట్యాప్‌ అండ్‌ పే పేరుతో కొత్త సదుపాయాన్ని అందుబాటులోకి తీసుకొచ్చింది. ఎన్‌ఎఫ్‌సీ సదుపాయం ఉన్న స్మార్ట్‌ఫోన్‌ను అన్‌లాక్‌ చేసి, ఎన్‌ఎఫ్‌సీకి అనుకూలమైన పాయింట్‌ ఆఫ్‌ సేల్‌ (పీఓఎస్‌) మెషీన్‌పై ట్యాప్‌ చేయడం ద్వారా చెల్లింపు చేయవచ్చు. ఆర్‌బీఐ గవర్నర్‌ సంజయ్‌ మల్హోత్రా డిజిటల్‌ చెల్లింపులను మరింత సులభతరం చేయడం, కస్టమర్‌ సేవలు, భద్రతను మెరుగుపరచడమే లక్ష్యంగా రెండు కొత్త సదుపాయాలను ప్రకటించారు. యూపీఐ ట్యాప్‌ అండ్‌ పే అంటే ప్రతిచోటా ఇంటర్నెట్‌ లేకుండా యూపీఐ పనిచేస్తుందని కాదు. చెల్లింపు సమయంలో వినియోగదారుడి ఫోన్‌లో మొబైల్‌ ఇంటర్నెట్‌ అవసరం ఉండదు. అయితే లావాదేవీని ప్రాసెస్‌ చేయడానికి పీఓఎస్‌ మెషీన్‌కు ఉన్న ఇంటర్నెట్‌ కనెక్షన్‌ను ఉపయోగిస్తారు.

ఎలా ప‌నిచేస్తుంది..

కొత్త సదుపాయం కాంటాక్ట్‌లెస్‌ కార్డు చెల్లింపు తరహాలో యూపీఐ లావాదేవీని నిర్వహించేలా రూపొందించారు. ఎన్‌ఎఫ్‌సీ ఉన్న స్మార్ట్‌ఫోన్‌ను అన్‌లాక్‌ చేసి, అనుకూలమైన పీఓఎస్‌ టెర్మినల్‌కు ట్యాప్‌ చేస్తే చెల్లింపు ప్రక్రియ ప్రారంభమవుతుంది. ఆ లావాదేవీని పూర్తి చేసేందుకు పీఓఎస్‌ టెర్మినల్‌ ఇంటర్నెట్‌ కనెక్షన్‌ను ఉపయోగిస్తుంది. యూపీఐతో అనుసంధానమైన వివిధ రకాల ఖాతాలకు ఈ సదుపాయం మద్దతు ఇస్తుంది. యూపీఐకి అనుసంధానించిన రూపే క్రెడిట్‌ కార్డులు కూడా ఇందులో ఉన్నాయి. చిన్న మొత్తాల చెల్లింపుల కోసం రూ.5వేల వరకు యూపీఐ పిన్‌ నమోదు చేయకుండానే లావాదేవీ చేయవచ్చు. రూ.5వేల కంటే ఎక్కువ మొత్తానికి మాత్రం పీఓఎస్‌ టెర్మినల్‌లో యూపీఐ పిన్‌ నమోదు చేయాల్సి ఉంటుంది. దీంతో ముఖ్యంగా మొబైల్‌ డేటా అందుబాటులో లేని సమయంలో భౌతిక దుకాణాల్లో చెల్లింపులు చేసే వినియోగదారులకు యూపీఐ మరింత సౌకర్యవంతంగా మారే అవకాశం ఉంటుంది.

ట్యాప్ అండ్ పే స‌దుపాయంతో..

ట్యాప్‌ అండ్‌ పే సదుపాయంతో పాటు ఆర్‌బీఐ మైయూపీఐని కూడా పరిచయం చేసింది. ఇది నేషనల్‌ పేమెంట్స్‌ కార్పొరేషన్‌ ఆఫ్‌ ఇండియా (ఎన్‌పీసీఐ) అభివృద్ధి చేసిన కృత్రిమ మేధ ఆధారిత కస్టమర్‌ సపోర్ట్‌ ప్లాట్‌ఫామ్‌. ఎన్‌పీసీఐకి చెందిన ఫిమి స్మాల్‌ లాంగ్వేజ్‌ మోడల్‌ ఆధారంగా మైయూపీఐని రూపొందించారు. వినియోగదారుల వివిధ బ్యాంకులు, యూపీఐ యాప్‌లలో ఉన్న లావాదేవీలు, ఆటోపే ఆదేశాలకు సంబంధించిన సమాచారాన్ని ఒకే చోట అందించడం మైయూపీఐ ప్రధాన లక్ష్యం. దీంతో చెల్లింపులపై వినియోగదారులకు మరింత నియంత్రణ కల్పించే పలు సదుపాయాలు ఇందులో ఉంటాయి. వాటిలో సేఫ్టీ స్విచ్‌ కీలకమైనది. తమ ఖాతా భద్రతకు ముప్పు ఏర్పడిందని అనుమానం వచ్చినప్పుడు యూపీఐ డెబిట్‌ లావాదేవీలను తిరస్కరించేలా వినియోగదారులు ఈ సదుపాయం ద్వారా అభ్యర్థించవచ్చు. అలాగే యూపీఐ నంబర్‌ డీలింక్‌ ద్వారా మొబైల్‌ నంబర్‌ ఆధారంగా యూపీఐ చెల్లింపులు అందుకోవడాన్ని నిలిపివేయవచ్చు.

ఆటోమేటెడ్ ఛార్జ్‌బ్యాక్‌..

చెల్లింపు పూర్తయ్యే ముందు లబ్ధిదారుడికి సంబంధించిన అదనపు సమాచారాన్ని కూడా మైయూపీఐ వినియోగదారులకు అందిస్తుంది. అర్హత ఉన్న లావాదేవీలకు ఆటోమేటెడ్‌ ఛార్జ్‌బ్యాక్‌ ప్రక్రియకు కూడా ఈ ప్లాట్‌ఫామ్‌ మద్దతు ఇస్తుంది. ట్రాన్సాక్షన్‌ రీప్లే అనే మరో సదుపాయం ద్వారా గతంలో చేసిన లావాదేవీని గుర్తించి, ఏదైనా యూపీఐ యాప్‌ ద్వారా అదే లావాదేవీని మళ్లీ నిర్వహించే అవకాశం ఉంటుంది. భారత్‌లో డిజిటల్‌ చెల్లింపుల వ్యవస్థలో యూపీఐ కీలకంగా మారింది. ఎన్‌పీసీఐ ప్రకారం దేశంలోని డిజిటల్‌ లావాదేవీల్లో 89 శాతం యూపీఐ ద్వారా జరుగుతున్నాయి. ఈ నేపథ్యంలో తాజాగా ప్రవేశపెట్టిన సదుపాయాలు కేవలం డిజిటల్‌ చెల్లింపులను అందుబాటులోకి తీసుకురావడానికే పరిమితం కాకుండా, భౌతిక టెర్మినల్స్‌ వద్ద చెల్లింపులను సులభతరం చేయడం, కస్టమర్‌ సేవలను మెరుగుపరచడం, ఖాతాలపై వినియోగదారులకు మరింత నియంత్రణ కల్పించడంపై దృష్టి సారిస్తున్నాయి.

భార‌తీయ‌ భాష‌ల్లో అందుబాటులో..

మైయూపీఐని కేవలం కస్టమర్‌ సపోర్ట్‌ సేవగా కాకుండా ట్రస్ట్‌ అండ్‌ కంట్రోల్‌ లేయర్ గా రూపొందిస్తున్నట్లు ఎన్‌పీసీఐ తెలిపింది. 24 గంటలూ, వివిధ భారతీయ భాషల్లో సహాయం అందించడంతోపాటు స్వయంగా సేవలను వినియోగించుకునే అవకాశాలను ఇది కల్పిస్తుంది. యూపీఐ ఆథెంటికేషన్‌ను సులభతరం చేసే ప్రయత్నాల్లో భాగంగానే ఈ కొత్త సదుపాయాలు వచ్చాయి. జీఎఫ్‌ఎఫ్‌ 2025లో యూపీఐ కోసం బయోమెట్రిక్‌ ఆథెంటికేషన్‌ను ప్రారంభించారు. గ‌త ఆగస్టు 31 నాటికి బయోమెట్రిక్‌ ద్వారా ధ్రువీకరించిన యూపీఐ లావాదేవీల సంఖ్య 629 కోట్లను దాటినట్లు ఎన్‌పీసీఐ తెలిపింది. ట్యాప్‌ అండ్‌ పే, మైయూపీఐ సదుపాయాలు యూపీఐలో కొత్త దశకు సంకేతంగా నిలుస్తున్నాయి. ఇప్పటివరకు చెల్లింపులను వేగంగా నిర్వహించడంపై ప్రధానంగా దృష్టి పెట్టిన యూపీఐ వ్యవస్థ.. ఇకపై చెల్లింపులను మరింత సౌకర్యవంతంగా, సురక్షితంగా మార్చడంతోపాటు వాటిని సులభంగా నిర్వహించుకునే అవకాశాలను కూడా వినియోగదారులకు అందించనుంది.