RBI | ఆర్బీఐ కీలక నిర్ణయం.. బ్యాంకులకు కొత్త సీఆర్‌ఆర్ నిబంధన..

RBI | భారతీయ రిజర్వ్ బ్యాంక్ కీలక నిర్ణయం తీసుకుంది. అక్టోబర్ 16 నుంచి బ్యాంకులు రోజువారీగా అవసరమైన నగదు నిల్వ నిష్పత్తి (సీఆర్‌ఆర్)లో 99 శాతం తప్పనిసరిగా నిర్వహించాల్సి ఉంటుందని ప్రకటించింది. ప్రస్తుతం ఈ పరిమితి 90 శాతంగా ఉంది. బ్యాంకింగ్ వ్యవస్థలో ప్రస్తుత ద్రవ్య లభ్యత పరిస్థితిని సమీక్షించిన అనంతరం ఈ నిర్ణయం తీసుకున్నట్లు ఆర్బీఐ తెలిపింది. ప్రస్తుత ద్రవ్య లభ్యత పరిస్థితులను సమీక్షించిన అనంతరం అక్టోబర్ 16 నుంచి ప్రారంభమయ్యే పక్ష కాలానికి అవసరమైన సీఆర్‌ఆర్‌లో కనీస రోజువారీ నిర్వహణను 90 శాతం నుంచి 99 శాతానికి పెంచాలని నిర్ణయించామ‌ని ఆర్బీఐ ఒక ప్రకటనలో వెల్లడించింది.

రోజూ క‌నీసం 90 శాతం ఉండాల్సిందే..

ప్రస్తుతం షెడ్యూల్డ్ బ్యాంకులు ఒక పక్ష కాలంలో ప్రతి రోజూ అవసరమైన సీఆర్‌ఆర్‌లో కనీసం 90 శాతం నిర్వహించాలి. అదే సమయంలో, ఆ పక్ష కాలంలో రోజువారీగా నిర్వహించిన సీఆర్‌ఆర్ సగటు ఆర్బీఐ నిర్దేశించిన పూర్తి సీఆర్‌ఆర్ కంటే తక్కువగా ఉండకూడదు. తాజాగా రోజువారీ నిర్వహణ పరిమితిని 99 శాతానికి పెంచడం ద్వారా బ్యాంకింగ్ వ్యవస్థలో ఉన్న అదనపు ద్రవ్య లభ్యత కొంత తగ్గే అవకాశం ఉంది. అక్టోబర్ 8 నాటికి బ్యాంకింగ్ వ్యవస్థలో సుమారు రూ.3.88 లక్షల కోట్ల మేర అదనపు ద్రవ్య లభ్యత ఉంది. గత రెండు నెలలుగా బ్యాంకింగ్ వ్యవస్థలోని అదనపు ద్రవ్య లభ్యతను తగ్గించేందుకు ఆర్బీఐ పలు చర్యలు చేపడుతోంది. ఇందులో భాగంగా వేరియబుల్ రేట్ రివర్స్ రెపో వేలం, ఓపెన్ మార్కెట్ ఆపరేషన్ల ద్వారా బాండ్ల కొనుగోలు వంటి చర్యలను నిర్వహించింది. ఈ వారం ప్రారంభంలో ఆర్బీఐ గవర్నర్ సంజయ్ మల్హోత్రా కూడా బ్యాంకింగ్ వ్యవస్థలోని అదనపు ద్రవ్య లభ్యత 2027 ఆర్థిక సంవత్సరం ముగిసే వరకు కొనసాగదని స్పష్టం చేశారు. అయితే, నగదు నిల్వ నిష్పత్తిని పెంచడం తమకు చివరి ప్రాధాన్యత కలిగిన చర్య అని ఆయన పేర్కొన్నారు.

ఎఫ్‌సీఎన్ఆర్ (బి)తో భారీగా డిపాజిట్లు..

బ్యాంకులు ఎఫ్‌సీఎన్‌ఆర్ (బి) డిపాజిట్లను భారీగా సమీకరించడం వల్ల బ్యాంకింగ్ వ్యవస్థలో పెద్ద మొత్తంలో ద్రవ్య లభ్యత ఏర్పడింది. ఈ డిపాజిట్ల ద్వారా విదేశీ కరెన్సీ దేశంలోకి రావడంతోపాటు, ఆ తర్వాత ఆర్బీఐతో జరిగిన స్వాప్ లావాదేవీల ద్వారా బ్యాంకులకు రూపాయి ద్రవ్య లభ్యత అందుబాటులోకి వచ్చింది. ఎఫ్‌సీఎన్‌ఆర్ (బి) నిధుల ప్రవాహంతోపాటు, నెలాఖరులో ప్రభుత్వ వ్యయం కూడా బ్యాంకింగ్ వ్యవస్థలో ద్రవ్య లభ్యతను పెంచింది. ముఖ్యంగా ప్రభుత్వ ఉద్యోగుల జీతాలు, పెన్షన్ల చెల్లింపులు వంటి వ్యయాలు వ్యవస్థలోకి అదనపు నిధులు రావడానికి కారణమయ్యాయి.