South Korea Stock Market | దక్షిణ కొరియా స్టాక్ మార్కెట్‌లో భారీ పతనం.. భారత్‌కు లాభమా?

South Korea Stock Market | దక్షిణ కొరియా స్టాక్ మార్కెట్‌లో కృత్రిమ మేధ, సెమీకండక్టర్‌ షేర్లలో అమ్మకాల ఒత్తిడి తీవ్రతరం కావడంతో కోస్పి సూచీ మంగళవారం ఏకంగా 7.4 శాతం పడిపోయి 5,914.35 స్థాయికి చేరింది. జులై చివరి నుంచి చూస్తే ఇదే అత్యల్ప స్థాయి. ఈ పతనం ప్రభావం ఇతర ఆసియా మార్కెట్లపైనా పడింది. జపాన్‌కు చెందిన నిక్కీ, హాంకాంగ్‌కు చెందిన హాంగ్‌సెంగ్ సూచీలు కూడా నష్టాల్లోకి జారుకున్నాయి. అయితే, కొరియా బెంచ్‌మార్క్ సూచీ నష్టాలను స్వల్పంగా తగ్గించుకుంది. భార‌త‌ కాలమానం ప్రకారం మధ్యాహ్నం 12.55 గంటలకు కోస్పి 6.4 శాతం నష్టంతో 5,972.91 వద్ద ట్రేడయింది. కోస్పి సూచీలో సగానికి పైగా వెయిటేజీ కలిగిన శామ్‌సంగ్ ఎలక్ట్రానిక్స్, ఎస్‌కే హైనిక్స్ షేర్లు వరుసగా 7.7 శాతం, 8.8 శాతం పడిపోయాయి.

గ‌రిష్ట స్థాయి నుంచి మూడో వంతు దిగువ‌కు..

ప్రపంచవ్యాప్తంగా కృత్రిమ మేధ రంగంలో నెలకొన్న బూమ్‌ కారణంగా జూన్‌లో కోస్పి సూచీ 9,000 మార్కును దాటింది. అయితే, తాజా పతనంతో గరిష్ఠ స్థాయి నుంచి సూచీ మూడో వంతు కంటే ఎక్కువగా పడిపోయినట్లయింది. ఈ భారీ పతనానికి ప్రధానంగా ఐదు కారణాలు ఉన్నాయని మార్కెట్ విశ్లేషకులు చెబుతున్నారు. వాల్‌స్ట్రీట్‌లో చిప్ కంపెనీల షేర్లలో అమ్మకాలు పెరగడం దక్షిణ కొరియా మార్కెట్‌పై తక్షణ ప్రభావం చూపింది. సోమవారం ట్రేడింగ్ ముగిసే సమయానికి నాస్‌డాక్ సూచీ సుమారు 0.5 శాతం నష్టపోయింది. చిప్ తయారీ కంపెనీల షేర్ల పతనం దీనికి ప్రధాన కారణమైంది. అదే సమయంలో డౌ జోన్స్, ఎస్‌అండ్‌పీ 500 సూచీలు లాభాలతో ముగిశాయి. వాల్‌స్ట్రీట్‌లో రాత్రి చోటుచేసుకున్న చిప్ షేర్ల అమ్మకాల ప్రభావమే కొరియా మార్కెట్ పతనానికి ప్రధాన కారణమని క్యాపిటల్‌డాట్‌కామ్ సీనియర్ విశ్లేషకుడు కైల్ రోడా రాయిటర్స్‌తో పేర్కొన్నారు.

శామ్‌సంగ్‌, ఎస్‌కే హైనిక్స్‌పై ప్ర‌భావం..

దక్షిణ కొరియా మార్కెట్ ప్రధానంగా శామ్‌సంగ్, ఎస్‌కే హైనిక్స్ వంటి కంపెనీలపై ఆధారపడి ఉంటుంది. ఈ రెండు కంపెనీల షేర్లు పడిపోవడంతో మొత్తం సూచీపై తీవ్ర ప్రభావం పడింది. ఇతర ప్రముఖ సెమీకండక్టర్ కంపెనీల షేర్లలోనూ అమ్మకాలు వెల్లువెత్తాయి. ఎస్‌కే స్క్వేర్ షేరు దాదాపు 12 శాతం పడిపోగా, శామ్‌సంగ్ ఎలక్ట్రో-మెకానిక్స్ షేరు ఉదయం ఒక దశలో సుమారు 9 శాతం నష్టపోయింది. దక్షిణ కొరియా మార్కెట్ పతనానికి మరో ప్రధాన కారణం చైనా నుంచి పెరుగుతున్న పోటీ. చైనాకు చెందిన చాంగ్‌షిన్ మెమరీ టెక్నాలజీస్ (సీఎక్స్‌ఎంటీ) ఈ ఏడాదిలోనే తరువాతి తరం సర్వర్ డీఆర్‌ఏఎం ఉత్పత్తులను ఆవిష్కరించనున్నట్లు ప్రకటించింది. ఈ ప్రకటనతో ప్రపంచ మెమరీ చిప్ మార్కెట్‌లో పోటీ మరింత పెరుగుతుందనే ఆందోళనలు పెట్టుబడిదారుల్లో నెలకొన్నాయి. మెమరీ చిప్ వ్యాపారమే శామ్‌సంగ్, ఎస్‌కే హైనిక్స్ కంపెనీల ఆదాయాలకు కీలకంగా ఉంది. చైనా కంపెనీలు పోటీని పెంచితే ఈ రెండు సంస్థల లాభదాయకతపై ఒత్తిడి పెరిగే అవకాశం ఉందని మార్కెట్ వర్గాలు భావిస్తున్నాయి. సీఎక్స్‌ఎంటీ ప్రకటన అమెరికా చిప్ షేర్ల పతనానికీ కారణమైంది. మైక్రాన్, ఎన్విడియా, ఏఎండీ, ఇంటెల్, శాన్‌డిస్క్ తదితర కంపెనీల షేర్లు సోమవారం ట్రేడింగ్‌లో దాదాపు 6 శాతం వరకు పడిపోయాయి.

పెట్టుబ‌డిదారుల్లో సందేహాలు..

కృత్రిమ మేధ రంగంలో పెట్టుబడుల జోరు ఎంతకాలం కొనసాగుతుందనే ప్రశ్నలు పెట్టుబడిదారుల్లో పెరుగుతున్నాయి. అమెరికా, చైనా మధ్య సాంకేతిక పోటీ తీవ్రతరం కావడంతో ఏఐ ఆధారిత షేర్లలో ప్రస్తుత ర్యాలీ కొనసాగింపుపై అనుమానాలు వ్యక్తమవుతున్నాయి. అమెరికా బాండ్ ఈల్డ్స్ పెరగడం కూడా వృద్ధి ఆధారిత షేర్లపై ఒత్తిడి పెంచుతోంది. ఆసియా ట్రేడింగ్ సమయంలో పదేళ్ల అమెరికా ట్రెజరీ బాండ్ ఈల్డ్ 5.214 శాతంగా నమోదైంది. గత వారం నమోదైన 5.364 శాతం స్థాయి 24 ఏళ్ల గరిష్ఠానికి సమీపంలో ఇది కొనసాగుతోంది. పశ్చిమాసియాలో విస్తరిస్తున్న సంఘర్షణలు, సౌదీ అరేబియాపై దాడులు ముడిచమురు సరఫరాపై ఆందోళనలను పెంచుతున్నాయి. దీంతో బ్రెంట్ క్రూడ్ ధర బ్యారెల్‌కు 105 నుంచి 106 డాలర్ల మధ్య కొనసాగుతూ రెండు వారాల గరిష్ఠ స్థాయికి సమీపించింది. ముడిచమురు ధరలు పెరిగితే ద్రవ్యోల్బణం అదుపులోకి రావడం కష్టమవుతుంది. ఫలితంగా వడ్డీ రేట్లు అధిక స్థాయిలో కొనసాగాల్సిన పరిస్థితి ఏర్పడుతుంది. ఇది బాండ్ ఈల్డ్స్ పెరుగుదలకు సంబంధించిన ఆందోళనలను మరింత పెంచుతోంది. ఈ పరిణామాలన్నీ కలిసి స్టాక్ మార్కెట్లపై ప్రతికూల ప్రభావాన్ని చూపుతున్నాయి.

ఆసియా మార్కెట్ల‌పైనా ప్ర‌భావం..

దక్షిణ కొరియా మార్కెట్ పతనం ఆసియాలోని ఇతర మార్కెట్లపైనా ప్రభావం చూపింది. జపాన్ నిక్కీ సూచీ సుమారు 2.5 శాతం పడిపోగా, హాంకాంగ్ హాంగ్‌సెంగ్ సూచీ 0.82 శాతం నష్టపోయింది. జపాన్‌ను మినహాయించిన ఎంఎస్‌సీఐ ఆసియా-పసిఫిక్ సూచీ ప్రారంభ ట్రేడింగ్‌లో దాదాపు 2 శాతం పడిపోయింది. అయితే, భారత స్టాక్ మార్కెట్లు మాత్రం మంగళవారం ఉదయం లాభాలతో ప్రారంభమయ్యాయి. భారత కాలమానం ప్రకారం ఉదయం 9.35 గంటలకు నిఫ్టీ 50 సూచీ 126.70 పాయింట్లు (0.57 శాతం) పెరిగి 22,490.05 వద్ద ట్రేడయింది. సెన్సెక్స్ 440.92 పాయింట్లు (0.61 శాతం) లాభపడి 72,365.6 స్థాయికి చేరింది. మరి కొరియా మార్కెట్ పతనం భారత్‌కు లాభంగా మారుతుందా? అంటే.. విశ్లేషకుల అభిప్రాయం ప్రకారం, అలా జరిగే అవకాశం ఉన్నప్పటికీ అది నేరుగా, తక్షణమే జరిగే పరిణామం కాదు.

భార‌త్‌కు అనుకూల‌మా..?

విదేశీ పెట్టుబడులు ఒక మార్కెట్ నుంచి మరో మార్కెట్‌కు మళ్లే అవకాశమే భారత్‌కు అనుకూలంగా మారుతుంద‌ని విశ్లేషకులు చెబుతున్నారు. ఏఐ ఆధారిత షేర్లకు అధిక ప్రాధాన్యమున్న మార్కెట్ల నుంచి విదేశీ పెట్టుబడిదారులు తమ పెట్టుబడులను మళ్లిస్తే, భారత్‌కు అదనపు పెట్టుబడుల ప్రవాహం లభించే అవకాశం ఉందని ఇన్వెస్ట్‌వ్యాల్యూ ఫండ్ మేనేజర్ సిద్ధార్థ్ పురోహిత్ పేర్కొన్నారు. అప్పట్లో నిఫ్టీ ఒక ఏడాది ఫార్వర్డ్ ఆదాయ అంచనాలతో పోలిస్తే సుమారు 20 రెట్ల వద్ద ట్రేడవుతోందని, ఇది సాపేక్షంగా ఆకర్షణీయమైన విలువగా భావించవచ్చని ఆయన అభిప్రాయపడ్డారు. కొరియా మార్కెట్ పతనం భారత్‌కు పెట్టుబడుల ప్రవాహాన్ని పెంచిన సందర్భాలు గతంలో ఉన్నాయి. జూలై 29న రెండు ట్రేడింగ్ సెషన్లలో కోస్పి 16.2 శాతం పడిపోయిన తరువాత, విదేశీ పోర్ట్‌ఫోలియో పెట్టుబడిదారులు (ఎఫ్‌పీఐలు) భారత ఈక్విటీల్లో రూ.2,982 కోట్లను పెట్టుబడి పెట్టారు. జూన్ 19 తరువాత ఒకే రోజులో ఇదే అత్యధిక కొనుగోళ్లుగా నమోదైంది. అదే రోజు నిఫ్టీ ఆరు వారాలకు పైగా కాలంలో అత్యుత్తమ ప్రదర్శన కనబరిచింది.

అయితే, ప్రతిసారీ ఇదే విధమైన పరిణామం చోటుచేసుకోలేదు. జూన్ 23న కోస్పి ఒక దశలో 10 శాతం వరకు పడిపోయినప్పుడు నిఫ్టీ 1.16 శాతం నష్టపోయింది. నిఫ్టీ ఐటీ సూచీ కూడా 2 శాతానికి పైగా పడిపోయింది. కొరియా మార్కెట్ పతనం నేపథ్యంలో ఈ పెట్టుబడుల్లో కొంత భాగం తిరిగి భారత్‌కు వస్తుందా? లేక విదేశీ పెట్టుబడిదారులు అభివృద్ధి చెందుతున్న మార్కెట్ల నుంచి పూర్తిగా పెట్టుబడులను ఉపసంహరించుకుంటారా? రానున్న ట్రేడింగ్ సెషన్లలో ఈ అంశమే కీలకంగా మారనుంది.