Nvidia | జెన్సన్ హువాంగ్ వివాదం.. ఎన్విడియా షేర్లు పతనమవుతాయా?

Nvidia | ఎన్విడియా సీఈఓ జెన్సన్ హువాంగ్ చుట్టూ నెలకొన్న వివాదం అంతర్జాతీయ టెక్నాలజీ, స్టాక్ మార్కెట్లలో కలకలం రేపుతోంది. చైనా నిఘా సంస్థలతో సంబంధాలున్నాయనే అనుమానాలు, ఆయన వ్యక్తిగత సంబంధాలపై వెలువడిన కథనాల నేపథ్యంలో ఎన్విడియా బోర్డు స్వతంత్ర దర్యాప్తునకు ఆదేశించింది. ఈ పరిణామాల ప్రభావంతో సోమవారం ట్రేడింగ్‌కు ముందే ఎన్విడియా షేర్లు అంతర్జాతీయ ఆఫ్-అవర్స్ ట్రేడింగ్‌లో సుమారు 3.4 శాతం పడిపోయాయి. మరి అమెరికా మార్కెట్లు ప్రారంభమైన తర్వాత కూడా ఇదే ఒత్తిడి కొనసాగుతుందా అన్నది ఆసక్తికరంగా మారింది.

అస‌లేం జ‌రిగింది..?

ప్రపంచంలోనే అత్యంత విలువైన చిప్ తయారీ సంస్థల్లో అగ్రస్థానంలో ఉన్న ఎన్విడియాకు జెన్సన్ హువాంగ్ నాయకత్వం కీలకం. అయితే తాజాగా ఆయనకు సింగపూర్‌కు చెందిన మెగాస్పీడ్ మాజీ ఎగ్జిక్యూటివ్ ఆలిస్ హువాంగ్‌తో సన్నిహిత సంబంధాలున్నాయని, ఆమె చైనా నిఘా వ్యవస్థకు సమాచారం అందించిన వ్యక్తి అయి ఉండొచ్చని అమెరికా నిఘా వర్గాలు అనుమానిస్తున్నట్లు వార్తలు వెలువడ్డాయి. ఈ నేపథ్యంలో హువాంగ్ తన భార్యకు ద్రోహం చేసినట్లు ఉద్యోగులకు పంపిన సందేశంలో అంగీకరించి క్షమాపణలు చెప్పారు. మరోవైపు, ఈ వ్యవహారంలో అమెరికా జాతీయ భద్రతకు లేదా ఎన్విడియా రహస్యాలకు ఎలాంటి ముప్పు వాటిల్లింది అనే అంశాన్ని పరిశీలించేందుకు కంపెనీ బోర్డు స్వతంత్ర దర్యాప్తును ప్రకటించింది. అయితే ప్రస్తుతానికి కంపెనీ రహస్యాలు లేదా జాతీయ భద్రతకు నష్టం జరిగినట్లు తమ వద్ద ఆధారాలు లేవని బోర్డు స్పష్టం చేసింది.

షేర్లపై ప్రభావం ఎలా ఉండొచ్చు?

రాయిటర్స్ నివేదిక ప్రకారం.. శుక్రవారం నాస్‌డాక్ మార్కెట్లో 186.64 డాలర్ల వద్ద ముగిసిన ఎన్విడియా షేర్లు సోమవారం ఆఫ్-అవర్స్ ట్రేడింగ్‌లో సుమారు 180.30 డాలర్లకు పడిపోయాయి. అంటే దాదాపు 3.4 శాతం క్షీణత నమోదైంది. రాబిన్‌హుడ్ ఓవర్‌నైట్ ట్రేడింగ్‌లో కూడా షేర్లు సుమారు 3.7 శాతం నష్టపోయినట్లు బ్లూమ్‌బర్గ్ నివేదించింది. ఈ పరిణామం స్వల్పకాలంలో పెట్టుబడిదారుల విశ్వాసాన్ని దెబ్బతీసే అవకాశం ఉంది. ముఖ్యంగా జెన్సన్ హువాంగ్ ఎన్విడియా వ్యాపార వ్యూహాలు, ఏఐ చిప్ మార్కెట్లో కంపెనీ ఆధిపత్యం పెరగడంలో కీలక పాత్ర పోషించారు. ఆయన నాయకత్వంపై అనిశ్చితి ఏర్పడితే షేర్లపై మరింత ఒత్తిడి పెరుగుతుంది. అయితే అమెరికా అధ్యక్షుడు డొనాల్డ్ ట్రంప్ హువాంగ్‌ను సమర్థిస్తూ ఆయన గొప్ప వ్యక్తి అని వ్యాఖ్యానించడం కొంతవరకు ప్రతికూల సెంటిమెంట్‌ను తగ్గించే అవ‌కాశం ఉంది.

షేర్లు పడిపోతాయా?

సోమవారం అమెరికా సాధారణ మార్కెట్ ట్రేడింగ్ ప్రారంభం కావడానికి ముందే అందుబాటులో ఉన్న సంకేతాలను పరిశీలిస్తే ఎన్విడియా షేర్లలో ప్రతికూల ప్రారంభానికి అవకాశాలు ఎక్కువగా కనిపిస్తున్నాయి. అయితే ఆఫ్-అవర్స్‌లో నమోదైన 3.4 శాతం పతనమే సాధారణ ట్రేడింగ్‌లోనూ కొనసాగుతుందని కచ్చితంగా చెప్పలేం. ఒకవైపు జెన్సన్ హువాంగ్‌పై దర్యాప్తు, అమెరికా కాంగ్రెస్ నుంచి ప్రశ్నలు, చైనాకు చిప్ విక్రయాలపై మరింత కఠినమైన నియంత్రణలు వచ్చే అవకాశాలు ప్రతికూల అంశాలుగా ఉన్నాయి. మరోవైపు ఎన్విడియా ఏఐ చిప్‌లకు ఉన్న భారీ డిమాండ్, కంపెనీ ఉత్పత్తులకు ప్రత్యామ్నాయాలు పరిమితంగా ఉండడం సానుకూల అంశాలు. నవంబర్ 18న కంపెనీ త్రైమాసిక ఆర్థిక ఫలితాలు ప్రకటించనుండగా, అదే రోజున హువాంగ్ అమెరికా కాంగ్రెస్ కమిటీల ప్రశ్నలను కూడా ఎదుర్కోవాల్సి ఉంది. అందువల్ల తక్షణ ఒత్తిడి ఉన్నప్పటికీ, దీర్ఘకాలిక పతనానికి ఈ వివాదం ఒక్కటే కారణమవుతుందని చెప్పలేం. దర్యాప్తు ఫలితాలు, హువాంగ్ నాయకత్వంపై స్పష్టత, కంపెనీ ఆర్థిక ఫలితాలే తదుపరి దిశను నిర్ణయించనున్నాయి.

గ‌మ‌నిక‌: ప్రస్తుతానికి ఎన్విడియా షేర్లపై స్వల్పకాలిక ప్రతికూల ప్రభావం పడే అవకాశం ఎక్కువ. అయితే సాధారణ ట్రేడింగ్ ప్రారంభమైన తర్వాత షేరు ధరను గమనించాలి. ఇది పెట్టుబడి నిర్ణయానికి హామీ కాదు.