NSE | ఎన్‌ఎస్‌ఈ షేర్లకు తొలి ఎదురుదెబ్బ.. ఐపీఓ ధర కంటే దిగువకు..

NSE | నేషనల్ స్టాక్ ఎక్స్ఛేంజ్ లిమిటెడ్ (ఎన్‌ఎస్‌ఈ) షేరు సోమవారం గరిష్ఠంగా 1.77 శాతం పడిపోయింది. లిస్టింగ్ తర్వాత తొలిసారి ఐపీఓ ఇష్యూ ధర కంటే దిగువకు చేరింది. బీఎస్‌ఈలో ఎన్‌ఎస్‌ఈ షేరు రూ.1,761 కనిష్ఠ స్థాయిని తాకింది. ఎన్‌ఎస్‌ఈ ఐపీఓ ధర శ్రేణిలో గరిష్ఠ ధరను రూ.1,785గా నిర్ణయించారు. సోమవారం ఉదయం కొంత కోలుకున్నప్పటికీ, బీఎస్‌ఈలో షేరు 1 శాతం నష్టంతో రూ.1,774.90 వద్ద ట్రేడయ్యింది. అవినాష్ మెంటర్ రీసెర్చ్ సర్వీసెస్ వ్యవస్థాపకుడు, రీసెర్చ్ హెడ్ అవినాష్ గోరక్ష‌కర్ తెలిపిన‌ ప్రకారం ట్రేడర్లు దీర్ఘకాలికంగా.. అంటే రెండు నుంచి మూడు సంవత్సరాల కాలానికి ఎన్‌ఎస్‌ఈ షేర్లను దశలవారీగా కొనుగోలు చేయడాన్ని పరిశీలించవచ్చు.

ఆదాయాన్ని ఆర్జించే అవ‌కాశం..

నగదు మార్కెట్‌లో ఎన్‌ఎస్‌ఈకు సుమారు 93 శాతం మార్కెట్ వాటా, ఈక్విటీ ఫ్యూచర్స్‌లో దాదాపు 99.7 శాతం మార్కెట్ వాటా ఉందని ఆయన పేర్కొన్నారు. బీఎస్‌ఈతో పోలిస్తే ఎన్‌ఎస్‌ఈలో మొత్తం లిస్టెడ్ కంపెనీల సంఖ్య తక్కువగా ఉన్నప్పటికీ, ఎన్‌ఎస్‌ఈ మూడు రెట్లకు పైగా ఆపరేటింగ్ ఆదాయాన్ని, దాదాపు నాలుగు రెట్ల నికర లాభాన్ని ఆర్జిస్తోందని ఆయన తెలిపారు. భారత ఆర్థిక ట్రేడింగ్ వ్యవస్థలో కీలకమైన మార్కెట్ ఇన్‌ఫ్రాస్ట్రక్చర్ సంస్థగా ఎన్‌ఎస్‌ఈ ఉందని, బలమైన నగదు ప్రవాహ సామర్థ్యం కారణంగా బీఎస్‌ఈతో పోలిస్తే ఎన్‌ఎస్‌ఈకి ప్రాధాన్యత ఉంటుందని అవినాష్ గోరక్ష‌కర్ అభిప్రాయపడ్డారు. మార్కెట్‌లో బలహీన పరిస్థితులు ఉన్న సమయంలో కూడా ఎన్‌ఎస్‌ఈ ఆదాయాన్ని ఆర్జించే అవకాశం ఉందని ఆయన పేర్కొన్నారు.

ఐపీఓ వివ‌రాలు..

కాగా ఎన్‌ఎస్‌ఈ ఐపీఓ పూర్తిగా ఆఫర్ ఫర్ సేల్‌గా జరిగింది. మొత్తం 12.64 కోట్ల షేర్లను విక్రయించగా, ఐపీఓ విలువ రూ.22,561.57 కోట్లుగా ఉంది. ఒక్కో షేరుకు రూ.1,700 నుంచి రూ.1,785 వరకు ధర శ్రేణిని నిర్ణయించారు. రిటైల్ ఇన్వెస్టర్లకు కనీస బిడ్ పరిమాణాన్ని 8 షేర్లుగా నిర్ణయించారు. గరిష్ఠ ఇష్యూ ధర రూ.1,785 వద్ద 8 షేర్లకు రూ.14,280 పెట్టుబడి అవసరమైంది. ఈ ఐపీఓలో ఉద్యోగుల కోసం గరిష్ఠంగా 4,33,437 షేర్లను రిజర్వ్ చేశారు. ఉద్యోగులకు ఒక్కో షేరుపై రూ.170 డిస్కౌంట్ అందించారు.