US Stock Markets | అమెరికా టెక్ మార్కెట్లలో 2.4 లక్షల కోట్ల డాలర్లు ఆవిరి.. ఏఐ పెట్టుబడులే కారణమా?

US Stock Markets | అమెరికా స్టాక్ మార్కెట్లలో టెక్నాలజీ షేర్ల పతనం కొనసాగుతోంది. ఇంటెల్, అమెజాన్ ఆర్థిక ఫలితాలు నిరాశపరచడం, కృత్రిమ మేధ (ఏఐ) మౌలిక సదుపాయాలపై భారీ పెట్టుబడులు పెడుతున్నప్పటికీ ఆశించిన స్థాయిలో ఆదాయం రావడంపై స్పష్టత లేకపోవడంతో ఇన్వెస్టర్లు అమ్మకాలకు దిగారు. అక్టోబర్ నెలలో నాస్‌డాక్ 100 మార్కెట్ విలువ నుంచి 2.74 లక్షల కోట్ల డాలర్ల మేర సంపద ఆవిరైనట్లు నివేదిక పేర్కొంది. దీంతో నాస్‌డాక్ ఏడాదికి పైగా కాలంలో అత్యంత దారుణమైన నెలవారీ పనితీరును నమోదు చేసింది. శుక్రవారం అమెరికా స్టాక్ మార్కెట్లలో భారీ అమ్మకాల ఒత్తిడి కనిపించింది. డౌ జోన్స్ సూచీ 1.09 శాతం నష్టపోయి 51,770.31 పాయింట్ల వద్ద ముగిసింది. ఎస్‌అండ్‌పీ 500 సూచీ 1.82 శాతం పడిపోయి 7,580.07 పాయింట్లకు చేరింది.

ఒక్క రోజులోనే 2.86 శాతం ప‌త‌న‌మైన నాస్‌డాక్ కాంపోజిట్‌..

నాస్‌డాక్ కాంపోజిట్ సూచీ ఏకంగా 2.86 శాతం క్షీణించి 25,437 పాయింట్ల వద్ద స్థిరపడింది. జూన్ ప్రారంభం తర్వాత నాస్‌డాక్ ఒక్కరోజులో ఇంత భారీ శాతం నష్టపోవడం ఇదే తొలిసారి. అక్టోబర్ 6న నమోదైన రికార్డు ముగింపు స్థాయితో పోలిస్తే ప్రస్తుతం నాస్‌డాక్ 7.8 శాతం దిగువన ఉంది. ముఖ్యంగా మార్కెట్ ముగిసిన తర్వాత ఇంటెల్, అమెజాన్ ప్రకటించిన ఆర్థిక ఫలితాలు పెట్టుబడిదారుల అంచనాలను అందుకోలేకపోయాయి. భారీ నగదు వ్యయం నమోదైనట్లు వెల్లడించిన ఇంటెల్ షేరు 28.6 శాతం కుప్పకూలింది. మరోవైపు ఏఐ మౌలిక సదుపాయాల కోసం అమెజాన్ భారీగా పెట్టుబడులు పెట్టే ప్రణాళిక ప్రకటించడం ఆందోళన పెంచింది. ఈ పెట్టుబడుల ద్వారా ఆశించిన లాభాలు ఎప్పుడు వస్తాయనే సందేహాలు మార్కెట్‌ల‌ను ప్రభావితం చేశాయి.

భారీగా క్షీణించిన చిప్ త‌యారీ కంపెనీ షేర్లు..

చిప్ తయారీ కంపెనీల షేర్లు ఈ పతనంలో తీవ్రంగా దెబ్బతిన్నాయి. ఎన్విడియా షేరు 4.2 శాతం, ఏఎండీ షేరు 10.9 శాతం నష్టపోయాయి. ఫిలడెల్ఫియా సెమీకండక్టర్ సూచీ ఒక్కరోజులో 7.2 శాతం పడిపోగా, అక్టోబర్ నెలలో ఇప్పటివరకు 15 శాతానికి పైగా నష్టపోయింది. సర్వర్ తయారీ సంస్థలైన డెల్ 10.8 శాతం, హెచ్‌పీ 9.6 శాతం క్షీణించాయి. బ్లూమ్‌బెర్గ్ నివేదిక ప్రకారం.. నాస్‌డాక్ 100 సూచీ మార్చి 2025 తర్వాత అత్యంత దారుణమైన నెలవారీ పనితీరును నమోదు చేసింది. ఎస్‌అండ్‌పీ 500లోని టెక్నాలజీ రంగం కూడా మార్చి 2025 తర్వాత అతిపెద్ద నెలవారీ నష్టాన్ని చవిచూసింది. కమ్యూనికేషన్ సర్వీసెస్ రంగం ఏప్రిల్ 2022 తర్వాత అత్యంత భారీ పతనాన్ని నమోదు చేసింది. ఏజే బెల్‌కు చెందిన డాన్ కోట్స్‌వర్త్ అంచనా ప్రకారం, ఫ్యూచర్స్ సూచిస్తున్న నష్టాలు కొనసాగితే అక్టోబర్ 6 నాటి గరిష్ఠ స్థాయి నుంచి నాస్‌డాక్ 100 మార్కెట్ విలువలో సుమారు 3 లక్షల కోట్ల డాలర్లు ఆవిరయ్యే అవకాశం ఉంది. ఈ నేపథ్యంలో ఎస్‌అండ్‌పీ గ్లోబల్ రేటింగ్స్ మెటా క్రెడిట్ రేటింగ్‌ను రాబోయే రెండేళ్లలో తగ్గించే అవకాశాన్ని పరిశీలించడం ప్రారంభించింది. ఏఐ పెట్టుబడుల కారణంగా కంపెనీ ఆర్థిక పరిస్థితిపై ఒత్తిడి పెరుగుతోందని భావిస్తోంది. ఇదే సమయంలో ప్రపంచంలో అత్యంత విలువైన కంపెనీ హోదాను ఎన్విడియా నుంచి యాపిల్ తిరిగి దక్కించుకుంది.

ఏఐ రంగ‌ పెట్టుబ‌డుల‌పై ఆందోళ‌న‌లు..

ఈ ఏడాది ఏఐ పెట్టుబడుల కోసం సుమారు 750 బిలియన్ డాలర్ల ఖర్చుకు నిధులు సమకూరుస్తున్న ప్రకటనలు, వినియోగదారుల వ్యాపారాలు, రిటైల్ రంగాల్లో మందగమన సంకేతాలు కనిపిస్తున్నాయని బ్లూమ్‌బెర్గ్ పేర్కొంది. మిల్లర్ టబాక్‌కు చెందిన మ్యాట్ మాలే మాట్లాడుతూ వ్యాపారాల్లో మందగమనం కారణంగా ఏఐ పెట్టుబడుల నుంచి భారీ లాభాలు వచ్చే సమయం మరింత ఆలస్యమయ్యే అవకాశం ఉందని అభిప్రాయపడ్డారు. ప్రధాన మార్కెట్ సూచీలు మరింత పడిపోతే పెట్టుబడిదారులు ఇతర రంగాల వైపు పెట్టుబడులను మళ్లించడం కూడా నిలిపివేస్తార‌ని హెచ్చరించారు. మరోవైపు బైనాన్స్‌పై హ్యాకర్లు5.8 బిలియన్ డాలర్ల విలువైన క్రిప్టో ఆస్తులను దొంగిలించారన్న వార్తల నేపథ్యంలో క్రిప్టో రంగ షేర్లు కూడా పడిపోయాయి. కాయిన్‌బేస్, స్ట్రాటజీ, రాబిన్‌హుడ్ షేర్లు 7.2 నుంచి 10.6 శాతం వరకు నష్టపోయాయి. బిట్‌కాయిన్ ధర 2.5 శాతం తగ్గి 76,813.65 డాలర్లకు చేరింది.

లాభాల్లో చ‌మురు రంగ షేర్లు..

అయితే చమురు రంగ షేర్లు మాత్రం లాభాల్లో నిలిచాయి. అంచనాలను మించిన లాభాలు ప్రకటించిన ఎక్సాన్ మొబిల్ 2.2 శాతం, చెవ్రాన్ 2.8 శాతం పెరిగాయి. వెస్ట్ టెక్సాస్ ఇంటర్మీడియట్ ముడిచమురు ధర 0.9 శాతం పెరిగి బ్యారెల్‌కు 102.94 డాలర్లకు చేరింది. ఆసక్తికరంగా, మార్కెట్లలో భారీ అమ్మకాలు జరిగినప్పటికీ కంపెనీల ఆర్థిక ఫలితాల సీజన్ మొత్తం మీద సానుకూలంగానే ఉంది. మూడో త్రైమాసిక ఫలితాలు ప్రకటించిన ఎస్‌అండ్‌పీ 500లోని 299 కంపెనీల్లో 82 శాతం సంస్థలు విశ్లేషకుల అంచనాలను అధిగమించాయి. అయినప్పటికీ ఏఐ పెట్టుబడులపై పెరుగుతున్న వ్యయాలు, భవిష్యత్ ఆదాయంపై అనిశ్చితి ప్రస్తుతం అమెరికా మార్కెట్లను తీవ్ర ఒత్తిడికి గురిచేస్తున్నాయి.