India Oil Reserves | భారత్‌లో మరో 25 రోజులకు సరిపడా చమురు నిల్వలు.. ఇప్పట్లో పెట్రోల్, డీజిల్ ధరల పెంపు లేనట్లే!

India Oil Reserves | త్రినేత్ర.న్యూస్ : ప్రపంచంలోనే అత్యంత కీలకమైన చమురు ఉత్పత్తి ప్రాంతమైన పశ్చిమాసియా (Middle East) అగ్నిగుండంగా మారింది. ఇరాన్, ఇజ్రాయెల్-అమెరికా మధ్య జరుగుతున్న దాడుల కారణంగా చమురు సరఫరాకు తీవ్ర అంతరాయం కలగవచ్చన్న ఆందోళనలు ట్రేడర్లలో వ్యక్తమవుతున్నాయి. ఈ నేపథ్యంలో భారత ప్రభుత్వ వర్గాలు కీలక విషయాలు వెల్లడించాయి.

ప్రస్తుతం దేశంలో మరో 25 రోజులకు సరిపడా క్రూడ్ ఆయిల్, రిఫైన్డ్ ఇంధన నిల్వలు సురక్షితంగా ఉన్నట్లు ప్రభుత్వ వర్గాలు తెలిపాయి. ఒకవేళ మధ్యప్రాచ్యంలో ఉద్రిక్తతలు మరింత తీవ్రమైతే.. ముడిచమురుతో పాటు ఎల్పీజీ (LPG), ఎల్ఎన్జీ (LNG) దిగుమతుల కోసం ప్రత్యామ్నాయ దేశాల వైపు మొగ్గుచూపుతామని అధికారులు స్పష్టం చేశారు.

తక్షణమే ధరల పెంపు లేదు

అంతర్జాతీయంగా క్రూడ్ ఆయిల్ ధరలు పెరుగుతున్నప్పటికీ.. సామాన్యులకు ఇది కాస్త ఊరటనిచ్చే వార్తే. ప్రస్తుత పరిస్థితుల్లో దేశీయంగా పెట్రోల్, డీజిల్ ధరలను తక్షణమే పెంచే ఆలోచన ప్రభుత్వానికి లేదని అధికారిక వర్గాలు స్పష్టం చేశాయి.

హార్ముజ్ జలసంధి ‘క్లోజ్’.. ఇరాన్ వార్నింగ్!

హార్ముజ్ జలసంధి (Strait of Hormuz) గుండా నౌకల రాకపోకలను పూర్తిగా మూసివేసినట్లు ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) సోమవారం అధికారికంగా ప్రకటించింది. ఈ కీలక జలమార్గం గుండా ప్రయాణించేందుకు ప్రయత్నించే ఏ నౌకనైనా అగ్నికి ఆహుతి చేస్తామని ఇరాన్ ప్రభుత్వ మీడియా ద్వారా తీవ్ర హెచ్చరికలు జారీ చేసింది. ఇరాన్ ఒకవైపు, అమెరికా-ఇజ్రాయెల్ మరోవైపు మోహరించిన ఈ యుద్ధ వాతావరణంలో ఇరాన్ ప్రకటన మరింత కలకలం రేపుతోంది.

వైమానిక దాడులు.. భయం గుప్పిట్లో నౌకలు

అమెరికా, ఇజ్రాయెల్ సంయుక్తంగా సోమవారం ఇరాన్‌పై తమ వైమానిక దాడులను మరింత విస్తృతం చేశాయి. ఇజ్రాయెల్.. లెబనాన్‌లోనూ దాడులకు దిగింది. దీనికి ప్రతీకారంగా.. ఇరాన్ సైతం గల్ఫ్ దేశాలలోని ఇంధన మౌలిక సదుపాయాలపై దాడులు ప్రారంభించింది. అంతేకాకుండా హార్ముజ్ జలసంధి గుండా వెళ్లే ఆయిల్ ట్యాంకర్లను లక్ష్యంగా చేసుకుంది.

దీంతో, ఈ ఇరుకైన సముద్ర మార్గం గుండా ప్రయాణించడం షిప్పింగ్ సంస్థలకు అత్యంత ప్రమాదకరంగా మారింది. పలు ఆయిల్ ట్యాంకర్లు, కంటైనర్ నౌకలు ఈ రూట్‌ను పక్కనపెట్టి ప్రత్యామ్నాయ మార్గాల్లో వెళ్తున్నాయి. ఉద్రిక్తతల దృష్ట్యా ఈ ప్రాంతంలో తిరిగే నౌకలకు ఇన్సూరెన్స్ కంపెనీలు కవరేజీని రద్దు చేయడంతో పరిస్థితి మరింత సంక్లిష్టంగా తయారైంది.

భగ్గుమంటున్న ముడి చమురు ధరలు

పశ్చిమాసియా సంక్షోభంతో గ్లోబల్ క్రూడ్ ఆయిల్ ధరలు వరుసగా మూడో సెషన్‌లోనూ పైకి ఎగబాకాయి. పెరుగుతున్న రిస్క్‌ను అంచనా వేసిన కంపెనీలు చమురు, గ్యాస్ రవాణా (Shipping costs) ఛార్జీలను భారీగా పెంచేశాయి.

బ్రెంట్ క్రూడ్ (Brent Crude): బ్యారెల్ ధర 1.70 డాలర్లు (2.2 శాతం) పెరిగి 79.44 డాలర్ల వద్ద ట్రేడవుతోంది. ఇది జనవరి 2025 తర్వాత అత్యధికంగా 82.37 డాలర్లకు చేరుకుని, చివరికి 6.7 శాతం లాభంతో ముగిసింది.

డబ్ల్యూటీఐ క్రూడ్ (WTI Crude): యూఎస్ వెస్ట్ టెక్సాస్ ఇంటర్మీడియట్ క్రూడ్ ధర 1.17 డాలర్లు (1.6 శాతం) పెరిగి 72.40 డాలర్లకు చేరుకుంది. క్రితం సెషన్‌లో జూన్ 2025 తర్వాత గరిష్ట స్థాయిని తాకిన ఈ ముడి చమురు.. చివరకు 6.3 శాతం లాభంతో ముగియడం గమనార్హం.