Manipal Health IPO | మ‌ణిపాల్ హెల్త్ ఐపీఓ వచ్చేస్తోంది.. భారీ హెల్త్‌కేర్‌ ఐపీఓకు ఇన్వెస్ట‌ర్లు రెడీ..

Manipal Health IPO | టెమాసెక్ మద్దతుతో కొన‌సాగుతున్న మణిపాల్ హెల్త్ ఎంటర్‌ప్రైజెస్ ప్రతిపాదిత ఐపీఓకు భారత మార్కెట్ నియంత్రణ సంస్థ సెబీ ఆమోదం లభించింది. మణిపాల్ హాస్పిటల్స్ ఈ నెల చివరి నాటికి స్టాక్ మార్కెట్‌లో లిస్టింగ్ కావాలని లక్ష్యంగా నిర్ణ‌యించుకుంది. కంపెనీ తాజా డ్రాఫ్ట్ రెడ్ హెర్రింగ్ ప్రాస్పెక్టస్ (డీఆర్‌హెచ్‌పీ) దాఖలు చేసే ముందు సెబీ నుంచి అనుమతి వస్తుందని ఈ వ్యవహారంపై అవగాహన ఉన్న వర్గాలు ఇప్పటికే తెలిపాయి. ఈ ఐపీఓ పరిమాణం దాదాపు 1 బిలియన్ డాలర్ల వరకు ఉండే అవకాశం ఉంది. అయితే మార్కెట్ పరిస్థితులు, ప్రస్తుతం కొనసాగుతున్న చర్చల ఆధారంగా తుది ఇష్యూ పరిమాణంలో మార్పులు చోటు చేసుకునే అవకాశముందని సంబంధిత వర్గాలు వెల్లడించాయి. మణిపాల్ హెల్త్ ఎంటర్‌ప్రైజెస్ లిస్టింగ్ దేశంలోని అతిపెద్ద ప్రైవేట్ హాస్పిటల్ సంస్థల్లో ఒకటిగా కీలక మైలురాయికి చేర‌నుంది. అలాగే దేశంలో ఇప్పటివరకు వచ్చిన అతిపెద్ద హెల్త్‌కేర్ ఐపీఓలలో ఇది ఒకటిగా నిలిచే అవకాశముంది. ఈ ఏడాది ప్రారంభంలో మందగించిన ఈక్విటీ క్యాపిటల్ మార్కెట్ కార్యకలాపాలు మళ్లీ ఊపందుకుంటున్న సమయంలో ఈ ఐపీఓ రావడం ప్రాధాన్యం సంతరించుకుంది.

13 బిలియ‌న్ డాల‌ర్ల విలువ‌..

మణిపాల్ హాస్పిటల్స్ కంపెనీ విలువను 10 బిలియన్ డాలర్ల నుంచి 13 బిలియన్ డాలర్ల మధ్య నిర్ణయించాలని లక్ష్యంగా నిర్ణ‌యించుకుంది. అయితే తుది విలువ ఇంకా ఖరారు కాలేదు. ఈ ఐపీఓలో కొత్తగా షేర్ల జారీతోపాటు ఇప్పటికే ఉన్న పెట్టుబడిదారులు తమ వాటాలో కొంత భాగాన్ని విక్రయించే ఆఫర్ ఫర్ సేల్ కూడా ఉండనుంది. మణిపాల్ హెల్త్ ఎంటర్‌ప్రైజెస్ ఈ ఏడాది ప్రారంభంలోనే తన డ్రాఫ్ట్ ఐపీఓ పత్రాలను సెబీకి సమర్పించింది. డ్రాఫ్ట్ రెడ్ హెర్రింగ్ ప్రాస్పెక్టస్ ప్రకారం, ఈ ఇష్యూకు కోటక్ మహీంద్రా క్యాపిటల్, యాక్సిస్ క్యాపిటల్, గోల్డ్‌మన్ సాక్స్, జెఫరీస్, జేపీ మోర్గాన్, యూబీఎస్, డీబీఎస్ బ్యాంక్ బుక్ రన్నింగ్ లీడ్ మేనేజర్లుగా వ్యవహరిస్తున్నాయి.

ప్రణాళిక ప్రకారం ఈ ఐపీఓ పూర్తయితే, ఇది దేశంలో అతిపెద్ద హెల్త్‌కేర్ ఐపీఓలలో ఒకటిగా నిలవడమే కాకుండా, ఈ ఏడాదిలో దేశంలో వచ్చిన తొలి 1 బిలియన్ డాలర్ల పబ్లిక్ ఇష్యూగా కూడా చరిత్ర సృష్టించే అవకాశం ఉందని సంబంధిత వర్గాలు పేర్కొన్నాయి.