NRI | విదేశాల్లోని భార‌తీయులు ఇక్క‌డికి డ‌బ్బు పంపిస్తే జాగ్ర‌త్త‌.. రూల్స్‌ను పాటించ‌క‌పోతే నోటీసులు ఇస్తారు..

NRI | అమెరికాలో నివసిస్తున్న ఓ భారతీయ ప్రవాసి (ఎన్‌ఆర్‌ఐ) తన తల్లిదండ్రులకు భారత్‌లో రూ.11 లక్షలు పంపిన తర్వాత ఊహించని విధంగా ఆదాయపు పన్ను శాఖ నుంచి నోటీసు అందుకున్నాడు. ఈ కేసులో తన డబ్బు బదిలీ చట్టబద్ధమైన కుటుంబ బహుమతేనని నిరూపించుకోవడానికి అతను ఆరు సంవత్సరాల పాటు పోరాడాల్సి వచ్చింది. చివరకు ఇన్‌కమ్ ట్యాక్స్ అప్పీలేట్ ట్రిబ్యునల్ (ఐటీఏటీ) అతని పక్షాన తీర్పు ఇచ్చి నోటీసును రద్దు చేసింది. ఈ ఘటనను ఇటీవల ట్యాక్స్ అడ్వైజరీ ప్లాట్‌ఫామ్ ట్యాక్స్‌బడ్డీ త‌న‌ ఎక్స్ ఖాతాలో వెల్ల‌డించింది. సరైన పత్రాలు లేకపోతే కుటుంబ సభ్యులకు పంపిన నిజమైన డబ్బు బదిలీలపై కూడా పన్ను అధికారులు ప్రశ్నలు లేవనెత్తే అవకాశం ఉంటుందని ఈ ఘటన స్పష్టం చేస్తోంది. ఎన్‌ఆర్‌ఐలు, ఓసీఐలు, విదేశాల్లో నివసించే భారతీయులు భారత్‌కు డబ్బు పంపే ముందు తప్పనిసరిగా ప‌లు ముఖ్య‌మైన విష‌యాల‌ను తెలుసుకోవాల్సి ఉంటుంద‌ని నిపుణులు సూచిస్తున్నారు.

క‌నీసం 183 రోజులు నివ‌సిస్తే..

భారతీయ పౌరుడు ఆర్థిక సంవత్సరంలో వర్తించే పన్ను నివాస నిబంధనల ప్రకారం కనీసం 183 రోజులు విదేశాల్లో నివసిస్తే అతడిని ఎన్‌ఆర్‌ఐ (నాన్-రెసిడెంట్ ఇండియన్)గా పరిగణిస్తారు. ఓసీఐ (ఓవర్‌సీస్ సిటిజన్ ఆఫ్ ఇండియా) కూడా భారతీయ మూలాలు కలిగిన విదేశీ పౌరుడికి ఇచ్చే ప్రత్యేక హోదా. దీనివల్ల అతను జీవితకాలం భారత్‌లో నివసించడం, పనిచేయడం వంటి సౌకర్యాలను పొందవచ్చు. పీఐఓ (పర్సన్ ఆఫ్ ఇండియన్ ఒరిజిన్) అంటే భారతీయ వంశానికి చెందిన విదేశీ పౌరుడు. ప్రస్తుతం పీఐఓ పథకం ఓసీఐలో విలీనం అయినప్పటికీ ఆర్థిక, చట్టపరమైన చర్చల్లో ఈ పదాన్ని ఇప్పటికీ ఉపయోగిస్తున్నారు. ఈ మూడు వర్గాలకు బ్యాంకింగ్, పెట్టుబడులు, విదేశీ నిధుల బదిలీలకు సంబంధించిన నిబంధనలు వేర్వేరుగా ఉంటాయి. అందువల్ల డబ్బు పంపే ముందు తమ నివాస హోదా ఏదో నిర్ధారించుకోవడం అవసరం.

ప‌న్ను ఉండ‌దు.. కానీ..

ఎన్‌ఆర్‌ఐలు తమ తల్లిదండ్రులు, జీవిత భాగస్వామి, పిల్లలు, ఆదాయపు పన్ను చట్టంలో పేర్కొన్న ఇతర సన్నిహిత బంధువులకు పంపే నగదు బహుమతులపై ఎలాంటి పన్ను ఉండదు. అలాంటి బహుమతులకు ఎలాంటి గరిష్ఠ పరిమితి కూడా లేదు. అయితే బంధువులు కాని వ్యక్తులకు ఇచ్చే బహుమతుల విషయంలో వేరు నిబంధనలు అమలులో ఉంటాయి. ఒక ఆర్థిక సంవత్సరంలో బంధువు కాని వ్యక్తి నుంచి రూ.50 వేలకుపైగా బహుమతి అందుకుంటే, కేవలం అదనపు మొత్తం మాత్రమే కాకుండా మొత్తం బహుమతిపైనే ఆదాయపు పన్ను వర్తించే అవకాశం ఉంటుంది. దీన్ని ఆదాయపు పన్ను చట్టంలోని నిబంధనల ప్రకారం నిర్ణయిస్తారు. భారత్‌లో అధికారిక బ్యాంకింగ్ మార్గాల ద్వారా విదేశాల నుంచి వ్యక్తిగత అవసరాల కోసం వచ్చే నగదు బదిలీలపై ఎలాంటి గరిష్ఠ పరిమితి లేదు. కుటుంబ నిర్వహణ, విద్య, వైద్య ఖర్చులు, పెట్టుబడులు లేదా పొదుపుల కోసం ఎన్‌ఆర్‌ఐలు ముందస్తు రిజర్వ్ బ్యాంక్ అనుమతి లేకుండానే డబ్బు పంపవచ్చు. అయితే నిధుల మూలం చట్టబద్ధమైనదై ఉండాలి. అలాగే ఫెమా (ఫారిన్ ఎక్స్‌చేంజ్ మేనేజ్‌మెంట్ యాక్ట్) నిబంధనలకు అనుగుణంగా లావాదేవీలు జరగాలి.

ఎందుకు పంపారో చెప్పాలి..

డబ్బు పంపుతున్న దేశంలో విదేశీ మారక నియంత్రణలు, నివేదికల సమర్పణ నిబంధనలు, నిర్దిష్ట మొత్తాలపై ప్రత్యేక వెల్లడింపులు ఉంటాయి. కాబట్టి అధిక మొత్తాలను పంపే ముందు ఆయా దేశాల నిబంధనల‌ను పరిశీలించడం మంచిది. భారత్‌లో విదేశీ నిధుల బదిలీలను ఫారిన్ ఎక్స్‌చేంజ్ మేనేజ్‌మెంట్ యాక్ట్ (ఫెమా), 1999 ప్రకారం నియంత్రిస్తారు. దీనికి సంబంధించిన అమలు మార్గదర్శకాలను రిజర్వ్ బ్యాంక్ ఆఫ్ ఇండియా (ఆర్‌బీఐ) జారీ చేస్తుంది. ప్రతి విదేశీ నగదు బదిలీకి బ్యాంకులు సరైన పర్పస్ కోడ్ ను నమోదు చేయాల్సి ఉంటుంది. ఈ కోడ్ ద్వారా డబ్బు కుటుంబ నిర్వహణ, పెట్టుబడులు, ఆస్తి కొనుగోలు, విద్య, ఎన్‌ఆర్‌ఈ డిపాజిట్ లేదా ఇతర అనుమతించిన అవసరాలలో దేని కోసం పంపించారో తెలుస్తుంది. సరైన పర్పస్ కోడ్ లేకపోతే లావాదేవీ ఆలస్యం కావడం లేదా అదనపు ధ్రువీకరణకు వెళ్లే అవకాశం ఉంటుంది. డబ్బు స్వీకరించేందుకు లేదా నిల్వ చేసేందుకు ఉపయోగించే ఖాతా కూడా కీలకం. ఎన్‌ఆర్‌ఈ ఖాతాల‌ను విదేశీ ఆదాయాన్ని నిల్వ చేయడానికి ఉపయోగిస్తారు. వీటిలోని నిధులను పూర్తిగా తిరిగి విదేశాలకు పంపించుకోవచ్చు. అలాగే వీటిపై వచ్చే వడ్డీకి భారత్‌లో పన్ను మినహాయింపు ఉంటుంది.

రూ.2 ల‌క్ష‌ల కంటే ఎక్కువ పంపినా, తీసుకున్నా..

ఎన్‌ఆర్‌ఓ ఖాతాలను భారత్‌లో వచ్చే అద్దె, పెన్షన్ వంటి ఆదాయాల కోసం ఉపయోగిస్తారు. వీటిపై వచ్చే వడ్డీపై పన్ను చెల్లించాలి. ఎఫ్‌సీఎన్‌ఆర్ ఖాతాల‌ను విదేశీ కరెన్సీల్లో డిపాజిట్లు ఉంచేందుకు ఉపయోగపడతాయి. దీంతో కరెన్సీ మార్పిడి వల్ల కలిగే నష్టాలను కొంతవరకు తగ్గించుకోవచ్చు. పెద్ద మొత్తాలను నగదుగా పంపడం లేదా స్వీకరించడం నివారించాలని నిపుణులు సూచిస్తున్నారు. ఆదాయపు పన్ను చట్టంలోని సెక్షన్ 269ఎస్‌టి ప్రకారం కొన్ని పరిస్థితుల్లో రూ.2 లక్షలు లేదా అంతకంటే ఎక్కువ నగదు స్వీకరిస్తే, అందుకున్న మొత్తానికి సమానమైన జరిమానా విధించే అవకాశం ఉంటుంది. ఎన్‌ఆర్‌ఐలు తమ ఆదాయ వనరులకు సంబంధించిన ఆధారాలు, బ్యాంకు ట్రాన్స్‌ఫర్ రికార్డులు, డబ్బు అందుకున్న వ్యక్తితో ఉన్న బంధాన్ని నిరూపించే పత్రాలు, ఇతర అవసరమైన డాక్యుమెంట్లను తప్పనిసరిగా భద్రపరచుకోవాలని నిపుణులు సూచిస్తున్నారు.

బ్యాంకు రికార్డులే కీల‌కం..

ట్యాక్స్‌బడ్డీ తెలిపిన వివరాల ప్రకారం ఈ కేసులో చివరకు ఐటీఏటీ ముందు బ్యాంకు రికార్డులే కీలక ఆధారాలుగా నిలిచాయి. తల్లిదండ్రులకు పంపిన మొత్తం చట్టబద్ధమైన బహుమతేనని, అది తెలియని ఆదాయం కాదని అవే నిరూపించాయి. అందుకే బ్యాంకింగ్ మార్గాల ద్వారానే డబ్బు పంపడం, నిధుల మూలానికి సంబంధించిన ఆధారాలను భద్రపరచడం, బదిలీ రికార్డులు, బంధుత్వ పత్రాలను ఉంచుకోవడం, అవసరమైన సందర్భాల్లో పన్ను వర్తించే బహుమతులను సక్రమంగా ప్రకటించడం భవిష్యత్తులో పన్ను నోటీసులు వచ్చినప్పుడు మొదటి రక్షణగా ఉపయోగపడ‌తాయ‌ని ట్యాక్స్‌బడ్డీ సూచించింది.