Stock Market | స్టాక్ మార్కెట్ల‌లో అస్థిర‌త ఉన్నా.. బ్రోకరేజీల ఫేవరెట్ షేర్లు ఇవే..

Stock Market | మార్కెట్‌లో కొనసాగుతున్న అస్థిరత మధ్య కూడా వినియోగం, ఇన్‌ఫ్రాస్ట్రక్చర్, రిటైల్, సిమెంట్ రంగాలకు చెందిన కొన్ని ఎంపిక చేసిన షేర్లపై బ్రోకరేజీ సంస్థలు ఆశావహంగా ఉన్నాయి. ప్రముఖ విశ్లేషకుల అంచనాల ప్రకారం ఈ షేర్లలో ప్రస్తుత స్థాయిల నుంచి గణనీయమైన పెరుగుదల అవకాశాలు కనిపిస్తున్నాయి. ప్రముఖ బ్రోకరేజీ సంస్థలు సిఫార్సు చేసిన కొన్ని స్టాక్స్‌ను పరిశీలిస్తే.. ఎలారా సెక్యూరిటీస్ సంస్థ పేజ్ ఇండస్ట్రీస్ లిమిటెడ్ కు బై రేటింగ్‌ను కొనసాగించింది. ఈ స్టాక్‌కు రూ.46వేల టార్గెట్ ధరను నిర్ణయించింది. ప్రస్తుతం ఈ షేర్ ధర రూ.38,320 వద్ద ఉండగా, దాదాపు 20 శాతం వరకు పెరుగుదల అవకాశముందని అంచనా వేసింది.

ఐటీసీ షేర్‌కు మోర్గాన్ స్టాన్లీ ఈక్వల్-వెయిట్ రేటింగ్ ఇచ్చింది. ఈ స్టాక్‌కు రూ.346 టార్గెట్ ధరను నిర్దేశించింది. ప్రస్తుతం మార్కెట్ ధర రూ.308గా ఉండగా, సుమారు 12 శాతం అప్‌సైడ్ అవకాశాన్ని సూచించింది. జేకే లక్ష్మీ సిమెంట్ కు ఎలారా సెక్యూరిటీస్ అక్యుములేట్ రేటింగ్‌ను ఇచ్చింది. ఈ షేర్‌కు రూ.734 టార్గెట్ ధరను నిర్ణయించగా, ప్రస్తుత ధర రూ.620గా ఉంది. దీంతో సుమారు 18 శాతం వరకు పెరుగుదల అవకాశముందని పేర్కొంది. నైకాకు నువామా తన బై కాల్‌ను పునరుద్ఘాటించింది. ఈ షేర్‌కు రూ.321 టార్గెట్ ధరను నిర్ణయించింది. ప్రస్తుతం స్టాక్ రూ.274 వద్ద ట్రేడవుతుండగా, దాదాపు 17 శాతం అప్‌సైడ్ అవకాశం ఉందని తెలిపింది.

పీఎన్‌సీ ఇన్‌ఫ్రాటెక్ కు యాక్సిస్ సెక్యూరిటీస్ బై సిఫార్సును కొనసాగించింది. ఈ స్టాక్‌కు రూ.245 టార్గెట్ ధరను నిర్ణయించింది. ప్రస్తుతం మార్కెట్ ధర రూ.212గా ఉండగా, దాదాపు 15 శాతం వరకు పెరుగుదల అవకాశం ఉందని అంచనా వేసింది. అయితే స్టాక్స్‌లో పెట్టుబ‌డులు పెట్టే ముందు పెట్టుబ‌డిదారులు నిపుణుల స‌ల‌హా తీసుకోవ‌డం మంచిది.