Itel | గృహోప‌క‌ర‌ణాల రంగంలోకి ఐటెల్‌.. చ‌వ‌క ధ‌ర‌ల‌కే స్మార్ట్ టీవీలు, వాషింగ్ మెషిన్లు..

Itel | మొబైల్స్‌ త‌యారీ సంస్థ ఐటెల్ భార‌త్‌లో గృహోప‌క‌ర‌ణాల రంగంలోకి అడుగు పెట్టింది. ఈ సంద‌ర్భంగా త‌మ సంస్థ నుంచి నూతన శ్రేణిలో వాషింగ్ మెషిన్లు, స్మార్ట్ టీవీల‌ను శ‌నివారం లాంచ్ చేసింది. ఈ కొత్త సిరీస్‌లో 3 వాషింగ్ మెషిన్ మోడ‌ల్స్‌, ప‌లు రకాల డిస్‌ప్లే సైజుల్లో టీవీల‌ను ఆవిష్క‌రించింది. ఇవి దేశంలోని అన్ని ప్ర‌ధాన రిటెయిల్ స్టోర్ల‌లో అందుబాటులో ఉన్నాయ‌ని కంపెనీ తెలిపింది. ఈ ఉత్ప‌త్తుల‌ను చాలా చ‌వ‌క ధ‌ర‌ల‌కే అందిస్తున్న‌ట్లు తెలియ‌జేసింది.

3 ర‌కాల వాషింగ్ మెషిన్ మోడ‌ల్స్‌..

ఐటెల్ లాంచ్ చేసిన కొత్త వాషింగ్ మెషిన్ల‌లో ఐటెల్ డ‌బ్ల్యూఎం105ఎస్ఏ, డ‌బ్ల్యూఎం095ఎస్ఏ, డ‌బ్ల్యూఎం080ఎస్ఏ మోడ‌ల్స్ ఉన్నాయి. ఇవి వ‌రుస‌గా 10.5 కిలోలు, 9.5, 8 కిలోల సామ‌ర్థ్యంతో వ‌చ్చాయి. వీటిల్లో దృఢ‌మైన గ్లాస్ టైప్ టాప్ డిజైన్‌ను ఇచ్చారు. అందువ‌ల్ల చూసేందుకు ఆక‌ర్ష‌ణీయంగా ప్రీమియం లుక్‌లో క‌నిపిస్తాయి. వీటికి ఐపీఎక్స్‌4 రేటింగ్ ఉండ‌గా, ట్రై ఫ్లో వాట‌ర్‌ఫాల్‌, ఫుల్ గ్లాస్ క‌ర్వ్‌డ్ ప్యానెల్‌, 6 వింగ్స్ ప‌ల్సేట‌ర్‌, ఫుల్ గ్లాస్ ప్యానెల్ వంటి ఫీచ‌ర్ల‌ను ఇచ్చారు.

టీవీల వివ‌రాలు..

టీవీ పోర్ట్‌ఫోలియోలో ఐటెల్ సంస్థ గూగుల్ క్యూడీ మినీ ఎల్ఈడీ, క్యూఎల్ఈడీ, ఆండ్రాయిడ్ క్యూఎల్ఈడీ పేరుతో ప‌లు సిరీస్‌ల‌లో టీవీ మోడ‌ల్స్‌ను లాంచ్ చేసింది. వీటిల్లో క్యూడీ మినీ ఎల్ఈడీ టీవీలు 55 నుంచి 65 ఇంచుల స్క్రీన్ సైజుల్లో లాంచ్ అవగా, క్యూఎల్ఈడీ టీవీలు 43 నుంచి 55 ఇంచుల సైజుల్లో అందుబాటులో ఉన్నాయి. అలాగే క్యూఎల్ఈడీ టీవీలు 32 నుంచి 43 ఇంచుల డిస్‌ప్లే సైజుల్లో ల‌భిస్తున్నాయి. వీటిల్లో క్యూఎల్ఈడీ టెక్నాల‌జీని అందించారు. అందువ‌ల్ల పిక్చ‌ర్ క్వాలిటీ బాగుంటుంద‌ని కంపెనీ తెలిపింది. అలాగే ఫోన్‌ల‌కు కనెక్టివిటీ, స్క్రీన్ మిర్ర‌రింగ్‌, హెచ్‌డీఎంఐ, ఏఆర్‌సీ క‌నెక్టివిటీ, మెరుగైన ఆడియో వంటి స‌దుపాయాల‌ను సైతం ఇచ్చారు.

ధ‌ర‌లు ఎంతంటే..

ఐటెల్ డ‌బ్ల్యూఎం105ఎస్ఏ మోడ‌ల్ సిరీస్ వాషింగ్ మెషిన్ల‌ ప్రారంభ ధ‌ర రూ.12,699 ఉండ‌గా, డ‌బ్ల్యూఎం095ఎస్ఏ, డ‌బ్ల్యూఎం080ఎస్ఏ మోడ‌ల్స్ ప్రారంభ ధ‌ర‌లు వ‌రుస‌గా రూ.12,099, రూ.9,999గా ఉన్నాయి. ఐటెల్ టీవీ మోడ‌ల్స్ ప్రారంభ ధ‌ర రూ.12,069గా ఉంది. కాగా త‌మ ఉత్ప‌త్తుల‌కు దేశ‌వ్యాప్తంగా వేయికి పైగా స‌ర్వీస్ సెంట‌ర్లు అందుబాటులో ఉన్నాయ‌ని కంపెనీ తెలిపింది.